Адунеизегьтәи аӡхыҵра ду ииашаҵәҟьаны иҟалеит. Анцәа уи ауаа цәгьақәа ықәигарц азы иҟаиҵеит. Аха ауаа бзиақәеи, аԥстәқәеи, аԥсаатәқәеи еиқәирхарц азы иара Нои аковчег иргыларц иеиҳәеит (Аҟазаара 6:11—20). Ҳара Аӡхыҵра ду шыҟаҵәҟьаз агәра ҳзырго амзызқәа ҳамоуп, избанзар уи аӡбахә «Анцәа идоуҳа ацхыраарала иҩу» Иԥшьоу Аҩыраҿы иануп (2 Тимофеи 3:16).

•  Факту ихыҭҳәаау?

•  Изыҟалеи Аӡхыҵра ду?

•  Ирдыруазма ауаа Аӡхыҵра ду шыҟалоз?

•  Изеиԥшрази аковчег?

•  Шаҟа аамҭа дадхалеи Нои аковчег аргылара?

•  Аӡхыҵра ду иазку амифқәеи алегендақәеи

 Абиблиа ишаҳәо ала, Нои иҟаҵәҟьаз уаҩын, Аӡхыҵра дугьы хыҭҳәааӡамызт, уи иҟалаҵәҟьаз хҭысын.

•   Абиблиа зыҩуаз агәра ргон Нои иҟаҵәҟьаз ауаҩы шиакәыз. Иаҳҳәап, Абиблиа зыҩуаз иреиуаз, насгьы иҭоурыхҭҵааҩцәаз Ездреи Лукеи израильтәи ажәлар рабшьҭра анеиқәырыԥхьаӡоз, Нои иӡбахәгьы рҳәеит (1 Ашықәсынҵа 1:4; Лука 3:36). Матфеии Лукеи р-Евангелиеқәа рҿы Иисус Ноии Аӡхыҵреи ирызкны ииҳәаз ажәақәа анырҵеит (Матфеи 24:37—39; Лука 17:26, 27).

   Уи адагьы, аԥааимбар Иезекиильи апостол Павели ахаҵареи аиашареи ртәы анырҳәоз, Нои ҿырԥшыс дааргеит (Иезекииль 14:14, 20; Ауриацәа 11:7). Нои иҟамыз уаҩызҭгьы, дара ауаа иҿыԥшларц ргәазҭарҵозма? Ноии Анцәа изиашаз егьырҭ ахацәеи аҳәсеи иҟаҵәҟьаз уаан азоуп ҳара ҳзы изҿырԥшу (Ауриацәа 12:1; Иаков 5:17).

•   Абиблиаҿы иануп Аӡхыҵра ду иазку ииашоу аинформациа. Аӡхыҵра ду иазку аҭоурых алакәқәа реиԥш «анкьа зны, инхон-инҵуан» ҳәа иалагаӡом. Абиблиаҿы иануп Аӡхыҵра ду иадҳәалоу ахҭысқәа аныҟалаз ашықәсқәа, амзақәа, амшқәа (Аҟазаара 7:11; 8:4, 13, 14). Иара убас уа Нои иргылаз аковчег заҟароугьы арбоуп (Аҟазаара 6:15). Ари зегьы ишьақәнарӷәӷәоит Аӡхыҵра ду иҟалаҵәҟьаз ак шакәу, ишхыҭҳәаам.

 Абиблиа излаҳәо ала, Аӡхыҵра ду аԥхьа «ауаа рус ҟьашьқәа» адгьыл иахыҵәеит (Аҟазаара 6:5). Уи адагьы, «адгьыл Анцәа иҿаԥхьа акгьы иаԥсамкәа иҟалеит», избанзар ацәгьоурақәеи иламысдоу аусқәеи рыла иҭәит (Аҟазаара 6:11; Иуда 6, 7).

 Абиблиа иаҳәоит уи зыхҟьаз аҳәса ирыцышьҭаларц азы ажәҩан аҟынтә илбааз ицәгьоу амаалықьцәа шракәу. Дара аԥацәа — анефилимцәа — рхылҵит. Дара ауаа цәгьала идыргәаҟуан (Аҟазаара 6:1, 2, 4). Убри аҟынтә Анцәа иӡбеит адгьыл ацәгьара аҟынтә ирыцқьарц, насгьы ауаа бзиақәа уаҩҵас, ҭынч анхара алшара риҭарц (Аҟазаара 6:6, 7, 17).

 Ааи. Анцәа Нои иеиҳәеит Аӡхыҵра ду шыҟалоз, насгьы адҵа ииҭеит иҭаацәеи, аԥстәқәеи, аԥсаатәқәеи еиқәзырхоз аковчег иргыларц (Аҟазаара 6:13, 14; 7:1—4). Нои арыцҳара шыҟалоз ауаа ргәырҽаниҵон, аха дара изыӡырҩӡомызт (2 Пиотр 2:5). Абиблиа иаҳәоит «аӡы рыжәланы зегь ықәнахаанӡа акгьы ишазымхәыцуаз» (Матфеи 24:37—39).

 Аковчег еизыхәхәоу аиашьык ду иеиԥшын, аура 133 метра раҟара иҟан, аҭбаара — 22 метра раҟара, аҳаракыра — 13 метра раҟара a. Иара ҟаҵан акаҭран ҵла иалху амҿымаҭәахә ала, насгьы адәахьгьы аҩныҵҟагьы акаҭран ахьшьын. Аковчег х-еихагылак аман, уа еиҩкааны аҟәшақәа рацәаны иҟан. Аган аҿы ашә аҿан, хыхьтәи ахәҭаҿы аԥенџьырқәа ыҟазҭгьы ҟаларын. Ахыб агәҭа еиҳа маҷк иҳаракын аганқәа раасҭа, аӡы меизаларц азы (Аҟазаара 6:14—16).

 Абиблиаҿы ианӡам Нои шаҟа аамҭа дадхалаз аковчег аргылара, аха уи ажәашықәсақәа аҭаххазар ҟалап. Нои 500 шықәса инареиҳаны ихыҵуан иԥеиҳаб даниз, Аӡхыҵра аналага 600 шықәса ихыҵуан (Аҟазаара 5:32; 7:6) b.

 Нои аковчег аргыларазы адҵа аниоу, иԥацәа рыхҩык ахәса ааргахьан. Ус анакәха, раԥхьатәи иԥа дании ашьҭахь 50 — 60 шықәса раҟара ҵхьан (Аҟазаара 6:14, 18). Убри аҟынтә иаҳҳәар ҳалшоит аковчег аргылара 40—50 шықәса иадхалеит ҳәа.