35-ШЕ УЖАШ

Кузе Юмо дене йолташ лияш?

Еш проблеме дене тӱкнен, Джереми Юмо дене йолташ лиймым аклаш тӱҥалын. Тудо ойла: «Латкок ияш лиймем годым ачам мемнам коден каен. Ик йӱдым Иеговалан кумалын, мый тудым ешыш пӧртылташ сӧрвален йодынам».

Тидын верч чот тургыжланен, Джереми Библийым лудаш тӱҥалын. Псаломышто 9:35 тудо шкаланже лыпландарымашым муын. Тушто возымо почеш Иегова тулыклан полшышо улеш. Джереми шарналта: «Мыланем чучын, пуйто Иегова тиде шомакым лач мыланем ойла. Тудо мыланем умылаш пуа: ындыжым тудо мыйын полшышем, мыйын Ачам улеш. Тудын деч сайрак ача мыйын лийынат огеш керт!»

ОЧЫНИ, тыят тыгай ситуаций дене тӱкненат. Тӱкнен отыл гынат, Иегова тыйын йолташет лийнеже. Библийыште каласыме: «Юмо деке лишемза, тунам Тудат тендан деке лишемеш» (Иаковын 4:8). Шоналте, мом тиде шомак ончыкта. Тый Иеговам от уж да те иктаҥаш одал гынат, Иегова Юмо тыйым тудын йолташыже лияш ӱжеш.

Но Юмын йолташыже лияшлан вийым пыштыман. Мутлан, мӧҥгыштет пеледыш кушкеш. Тудым от ончо гын, вӱдым от шаве гын, удобренийым от пыште гын, тудо кушмым чарна да кола. Тыгак Юмо дене йолташ лиймашым кушташ кӱлеш. Кузе тидым ышташ?

Библийым шымле

Йолташ лиймаш мутланымаш да колыштмаш деч посна огеш лий. Тидымак Юмо дене йолташ лиймаш шотышто каласаш лиеш. Библийым лудын да шымлен, ме колыштына, мом Юмо мыланна каласынеже (Псалом 1:2, 3).

Очыни, шымлаш тый от йӧрате. Тидын олмеш можыч тыланет веселан жапым эртараш чотрак келша, мутлан, телевизорым ончаш але йолташ-влак дене пырля уремыште кошташ. Но Юмо дене йолташ лияш вес семын огеш лий. Тудын Мутшым шымлен, тыланет тудым колышташ кӱлеш.

Ит тургыжлане. Библийым шымлаш йӧсӧ огыл. Лудаш от йӧрате гынат, шымлымаш тыланет келшен кертеш. Эн ончыч Библийым шымлашлан жапым ойырен нал. Лайш лӱман ӱдыр ойла: «Мыйын графикем уло. Кажне кечын эрдене мый Библий гыч ик ужашым лудам». А латвич ияш Мариян вес графикше. Тудо ойла: «Мый малаш вочмо деч ончыч эре Библийым изишак лудам».

График почеш лудмым тӱҥалме деч ончыч « Библийым келгын шымле» лӱман рамкым ончен лек. Ӱлнырак возо, кунам тый Библийым шымлымашлан 30 минут наре жапым ойырен кертат.

․․․․․

Жапым ойырен налмаш — тӱҥалтыш веле. Шымлаш тӱҥалмеке, Библийым лудаш южгунам куштылго огыл манын ужат. Очыни, тый латик ияш Джезриелын мутшо дене келшет. Тудо шылтыде каласен: «Библийын южо ужашыже пешыжак оҥай огыл, лудашат йӧсырак». Тыят тыге шонет гын, вуйым ит саке. Эре шарне: Библийым шымлымаш тыланет шке йолташетым, Иегова Юмым, колышташ йӧным пуа. Библийым шымлымаш оҥай да тыланет пайдале лиеш але уке, тый дечет шога!

Юмылан кумал

Кумалмашлан кӧра ме Юмо дене мутланен кертына. Шоналте гына, могай шергакан пӧлекым тыланет Юмо пуэн! Тый тудлан кечывалымат, йӱдымат кумалын кертат. Иегова Юмо тыйым колышташ эре ямде. Тидлан тудын кумылжат уло. Сандене Библий тарата: «Кумалын, тауштен да сӧрвален, йодмыдам чыла годымат Юмылан палдарыза» (Филиппысе-влаклан 4:6).

Тиде почеламут дене келшышын, Иегова дене шуко мо нерген мутланаш лиеш, мутлан, тӱрлӧ проблеме да тургыжланымаш нерген. Тыгак Юмым таушташ лиеш. Йолташет тыланет иктаж-мом сайым ышта гын, тый тудлан тау мутым от каласе мо? Но Иегова гай тыланет ик йолташат тынар шуко порылыкым ыштен огеш керт. Сандене тудым таушташ огеш кӱл мо? (Псалом 105:1).

Ӱлнырак возен шынде, мо́лан тый Иеговам тауштет.

․․․․․

Мутат уке, южгунам тыйым тӱрлӧ лӱдмаш ден тургыжланымаш авалта. Псаломышто 54:23 каласыме: «Тый ойгетым Юмылан пыште, да Тудо тыйым тема: Юмылан йӧрышӧ еҥым Тудо курымеш ок кудалте».

Возен шынде, могай проблеме нерген тый Юмылан кумалме мутышто эн ончыч каласынет.

․․․․․

Юмо деч полышым ужаш тырше

Юмо дене йолташ лийнет гын, эше ик факторым шотыш налман. Псаломым мурышо Давид возен: «Тамлен ончыза да Юмын могай поро улмыжым ужыда» (Псалом 33:9). 33-шо Псаломым возымо деч ончыч Давидын илышыже икмыняр гана шӱртӧ мучаште кечен. Саул кугыжа тудым пуштнеже ыле. Варажым тудлан тушманже-влак, филистим-влак, коклаште шылын кошташ логалын. Кунам тудым пушташлан кученыт, тудо шкенжым уш кайышыла кучаш тӱҥалын да тыге колымаш деч утлен кертын (1 Самуила 21:10—15).

Но Давид шонен огыл, пуйто тудо шке моштымашыжлан кӧра утарыме лийын. Утаралтмаште тудо Юмын полшымыжым ужын. Ту Псаломыштак тудо возен: «Мый Юмым кычальым, Тудо мыйым кольо да чыла ойгем деч утарыш» (Псалом 33:5). Тыгела, Давид шке илышыштыже Юмын полшымыжым ужын. Сандене весе-влакым теве мом ышташ таратен: «Тамлен ончыза да Юмын могай поро улмыжым ужыда» *.

Шарнет мо тыгай случайым, кунам тыйын верч Иегован тыршымыжым тый ужынат? Тиде ӧрыктарыше случай лийын огыл гынат, ӱлнырак тудын нерген возен шынде. Очыни, тиде проста случай лийын, кудыжым тый суапландарымашланат от шотло.

․․․․․

Очыни, библийысе чынлан тыйым ача-ават туныктеныт. Туге гын, акле тидым. Но ит мондо: Юмо дене йолташ лияшлан тый шке тыршышаш улат. Тиде ужаш тыланет икымше ошкылым ышташ полша, а Иегова тыйын тыршыметым суапландара. Библийыште возымо: «Сӧрвалыза — тыланда пуалтеш, кычалза — муыда» (Матфейын 7:7).

[Сноско]

ТӰҤ БИБЛИЙЫСЕ ПОЧЕЛАМУТ

«Юмо деке лишемаш кӱлешлыкым умылышо-влак пиалан улыт» (Матфейын 5:3, УТ).

КАҤАШ

Кажне кечын Библийын иктаж ныл страницыжым лудат гын, ик ий гыч тудым лудын пытарет.

ПАЛЕТ МО...

Библийым шымлымет да тудын каҥашыж-влакым илышыш пуртымет Иегован тыйын верч тыршымыжым ончыкта (Иоаннын 6:44).

ТЕВЕ МОМ ЫШТЫНЕМ!

Библийым шымлымаш дечын шукырак пайдам налашлан мыланем кӱлеш...

Кумалаш мондаш огыл манын, мыланем кӱлеш...

Ача-авам деч теве мо нерген йоднем:

КУЗЕ ТЫЙ ШОНЕТ?

● Библийым шымлымашет оҥайрак лийже манын, мом ыштен кертат?

● Иегова языкан еҥ-влакын кумалме мутыштым молан колыштнеже?

● Кумалме мутетым кузе саемден кертат?

[Вставка]

«Ончыч мый шке кумалме мутыштем иктымак ойленам. Ындыжым мый Иеговалан кече коклаште мо сайже, мо удаже лийын, чылажымат каласкалаш тыршем. Икгаяк кок кече огеш лий, сандене мый кумалме мутышто уэш пачаш иктымак ом ойло» — Эва

[Рамке/сӱрет]

 Библийым келгын шымле

1. Ойырен нал, мом Библий гыч лудын налнет. Тиде ужашым умылен налашлан уш-акыл нерген кумал.

2. Тӱткын лудын нал. Ит вашке. Лудметым вуйыштет сӱретле. Шкендым ту жапыште ужаш тырше. Лудмым ужаш, йӱк-влакым колаш, пушым да кочкыш тамым шижаш тырше. Тек нине событий-влак ушыштет ылыжыт!

3. Лудын лекме нерген шонкале. Шкаланет тыгай йодыш-влакым пу:

● Иегова тидым шке Мутышкыжо молан пуртен?

● Могай пример-влак мыланем пайдале улыт, а могайышт — шижтарыше?

● Лудмем гыч мый мом илышыш пуртен кертам?

● Иегова нерген да тудын кузе ыштымыж нерген мый мом пален нальым?

4. Иеговалан кӱчык кумалме мутым каласе. Ойлен пу, мом тый Библийым шымлымет годым пален налынат да кузе тидым илышыш пурташ шонет. Тыгак Иеговам тыланет Библийым пуымыжлан таушташ ит мондо, вет тудын Мутшо — чот шергакан пӧлек!

[Сӱрет]

«Тыйын законет мыйын йолемлан волгалтарыше, корнем-шамычлан — волгыдо» (Псалом 118:105).

[Рамке/сӱрет]

Ончыч эн тӱҥжым ыште

Кумалаш да Библийым шымлаш жап уке мо? Чӱчкыдын жапым кузе кучылтмо деч тиде шога.

Теве мом ыштен ончал. Нал ведрам да тушак кугу кӱ-влакым пыште. А вара ведрам ошма дене тич теме. Тыге ведра кӱ денат, ошма денат темын.

Ындыжым ведрам ястаре да угыч тудым теме, но ты гана вес радам почеш: ончыч ошма дене, а вара кӱ дене. Кӱ-влак огыт шыҥе мо? Эн ончыч ошмам пыштымылан кӧра тыге лийын.

Урокшо могай? Библийыште возымо дене келшышын, тергаш кӱлеш, мо эн тӱҥ лийшаш (Филиппысе-влаклан 1:10). «Ошмам», мутлан, веселан жапым эртарымым, икымше верыш шындет гын, духовный пашалан жап огеш код. Шкаланет шарныктен шогет гын, мо илышыште чынжымак тӱҥ улеш, тунам духовный пашаланат да кӱлешан канымаш ден веселан жапым эртарымыланат жапым муат. Мом тый ведраш эн ончыч пыштет, тый дечет шога!

[Сӱрет]

Пеледыш семын Юмо дене йолташ лиймаш кушшо манын, тудын верч тыршыман