Kumbi mukuwiya pani?

Ndikuwiya ku Italy mu 1943. Ini ndi aku wangu ŵaŵi limoza ndi mvurwa wangu kweniso azichi ŵangu, tingukuliya mutawuni yinyaki yimana ko ada agwiranga ntchitu yaulimi kweniso yaukalipentala. Apapi ŵidu ŵenga Akatolika ndipu nasi tingukuliya mwenumu.

Ntchifukwa wuli mungusankha kuja wasembi?

Ndeche mwana, ndakondwanga asani asembi apharazga. Ndakopekanga ndi mazu ngawu kweniso vo achitanga. So mtima wangu unguphanika kuja wasembi. Ndati ndakwanisa vyaka 13, ama anguchindipereka kusukulu yinyaki yakugone kweniko. Kusukulu iyi anyamata asambizikanga kuti azije asembi kunthazi.

Kumbi vo mwasambizikanga vatuliyanga mu Bayibolu?

Awa. Ndati ndakwanisa vyaka 15, musambizi wangu munyaki wangundipaska kabuku kanyaki ka Uthenga Wamampha. Mukabuku kenaka mwenga mbiri ndipuso uteŵeti waku Yesu. Ndinguŵerenga kabuku yaka maulendu ngananandi waka. Ndati ndafika vyaka 18, ndingwamba kusambira pamayunivesite nganyaki ngo ngalongozgeka ndi papa ku Rome. Kwenuku ndingusambira Chilatini, Chigiriki, mbiri, zeru za ŵanthu ndipuso vakukwaskana ndi chisopa. Chinanga kuti taloŵezanga mavesi nga mu Bayibolu kweniso tavwisiyanga Bayibolu lichiŵerengeka pa mapempheru pa Sabata peposi. Kweni kumayunivesite ngenanga tasambiranga vinthu va mu Bayibolu cha.

Kumbi mwasambizanga so ŵanthu Bayibolu mwati mwaja wasembi?

Awa, ntchitu yangu ukongwa yenga ya muofesi. Kweni nyengu zinyaki ndasambizanga so mumakilasi vakukwaskana ndi marangu ngo ngatuliya ku likulu lidu ku Vatican.

Ntchifukwa wuli mungwamba kukayikiya vo tchalitchi la Katolika lisambiza?

Pe vifukwa vitatu. Chakwamba ndinguwona kuti tchalitchi liselere mu ndali. Chachiŵi ndinguwona kuti lilekere mijalidu yiheni yo asembi ndi ŵanthu anyaki a maudindu achitanga. Kweniso chachitatu, ndakayikiyanga visambizu vinyaki. Mwakuyeruzgiyapu, kumbi vingachitika wuli kuti Chiuta wachanju walangi ŵanthu kumotu kwamuyaya? Kweniso kumbi mphakuvwika kuti Chiuta wakhumba kuti tipempherengi mapempheru ngakuwerezawereza ngo ngakwesa kulembeka? *

Sonu munguchitanji?

Ndingupemphera kwaku Chiuta kuti wandiwovyi uku masozi ngadika. Ndingugula so Bayibolu la Katolika la Jerusalem Bible, lo pa nyengu iyi ndipu latuwa waka mu chineneru cha ku Italy, ndipu ndingwamba kuliŵerenga. Zuŵa linyaki, pa Sabata ndi mlenji ndichinika mkhanju wangu, kunguza anthulumi ŵaŵi. Yiwu angundikambiya kuti Mbakaboni aku Yehova. Tingukambiskana kwa nyengu yitali fundu zo Bayibolu likamba zo zingatiwovya kuziŵa Akhristu auneneska.

Kumbi ntchinthu wuli cho chingukukondwesani ndi alendu ŵenaŵa?

Ŵanthu yaŵa ŵengavi mantha ndipu asuzgikanga cha kukonkhoska fundu za mu Bayibolu la Katolika. Pati pajumpha nyengu Kaboni waku Yehova munyaki zina Mario, wangwamba kundiyende. Iyu wachitanga nani vinthu mwakuzikira kweniso wenga wakugomezgeka, wazanga pa Sabata peposi 9 koloku mlenji kwali kwe lumwi pamwenga vuwa.

Kumbi asembi anyinu nawu asambirangaku?

Ini ndaŵadananga kuti asanirikengepu pa sambiru, kweni pengavi yo waŵikiyangapu mtima. Kweni ini ndakondwanga ukongwa ndi vo ndasambiranga. Ndasambiranga vinthu vapachanya limu nge vakuti ntchifukwa wuli Chiuta wazomereza vinthu viheni ndi masuzgu. Ndipu fumbu lenili lingundisuzga maŵanaŵanu kwa nyengu yitali.

Kumbi alongozgi ŵinu angukulekesani cha kusambira Bayibolu?

Mu 1975, ndinguluta ku Rome maulendu ngananandi waka kuti nkhaŵakambiyi maŵanaŵanu ngangu. Alongozgi widu anguyesesa kukambiskana nani, kweni pengavi yo wagwiriskiyanga ntchitu Bayibolu. Pakumaliya, pa 9 January 1976, ndinguŵaziŵisa ku Rome kuti ini ndatuwa Katolika. Pati pajumpha mazuŵa ngaŵi, ndingutuwaku kusukulu ko ndagwiranga ntchitu ndipu ndingukwera thireni kuti nkhasanirikepu kakwamba pa unganu wa Akaboni aku Yehova. Unganu uwu wenga unganu wa mipingu yakupambanapambana. Vinthu vo ndinguwona venga vakupambana ukongwa ndi vo ndinguziŵiliya! Kaboni weyosi wenga ndi Bayibolu ndipu wajulanga ndi kulondo asani wakukamba nkhani weyosi wakonkhoska.

Kumbi ŵanthu a mu banja linu anguvwa wuli?

Anandi angundisuska mwanthazi. Kweni ndinguvwa so kuti mvurwa wangu wasambira Bayibolu ndi Akaboni aku Yehova ku Lombardy, cha kumpotu kwa Italy. Ndinguluta kuchimuwona, ndipu Akaboni kwenuku angundiwovya kusaniya ntchitu ndipuso nyumba. Kukumaliya kwa chaka chenichi ndingubatizika ndi kuja Kaboni waku Yehova.

Kumbi muwona kuti mukusankha uheni?

Awa chinanga nkhamanavi! Sonu nditijivwa kuti nde paubwezi wamampha limu ndi Chiuta, chifukwa vo ndiziŵa vakukwaskana ndi iyu vituliya mu Bayibolu, penipo kali ndasambiranga waka zeru za ŵanthu ndipuso miyambu ya tchalitchi. Sonu ndingasambiza anyangu mwachiganga kweniso mwauneneska.