“God . . . bambae i ravemaot wota blong ae blong olgeta, mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem” —Revelesen 21:3, 4, Niu Wol Translesen.

Yu kasem save se i no God we i mekem ol trabol oli stap kasem yumi.—Jemes 1:13.

Yu save se God i harem nogud taem yumi kasem ol trabol, mo hemia i leftemap tingting blong yu.—Sekaraea 2:8.

Yu gat strong tingting se wan dei, ol samting we oli stap mekem yumi safa, bambae oli finis.—Ol Sam 37:9-11.

Yes, from ol risen ya:

• God i no laekem nating we man i safa mo man i mekem i no stret long narafala. Yu traem tingbaot. Taem ol man oli stap mekem i nogud tumas long ol man Isrel bifo, Baebol i talem se God i harem nogud taem “ol narafala oli stap tritim nogud olgeta.”—Jajes 2:18.

  God i no glad nating long ol man we oli stap spolem ol narafala. Baebol i talem se hem i no laekem nating fasin blong “kilim man i ded.”—Ol Proveb 6:16, 17.

• God i kea long yumi. Ol man oli save “prapa trabol blong olgeta mo samting we oli harem nogud long hem.” Be Jehova tu i save ol trabol ya.—2 Kronikel 6:29, 30.

  I no longtaem, Jehova bambae i yusum Kingdom blong hem blong finisim ol trabol we oli stap mekem ol man oli safa. (Matiu 6:9, 10) Be go kasem taem ya, hem i stap givhan long olgeta we oli stap lukaotem hem, blong mekem olgeta oli harem gud.—Ol Wok 17:27; 2 Korin 1:3, 4.