Иҟалап иаалырҟьаны шәгәабзиара еицәахазар. Ус акәзар, ибзианы ижәдыруеит ачымазара шаҟа умч умнахуа, насгьы шаҟа аԥара аҭаху. Иҟашәҵар шәылшои шәхы шәацхраарц азы? Ичмазаҩхаз шәыуа ма шәҩыза иакәзар? Абиблиа медицинатә шәҟәӡам, аха уа иануп урҭ аамҭа цәгьақәа раан ишәыхәо апринципқәа.

•   Аҽыхәышәтәра шәалага

   Абиблиа иану: «Згәы бзиоу ракәӡам аҳақьым дызҭаху, ичмазҩу роуп» (Матфеи 9:12).

   Иаанаго. Иаҭаххар, аҳақьым иахь шәца.

   Иҟашәҵар шәылшо. Иалшәх шәымч зықәхо иреиӷьу ахәышәтәышьа. Зны-зынла даҽа ҳақьымк игәаанагарагьы еилукаар еиӷьуп (Ажәамаанақәа 14:15). Аҳақьым ииҳәаз ииашаны ишеилышәкааз, насгьы ишәыхьуа шшәыхьуа ак агмыжькәа ишизеиҭашәҳәаз агәра ганы шәыҟазароуп (Ажәамаанақәа 15:22). Шәчымазара иазку аинформациа ибзианы иҭышәҵаа. Еилышәкаа уи хәышәтәышьас иамоу аметодқәа зегьы. Иузыԥшу анудыруа, уи аҽазыҟаҵареи ииашоу аӡбарақәа рыдкылареи еиҳа имариоуп.

•   Шәгәабзиара иазеиӷьу ашьцыларақәа еизшәырҳала

   Абиблиа иану: «Абаҩрҵәыра ахәарҭа узаанагоит» (1 Тимофеи 4:8, аурыс).

   Иаанаго. Ашьцылара бзиақәа шәгәабзиара иазеиӷьуп.

   Иҟашәҵар шәылшо. Иааиԥмырҟьаӡакәа абаҩрҵәыра ҟашәҵала, шәгәабзиара иазеиӷьу афатә шәфала, шәызхара шәыцәала. Ҳәарада, шәчымазара шәҽашәырнаалароуп, аха уи мариаӡам. Аҳақьымцәа изларҳәо ала, ашьцылара бзиақәа реизырҳара аамҭеи аџьабааи рықәырӡра иаԥсоуп, уи алҵшәа бзиақәа аанагоит. Аха иҿыцу акы шәалагаанӡа, уи шәгәабзиара ишазеицәамхо, насгьы шәызҿу ахәышәтәра ишаԥырхагамхо агәра жәга.

•   Ишәырҭо ацхыраара мап ацәышәымклан

   Абиблиа иану: «Аҩыза бзиа ианакәзаалакгьы абзиабара ааирԥшуеит, иара арыцҳара аныҟало азы ииз иашьоуп» (Ажәамаанақәа 17:17).

   Иаанаго. Шәҩызцәа аншәыцу, аамҭа цәгьа ахгара еиҳа имариахоит.

   Иҟашәҵар шәылшо. Шәҩыза гәакьа шәхы шыжәбо иашәҳәа. Уи амч шәнаҭар алшоит. Шәҩызцәеи шәыуацәеи шәыцхраар рҭахуп, аха ишшәыцхрааша рзымдыруазар ҟалоит. Убри аҟынтә иаартны ирашәҳәа уажәы ишәҭаху. Дара рҟынтә мыцхәы шәазымԥшын. Ишәзыҟарҵо хәыҷызаргьы идузаргьы, ахә шәшьала. Аха убри аамҭазгьы ишәылшои ишәылымшои дырны, аҳәаақәа шьақәшәыргыл, ацхыраара шәызҭар зҭаху шәҩызцәа рҭаара шәамырааԥсарц азы.

•   Агәырӷьара шәмырӡлан

   Абиблиа иану: «Иҭгәырӷьаауа агәы — хәшәы бзиоуп, агәкаҳара акәзар, амч улнахуеит» (Ажәамаанақәа 17:22).

   Иаанаго. Агәырӷьара мырӡкәа, зегь шыбзиахо агәра жәгалар, ауадаҩрақәа шәыриааиуеит, агәҭынчрагьы шәоуеит.

   Иҟашәҵар шәылшо. Аҭагылазаашьа шәхы аншәырнаал, ишәылымшо акәымкәа, ишәылшо шәазхәыцла. Егьырҭ шәхы рыҿшәмырԥшлан, иара убас иахьатәи шәҭагылазаашьеи уаанӡа ишәымаз агәабзиареи еиҿшәмырԥшлан (Галатаа 6:4). Ишәзынагӡо ахықәкқәа ықәшәыргылала. Уи амч шәнаҭоит, шәхы ззышәкыр шәҭаххо аусқәагьы цәырҵуеит (Ажәамаанақәа 24:10). Излашәылшо ала ауаа ирыхәаша ак ҟашәҵала. Аӡәы уаницхраауа, агәырӷьара уоуеит, иҽеим ахәыцрақәагьы цәырҵӡом (Аусқәа 20:35).

 Абиблиа иҳаилнаркаауеит Иегова a ичмазаҩхаз ауаҩы дицхраар шилшо. Ҳәарада, џьашьахәыла схәышәтәхоит ҳәа ахәыцра иаԥсаӡам. Аха Анцәа бзиа дызбо ауаа ицхыраара иақәгәыӷыр рылшоит. Абар уи цхыраарас ириҭо.

 Агәҭынчра. Иегова ауаҩы ичымазара мыцхәы хьаас иҟаимҵаларц азы агәҭынчра ииҭар илшоит (Филиппаа 4:6, 7). Анцәа агәҭынчра риҭоит ацхырааразы иҳәо, зхьаақәа зегьы изеиҭазҳәо (1 Пиотр 5:7).

 Аҟәышра. Иегова ииашоу аӡбарақәа ҳадаҳкылаларц азы аҟәышра ҳаиҭар илшоит (Иаков 1:5) Аҟәышра аиура иҳацхраауеит аамҭа иԥнашәахьоу Абиблиа иану апринципқәа.

 Ԥхьаҟатәи аԥеиԥш иазку угәы шьҭызхуа агәыӷра. Иегова ҳақәиргәыӷуеит «сара сычмазаҩуп» ҳәа уаҳа аӡәгьы ианимҳәо аамҭа шааиуа (Исаиа 33:24). Ари агәыӷра ӷәӷәала ичмазҩугьы ргәы акамыжьра ирыцхраауеит (Иеремиа 29:11, 12).