Kinywala ki i Paddington, kabedo mo ma dano pol iye adada i London, lobo England. Onongo abedo ki mamana kacel ki lumegina adek madongo. Babana onongo pe bedo kacel kwedwa kare ducu pien onongo lamero adada.

I kare me tinona, mamana opwonya me lega dyewor ducu. Onongo atye ki Baibul mo matidi ma tye ki buk me Jabuli keken, dok atemme me wero lok ma i Jabuli awera calo wer. Wiya po lok mo ma akwano ki i buk mo ma omoko i wiya wa tin, lokke waco ni: “I nino mo diki bibedo pe.” Lok meno oweko nino orweny woko ki i wanga i dyewor meno, dok abedo ka tamo kit ma kwo me anyim bibedo kwede. Abedo ki tam ni: ‘Ki lok ada, kwo ducu dong kite pe en. Pingo atye kwo?’ Onongo pe amito to!

Acako bedo ki miti matek adada i kom tim tyet. Atemme me lok ki jo muto, cito kacel ki lutino kwan luwota i limu ka ma kiyiko iye jo muto, ki dong neno filim mogo ma kelo lworo i kom dano adada. Onongo watamo ni kadi bed ni keliwa lworo ento bene kelo yomcwiny.

Acako doko lajemo ma atye ki mwaka apar keken. Acako mato taa, dok i nge kare manok keken, onongo dong pe atwero bedo labongo mato taa. Lacen, acako mato jayi. Ma ao mwaka 11, onongo dong amato kongo. Kadi bed ni pe mit ki i doga, ento onongo amaro kit ma awinyo kwede ka amer. Onongo amaro wer ki myel. Abedo ka cito i pati ki ot myel i dyewor kare ki kare. Onongo alwii ki i ot i dyewor dok adwogo gang kwarpiny. Orwone, onongo pe acito i gang kwan pien nongo aol adada. Ento ka acito i gang kwan, onongo abedo ka mato kongo ka lapwony okato woko.

Atimo peny marac adada i mwaka me agikki. Mamana onongo pe ngeyo kit ma kita dong oballe kwede, dok cwinye otur adada i kare ma apoto peny. Wadaa ci angweco woko ki gang. Pi kare mo, abedo ka bedo bot Tony, awobi mo ma onongo awinye kwede. Tony onongo lakwor, cato yadi calo jayigi-ni, dok onongo kingeye ni latim gero. I nge kare manok, ayac woko ma atye ki mwaka 16 keken, dok anywalo latin awobi.

Arwatte ki Lucaden pa Jehovah pi tyen mukwongo i kare ma atye ka bedo ka ma kigwoko iye mon ma gunywal ma peya gunyomme kacel ki lutinogi. Luloc gumiya rum acel kunnu. Lucaden aryo ma mon onongo gimaro cito kunnu ka limo mege mogo. I nino mo, anywako i nyamo lokgi. Acito onongo ki miti me nyuto ni lok pa Lucaden pa Jehovah pe tye ada. Ento gugamo lapenya ducu ki cwiny ma opye mot kun gitiyo ki Baibul. Onongo gilukica dok gimwol adada, man ogudo cwinya adada. Pi meno, aye me kwano Baibul kwedgi.

I nge kare manok, apwonyo gin mo ki i Baibul ma oloko kwona. Nicakke ma atidi, onongo alworo to. Ento apwonyo lok ma Yecu owaco i kom nicer! (Jon 5:28, 29) Apwonyo bene ni Lubanga paro pira. (1 Petero 5:7) Lok ma tye i Jeremia 29:11 ogudo cwinya adada, lokke waco ni: “An keken aye angeyo yub ma atye kwede piwu, man Rwot ma owaco, yub me berbedo ento pe yub pi gin marac, yub pi kelo botwu kare me anyim ma wutye ki gen pire-ni.” Acako bedo ki niye ni atwero bedo ki gen me kwo pi naka i lobo Paradic.​—Jabuli 37:29.

Lucaden pa Jehovah gunyuta mar me ada. Ma acito i cokke pi tyen mukwongo, dano ducu gunyuta cwiny me lirem adada! (John 13:34, 35) Meno onongo dok pat adada ki kit ma kijola kwede i kanica mo acel ma acito iye. Lucaden gujola kadi bed kwona onongo pe ber. Gumiya kare, gukonya, gunyutta cwiny me kica, dok onongo giparo pira. Onongo awinyo calo atye i kin jo me ot mo ma gimarre i kingi.

Ki i kwanwa me Baibul, aniang ni omyero alok kwona wek orwatte ki rwom me kwo ma Lubanga cwako. Pe obedo yot me weko taa. Dok aniang bene ni wer mogo tugo cwinya me mato jayi, pi meno aloko kit wer ma awinyogi. Me gwokke ki mato kongo, ajuko cito i myel ki pati ka ma onongo yot adada me mato kongo. Ayenyo lirem manyen ma onongo gitwero konya me medde ki kwona manyen-ni.​—Carolok 13:20.

Ki tungcel, Tony bene onongo tye ka kwano Baibul ki Lucaden pa Jehovah. Lucaden gugamo lapenye ducu kun gitiyo ki Baibul, dok man oweko en omoko ni jami ma etye ka pwonyogi-ni obedo ada. En bene otimo alokaloka i kwone: oweko bedo ki luremme ma gimaro tim gero, ojuko kwor ki dong mato jayi. Me yomo cwiny Jehovah i yo me kwowa ducu, waniang ni omyero wawek tim tarwang dok wawek kwowa obed mupore pi dongo pa latinwa. Wanyomme i mwaka 1982.

Wiya po ni abedo ka yenyo pwony mogo ma okati i Wi Lubele ki Awake! * ma tito lok i kom jo mogo ma gutimo alokaloka ma an bene onongo amito timogi-ni. Lanengi ocuko cwinya adada! Omina kero me medde ki tute matek labongo ilo cinga. Abedo ka lega kare ducu bot Jehovah wek pe oil cinge i koma. An ki Tony wanongo batija macalo Lucaden pa Jehovah i mwaka 1982.

Doko larem Jehovah olaro kwona. An ki Tony bene waneno kit ma Jehovah okonyowa kwede i kare ma kwo tek. Wapwonnye me jenge i kom Lubanga i kare me peko, dok wangeyo ni en okonyowa dok ogwokowa kare ducu.​—Jabuli 55:22.

Abedo ki yomcwiny me pwonyo woda ki nyare me ngeyo Jehovah bene. Dok atye ki yomcwiny me neno ka lutinogi bene gitye ka dongo ngecgi i kom Lubanga.

Wanga dong pe bedo twolo i dyewor ka paro ngo ma bitimme i anyim nyo lworo to. An ki Tony wacwalo cawa malac me limo kacokke mapatpat pa Lucaden pa Jehovah cabit ducu wek wacuk cwinygi. Wanywako kacel kwedgi i pwonyo jo mukene ni ka guketo niye i kom Yecu, ci gin bene gitwero nongo kwo ma pe tum.