SAA dasanli bie yia sɔnea mɔɔ anu yɛ se na ye tieyɛ ne ɛnrɛmaa ɔnrɛnyia nwonane afoa nu nvasoɛ biala a, asoo ɔbahɔ zo yeali nɔhalɛ yeamaa Nyamenle? Nrenyia bie mɔɔ bɛfɛlɛ ye Dwobu la buale zɔhane kpuya ne wɔ mekɛ bie anu.

Mekɛ mɔɔ ɛnee Yizilayɛma ne tɛbɔ Yigyibiti la, ɛnee Dwobu mɔɔ ye busuanli a le Ebileham la de ɛleka mɔɔ ɛnɛ bɛfɛlɛ ye Arabia la. Mekɛ zɔhane ne anu, anwumabɔvolɛ ne mɔ hɔyiale wɔ Nyamenle anyunlu, na ɛnee atuadelɛnli Seetan wɔ ɛkɛ ne bie. Wɔ anwuma ɛlɔne ne anyunlu, Gyihova hilele kɛ ɔlɛ ye sonvolɛ Dwobu mɔɔ di nɔhalɛ la anu anwodozo. Nɔhalɛ nu, Gyihova hanle kɛ dasanli biala ɛnle ɛkɛ mɔɔ di nɔhalɛ kɛ Dwobu a. Noko Seetan hanle kɛ Dwobu sonle Nyamenle ɔluakɛ Nyamenle ɛyila ye na yebɔ ɔ nwo bane la ati ɔ. Seetan hanle kɛ saa bɛdie debie biala mɔɔ Dwobu lɛ la a ɔbadendɛ yeatia Nyamenle.

Nyamenle maanle Seetan adenle maanle ɔzɔle Dwobu ɔnleanle. Mɔɔ limoa, ye anwonyia vile ɔ asa, ɔ mra wule yɛɛ akee ɔ nwo dole ye. Ɛnee Dwobu ɛnnwu deɛmɔti Nyamenle ɛlɛmaa yeanwu amaneɛ zɛhae la. Ɛnee ɔnze ye kɛ Seetan a ɛlɛyɛ ye a. Noko akee, Dwobu amkpo Nyamenle.

Dwobu agɔnwo mɔ nsa mɔɔ ɛnli nɔhalɛ la rale ɔ nwo ɛkɛ. Bɛhɛlɛ edwɛkɛ mɔɔ bɛhehanle la wɔ Dwobu buluku ne anu. Bɛbɔle mɔdenle kɛ bɛmaa Dwobu alie ali kɛ yeyɛ ɛtane yevea yemɔti a Nyamenle ɛlɛtwe ɔ nzo la. Bɛhanle bɔbɔ kɛ Nyamenle anye ɛnlie ye sonvolɛma anwo yɛɛ ɔnlie bɛ ɔnli. Dwobu anlie bɛ adwenle ɛtane ne ando nu. Dwobu vale anwodozo hanle kɛ ɔbagyinla ye munlililɛ nu yeahɔ ewule nu!

Mɔdenle mɔɔ Dwobu bɔle kɛ ɔkile kɛ edwɛkɛ biala ɛnle ɔ nwo la maanle ɔyɛle nvonleɛ. Ɛlaehu mɔɔ le ekyi tɛla Dwobu nee ɔ gɔnwo mɔ na ɛnee ɔlɛtie bɛ edwɛkɛ ne bie la dendɛle. Ɛlaehu hwile Dwobu anyunlu na ɔmaanle ɔnwunle kɛ Gyihova Nyamenle tumililɛ ne mɔɔ ɔte nwolɛ la anwo hyia tɛla dasanli biala ɛdeɛ. Ɛlaehu hwile Dwobu agɔnwo mɔ nsa ne mɔɔ ɛnga nɔhalɛ la noko anyunlu ɛsesebɛ.

Akee Gyihova Nyamenle dendɛle hilele Dwobu na ɔdenrɛle ye adwenle ne. Gyihova luale ninyɛne dɔɔnwo mɔɔ yebɔ mɔɔ yɛ nwanwane la azo ɔmaanle Dwobu nwunle kɛ Nyamenle le kpole kpalɛ tɛla dasanli kolaa. Dwobu bɛlɛle ɔ nwo aze na ɔliele ɛdenrɛdenrɛlɛ ne ɔdole nu. Gyihova mɔɔ lɛ “ahunluyelɛyelalɛ yɛɛ ɔse anwunvɔne” la maanle Dwobu dele kpɔkɛ, ɔ sa hanle ye ninyɛne ne mɔ mɔɔ ɔvile ɔ sa ye la mɔnwo na eza ɔyilale ye ɔmaanle ɔwole mralɛ bulu. (Gyemise 5:11) Dwobu munlililɛ nu mɔɔ ɔgyinlanle ɔmaanle Gyihova wɔ sɔnea mɔɔ anu yɛ se anu la, buale Seetan ɛzonle mɔɔ ɔdole kɛ dasanli ɛnrɛhola ɛnrɛli nɔhalɛ ɛnrɛmaa Nyamenle saa ɔyia sɔnea mɔɔ anu yɛ se la a.

​—Ɔgyi Dwobu buluku ne azo.