Yɛsɛlɛ wɔ ka wɔ ngakula nu edwɛkɛ kile yɛ.

Bɛwole me wɔ Italy wɔ 1943. Bɛtetele me nee me mediema ne mɔ wɔ namule ekyi bie mɔɔ ɛnee me papa le ɛyazonlɛnli nee kapenta wɔ ɛkɛ ne la azo. Yɛ awovolɛ tetele yɛ maanle yɛhulole Kateleke ɛzonlenlɛ ne kpalɛ.

Duzu ati a ɛnee ɛkulo kɛ ɛyɛ ɛsɔfo a?

Mele kakula la, ɛnee yɛkɔ asɔne a metie ɛsɔfo ne mɔ edwɛkɛ ne kpalɛ. Ɛnee bɛ ɛdendɛlɛ yɛ me fɛ yɛɛ me nye die ninyɛne mɔɔ bɛyɛ la anwo. Ɔti menyɛle me adwenle kɛ mebayɛ ɛsɔfo. Mɔɔ menlile ɛvolɛ 13 la, me mame vale me hɔle sukulu bie mɔɔ bɛda ɛkɛ, mɔɔ bɛtete ngakula mrenyia bɛmaa bɛsukoa ninyɛne dɔɔnwo amaa bɛayɛ ɛsɔfo kenle bie la anu.

Ɛnee Baebolo ɛzukoalɛ boka bɛ ndetelɛ ne anwo ɔ?

Ɛnee yɛnva yɛmboka nwo kpalɛ. Mɔɔ menlile ɛvolɛ 15 la, me kilehilevolɛ bie maanle me Edwɛkpa ne ko​—ɔka Gyisɛse ɛbɛlabɔlɛ nee ye ɛzonlenlɛ gyima ne anwo edwɛkɛ​—na mengengale ye fane dɔɔnwo. Mɔɔ menlile ɛvolɛ 18 la, mengɔle Rome kɛ mekazukoa debie wɔ Kateleke yunivɛsiti ne mɔ mɔɔ pope ne a nea zolɛ la anu. Menzukoale Latɛn, Giliki, tetedwɛkɛ, ɛbɛlabɔlɛ nwo nrɛlɛbɛ, adwenle mɔɔ menli fa bɔ bɛ ɛbɛla yɛɛ ɛzonlenlɛ nwo debie. Ɛnee yɛka Baebolo tɛkese mɔɔ yɛhwi yɛgua yɛ ti anu la yɛɛ yɛkɔ asɔne Molɛ a yɛte kɛ bɛlɛkenga Baebolo ne ɛdeɛ, noko ɛnee yɛnzukoa Baebolo ne kpalɛ.

Bɛmaanle ɛnleanle sukulu zo. Ɛnee ɛkile debie ɔ?

Ɛnee ɔfese a meta meyɛ gyima a. Noko ɛnee mekile menli Second Vatican Council ne anwo debie.

Duzu a maanle wɔ adwenle nu yɛle wɔ kesee wɔ asɔne ne ngilehilelɛ nwo a?

Ɛnee ninyɛne nsa a gyegye me a. Ɛnee asɔne ne fa ɔ nwo wulowula maanyɛlɛ nu. Ɛnee bɛdie ɛbɛlatane mɔɔ ɛsɔfo ne mɔ yɛɛ asɔne ne anu amra bɔ la bɛto nu. Ɛnee eza ɔzɔho kɛ Kateleke asɔne ne ngilehilelɛ bie mɔ ɛnle nɔhalɛ. Kɛ neazo la, kɛzi Nyamenle mɔɔ lɛ ɛlɔlɛ la bahwe menli nzo dahuu wɔ mekɛ mɔɔ bɛwu la ɛ? Bieko, asoo amgba Nyamenle kulo kɛ yɛdua wuloze zo yɛyɛ asɔne ko ne ala fane dɔɔnwo? *

Duzu a ɛyɛle a?

Menvale ɛzunlɛ menyɛle asɔne memkpondɛle adehilelɛ. Eza mendɔle Kateleke Jerusalem Bible ne, mɔɔ kenlensa ye ala a bɛhile ɔ bo bɛhɔ Italy aneɛ nu la ko na membɔle ɔ bo kɛ mekenga. Molɛ nwonlomɔ bie mɔɔ ɛnee yɛhɔ Mass yɛkpɔne mɔɔ melɛfa me ɛsɔfo tɛladeɛ ne meahenda ɛkɛ ne la, mrenyia nwiɔ bie rale sukulu ɛkɛ ne. Bɛhanle bɛhilele me kɛ bɛle Gyihova Alasevolɛ. Yɛvale dɔnehwele mɔɔ bo ko la yɛhanle Baebolo ne nee mɔɔ ɔka ɔfale debie mɔɔ maa bɛnwu nɔhalɛ ɛzonlenlɛ la anwo edwɛkɛ.

Duzu a ɛ nye liele nwo wɔ bɛ ɛkpɔlalɛ ne anwo a?

Me nye liele bɛ anwodozo ne nee kɛzi bɛkola bɛka Kateleke Baebolo ne anu edwɛkɛ la anwo. Nzinlii, Dasevolɛ bie mɔɔ bɛfɛlɛ ye Mario la bɔle ɔ bo rakpɔlale me. Ɛnee ɔlɛ abotane yɛɛ ɔdi ye mekɛ zo​—Folɛ nwonlomɔ biala, ezule nu o, ewia nu o, ɔbabɔ sukulu ne anlenkɛ ne anu nwonlomɔ dɔne ngɔnla.

Kɛzi ɛsɔfoma mɔɔ ɛha la bule bɛ ɛkpɔlalɛ ne mɔ ɛ?

Menvɛlɛle bɛ kɛ bɛraboka yɛ debiezukoalɛ ne anwo, noko ɛnee bɛ nuhua biala anye ɛnlie nwo kɛ ɔbazukoa Baebolo ne. Noko mame, me nye liele nwolɛ. Ɛnee melɛsukoa ninyɛne mgbalɛ le kɛ deɛmɔti Nyamenle maa ɛtanelilɛ nee amaneɛnwunlɛ nwo adenle la​—ɛnee ɛhye le debie mɔɔ gyegye me mekɛ tendenle a.

Mgbanyima ne mɔ bɔle mɔdenle kɛ bɛmaa wɔagyakyi Baebolo ne ɛzukoalɛ ɔ?

Wɔ 1975 ne anu, mengɔle Rome fane dɔɔnwo kɛ mekahilehile mɔɔ melɛsukoa la anu. Mgbanyima ne mɔ bɔle mɔdenle kɛ bɛkakyi me adwenle, noko bɛ nuhua biala anva Baebolo ne anli gyima. Awieleɛ bɔkɔɔ ne, wɔ January 9, 1976, mengɛlɛle kɛlata mengɔle Rome na menganle kɛ megyakyi Kateleke asɔne ne. Ye kenle nwiɔ ne azo, menvile sukulu ɛkɛ na menvale keteke mengɔle Gyihova Alasevolɛ debiezukoalɛ ne bie wɔ mekɛ mɔɔ limoa la, ɛnee ɔle nyianu mɔɔ asafo dɔɔnwo ɛlɛbɔ nu ayɛ a. Ɛnee debie biala mɔɔ bɛyɛ la nee me ɛdeɛ ne le ngakyile kolaa! Ɛnee Dasevolɛ biala lɛ Baebolo yɛɛ bɛnea nu wɔ mekɛ mɔɔ tendɛvolɛma ne ɛlɛkilehile edwɛkɛ nu la.

Kɛzi wɔ abusua ne bule ɛhye mɔ amuala ɛ?

Bɛ nuhua dɔɔnwo dwazole tiale me kpalɛ. Noko, mendele kɛ me diema nrenyia ko nee Alasevolɛ ne mɔ sukoa debie wɔ Lombardy, mɔɔ wɔ Italy sɔlɔ la. Mengɔle ɔ nwo ɛkɛ, na Alasevolɛ mɔɔ wɔ ɛkɛ la boale me maanle menyianle gyima nee ɛleka mendɛnlanle. Nzinlii, bɛzɔnenle me kɛ Gyihova Dasevolɛ wɔ ɛvolɛ zɔhane anu.

Wɔnlu ɛ nwo kɛ ɛyɛlɛ zɔ la ɔ?

Kyɛkyɛ! Akee mete nganeɛ kɛ mebikye Nyamenle kpalɛ, ɔluakɛ ɔ nwo debie mɔɔ mezukoa la gyi Baebolo ne azo, na ɔngyi ewiade nrɛlɛbɛ anzɛɛ asɔne ngilehilelɛ bie azo. Na mekola mefa anwodozo mefi me ahonle nu mekilehile awie mɔ.