ISAHLUKO 35

Ngingaba Njani Mngani kaZimu?

Ngemva kokuqalana nobujamo obubudisi u-Jeremy wabona ukuqakatheka kokuba mngani kaZimu. Uhlathulula uthi, “Nangineminyaka eli-12, ubabami wasitjhiya soke ekhaya. Ngelinye ilanga ebusuku ngisembhedeni ngarabhela uJehova ukuthi abuyise ubaba.”

Ngebanga lokugandeleleka, u-Jeremy wathoma ukufunda iBhayibheli. Wafumana umtlolo weRhubo 10:14 owamthinta ihliziyo, othi ngoJehova: “Yeke ungazimbi uzinikela kuwe, iye, wena umsizi wentandani.” U-Jeremy uthi: “Ngezwa ngasuthi uJehova ukhuluma nami ungitjela ukuthi ungumsizami, unguBabami. Bengingamfumanaphi omunye ubaba ongcono kunaye?”

KUNGENZEKA nawe usebujamweni obufana nebaka-Jeremy namkha awukaqalani nobujamo obufanako. IBhayibheli litjengisa ukuthi uJehova ufuna ubemnganakhe. Lithi: “Tjhidelani kuZimu, naye uzokutjhidela kini.” (Jakopo 4:8) Cabanga ngokuthi amezwi la atjho ukuthini: Nanyana ungekhe wambona begodu angalingani nawe, uJehova uZimu ufuna nibe bangani!

Kufuze usebenze budisi nawuzakuba mngani kaZimu. Akhe sifanekise: Nangabe unesitjalo, uyazi ukuthi kufuze usitlhogomele kuhle nasizakukhula ngokusithelelela qobe begodu usibeke endaweni ezosenza sikhule. Kunjalo nokuba nobungani noZimu kufuze ubutlhogomele. Ungakwenza njani lokho?

Kuqakathekile Ukufunda IBhayibheli

Abangani kufuze balalelane begodu bakhulumisane. Kunjalo nangobungani noZimu. Ukufunda iBhayibheli yindlela esilalela ngayo lokho uZimu asitjela khona.​—IRhubo 1:2, 3.

Iye, kungenzeka awukuthandi ukufunda. Abantu abanengi abatjha bakubona kungcono ukubukela i-TV, ukudlala ama-game namkha ukuzithabisa nabangani babo. Nawuzakuba mngani kaZimu akunandlela elula yokwenza lokho. Kufuze umlalele ngokuthi ufunde iliZwi lakhe.

Ukufunda iBhayibheli akukafuzi kube mthwalo. Ungakuthabela ukulifunda nanyana uzibona ngasuthi umumuntu ongakuthandi ukufunda. Into yokuthoma ongayenza kubekela eqadi isikhathi sokufunda iBhayibheli. Umntazana okuthiwa ngu-Lais uthi, “Ngenze ihlelo lokufunda isahluko sinye seBhayibheli qobe ekuseni.” U-Maria oneminyaka eli-15, unehlelo elihlukileko uthi, “Ngifunda ingcenye encani yeBhayibheli qobe ebusuku ngaphambi kokuthi ngilale.”

Ukuthi uthomise ngehlelo lakho lokufunda, qala ibhoksi elisekhasini-292. Ngenzasi, tlola isikhathi ongasisebenzisa mhlamunye imizuzu engaba ma-30 ufunda iliZwi lakaZimu.

․․․․․

Thoma ngokubeka isikhathi sokufunda. Nasele uthomile ukufunda ungalemuka ukuthi ukufunda iBhayibheli akusilula ngaso soke isikhathi. Ungavumelana no-Jezreel, oneminyaka eli-11 nakathi, “Ezinye iingcenye zeBhayibheli zibudisi begodu angikuthabeli ukuzifunda.” Nangabe uzizwa njalo, ungapheli amandla. Qala isikhathi ofunda ngaso njengesikhathi osisebenzisela ukulalela umnganakho, uJehova uZimu. Nawuzakuthabela ukufunda iBhayibheli kuzokuya ngokuthi wenza umzamo ongangani ukuthi ulifunde!

Umthandazo Uqakathekile

Umthandazo yindlela esikhuluma ngayo noZimu. Umthandazo usisipho esihle khulu! Ungakhuluma noJehova kunanyana ngisiphi isikhathi, kungaba semini namkha ebusuku. Uhlale akulungele ukukulalela. Ngaphezu kwalokho, ufuna ukukuzwa ukuthi uthini. Kungebangelo iBhayibheli lisibawa: “Ningatshwenyeki ngalitho, kodwana kikho koke, iimbawo zenu azaziwe nguZimu ngomthandazo, ngokurabhela kunye nokuthokoza.”​—Filipi 4:6.

Njengokutjho komtlolo loya, kunezinto ezinengi ongazitjela uJehova. Zingahlanganisa imirarwakho namatshwenyekwakho. Ungabuye umtjele ngezinto ozithabelako. Angitjho uyabathokoza abangani bakho nabakwenzele izinto ezihle? Kubayini ungenzi okufanako nakuJehova, okwenzele izinto ezinengi ezihle ukudlula nanyana ngikuphi umnganakho angakwenzela khona?​—IRhubo 106:1.

Tlola izinto ozithabelako uJehova akwenzele zona.

․․․․․

Iye khona ngezinye iinkhathi ungatshwenyeka begodu ubenevalo. IRhubo 55:23 lithi: “Phosa umthwalwakho kuSomnini, yena uzakusekela, angekhe avumela olungileko asikinywe.”

Emideni elandelako, tlola izinto ongathanda ukuthandaza ngazo kuZimu.

․․․․․

Izinto Ezakwenzakalelako

Kunenye ingcenye yobuhlobo bakho noZimu ekufuze uyitjheje. Umrhubi uDavida watlola: “Yizwani benibone bonyana uSomnini muhle.” (IRhubo 34:9) UDavida nakazokutlola iRhubo 34 bekaceda ukuba sebujamweni obuthusako. Bekabalekela iKosi uSawula, ebeyifuna ukumbulala kodwana bekufuze abalekele emanabenakhe, amaFilista. Njengombana uDavida bekazi ukuthi amanabakhe azombulala, ngokuhlakanipha wazenza ngasuthi uyahlanya begodu wakghona ukubaleka.​—1 Samyela 21:10-15.

UDavida akhange acabange ukuthi indlela abaleka ngayo bekukuhlakanipha kwakhe. Kunalokho, wanikela uJehova idumo. Erhubweni alitlolako ekukhulunywe ngalo ngaphambilini, watlola wathi: “Ngathandaza kuSomnini, wangiphendula; wangitjhaphulula kikho koke ukwesaba kwami.” (IRhubo 34:5) Ngilokho okwamenzakalelako, yeke uDavida bekangakghona ukutjela abanye ukuthi ‘bezwe bebabone bonyana uSomnini muhle.’ *

Kghani kunento eyakwehlakalelako ekuphileni kwakho ekunikela ubufakazi bokuthi uJehova unendaba? Nangabe kunjalo, tlola ngayo ngenzasi. Nakhu okungakusiza utlole ngesenzakalweso: Akukafuzi kube yinto ekulu, ungakhumbula izinto ezincani zaqobe langa ezithathwa lula.

․․․․․

Mhlamunye ababelethi bakho ngibo abakufundisa iBhayibheli. Kusibusiso lokho. Nanyana kunjalo, usatlhoga ukuzenzela ubungani noZimu. Nangabe awukakwenzi lokho ungasebenzisa okusesahlukwenesi. UJehova uzowubusisa umzamwakho. IBhayibheli lithi: “Phikelelani nibawa, nizakuphiwa; phikelelani nifuna, nizakufumana.”​—Matewu 7:7.

FUNDA OKWENGEZIWEKO NGESIHLOKWESI KU-VOLUME 1, IZAHLUKO-38 NO-39

ESAHLUKWENI ESILANDELAKO

Kghani ukufumana kubudisi ukukhuluma nabanye ngoZimu? Funda ukuthi ungakujamela njani lokho okukholelwako.

[Umtlolo waphasi]

UMTLOLO OYIHLOKO

“Bayathaba abaziko bona batlhoga uZimu.”​—Matewu 5:3.

ONGAKUSEBENZISA

Funda amakhasi amane weBhayibheli qobe langa begodu uzoliqeda ngonyaka munye.

KGHANI BEWAZI . . . ?

Ukuthi ufunda incwadi le begodu usebenzisa iimfundiso zayo ezisekelwe eBhayibhelini kutjho ukuthi uJehova unekareko kuwe.​—Jwanisi 6:44.

ONGAKWENZA!

Ukuthi ngizuze nangifunda iBhayibheli, ngizo ․․․․․

Ukuthi ngijwayele ukuthandaza, ngizo ․․․․․

Lokho engingathanda ukukubuza ababelethi bami ngendaba le ․․․․․

UCABANGANI?

● Khuyini ongayenza ukuthi uthabele ukufunda iBhayibheli?

● Kubayini uJehova afuna ukulalela imithandazo yabantu abanesono?

● Ungayithuthukisa njani indlela othandaza ngayo?

[Isithombe ekhasini 291]

“Lokha nangisesemncani, nangithandazako bengibuyelela into yinye kanengi. Nje, ngilinga ukukhuluma ngezinto ezihle nezimbi ezenzeke phakathi nelanga, njengombana amalanga amabili angekhe afane. Lokho kungisiza ngingabuyeleli into yinye kanengi.”​—Eve

[Ibhoksi/​Isithombe ekhasini 292]

Hlolisisa iBhayibhelakho

1. Khetha indaba ethileko eBhayibhelini ongathabela ukuyifunda. Thandazela ukuthi uzwisise lokho ozabe ukufunda.

2. Yifundisise kuhle indaba leyo. Thatha isikhathi sakho. Njengombana ufunda, sebenzisa ingqondwakho. Zicabange usendaweni leyo: Linga ukubona lokho okwenzekako, uzwe amaphimbo wabantu, unukelele umoya, unambithe ukudla kwakhona nokhunye godu. Yenza indaba oyifundako iphile!

3. Cabanga ngalokho okufundileko. Zibuze imibuzo efana nelandelako:

● Kubayini uJehova afake indaba le eliZwini lakhe?

● Ngibaphi abantu ekufuze ngibalingise nalaba ekungakafuzi ngibalingise?

● Ngiziphi iimfundo engingazisebenzisa endabeni engiqeda ukuyifunda?

● Indaba le ingifundisani ngoJehova nangendlela enza ngayo izinto?

4. Yitjho umthandazo omfitjhani kuJehova. Mtjele ngalokho okufunde eBhayibhelini nokuthi ufuna ukukusebenzisa njani ekuphileni kwakho. Hlala uthokoza uJehova ngesipho esihle akuphe sona, iliZwi lakhe iBhayibheli eliCwengileko!

[Isithombe]

“Ilizwi lakho lisibani eenyaweni zami begodu likukhanya emzilenami.”​—IRhubo 119:105.

[Ibhoksi/​Isithombe ekhasini 294]

Thoma ngokwenza izinto eziqakathekileko

Umajadu khulu ukuthi ungathandaza? Awunasikhathi sokufunda iBhayibheli? Esikhathini esinengi kuya ngokuthi uzihlela njani izinto zakho.

Linga lokhu: Thatha ithunga ufake amatje amakhulu phakathi kwalo bese uthela ihlabathi phezulu. Nje, unethunga eligcwele amatje nehlabathi.

Rhuthula koke okungaphakathi kwethunga. Nje, thoma ngokuthela ihlabathi bese uthathe amatje uwafake phezulu. Kghani akusanasikhala sokufaka amatje? Lokhu kungebanga lokuthi uthome ngokufaka ihlabathi.

Ngisiphi isifundo osifumanako? IBhayibheli lithi: “Niqiniseke ngezinto eziqakathekileko.” (Filipi 1:10) Nangabe sithoma ngokubeka izinto ezincani ekuphileni kwethu, angekhe saba nesikhathi esaneleko sezinto ezikulu​—njengokwakha ubuhlobo bethu noJehova. Nawulalela iseluleko esiseBhayibhelini uzokufumana ukuthi unesikhathi esaneleko sokwenza izinto ezikutjhideza kuZimu bewukghone nokuzithabisa. Lokho kuzokuya ngokuthi khuyini oyifaka kokuthoma ethungeni lakho!

[Isithombe ekhasini 290]

Njengesitjalo, bona ubuhlobo bakho noZimu bukhule kufuze ubutlhogomele kuhle