Go kong ni wego mo tye ka lok ki wode ma tye mwaka abiro. Ci en owacci, “I kare mo mukato angec, Lubanga ocweyo lobo ki jami ducu ma tye iye, dok en ocweyo ceng, dwe ki lakalatwer.” Wode otamo lok meno pi dakika mo manok ci openyo wonne ni, “Baba, anga ma ocweyo Lubanga?”

Wonne ogamo ni “Ngat mo pe ocweyo Lubanga. En obedo tye nicakke wacon.” Latin awobi-ni oyeng ki lagam pa wonne pi cawa meno. Ento ka en woto ki dongo, lapenye-ni pud medde ki nyweno wiye. En nongo ni tek me ye ni ngat mo twero bedo labongo acakkine. Kadi wa lobo ki jami ma i dan polo tye ki acakkigi. En ocako pennye ni: ‘Lubanga oa ki kwene?’

Baibul gamo nining? Lagam ma Baibul miyo cok rom ki pa wego ma i lapor-ri. Moses ocoyo ni: ‘In Lubanga ma bedo nakanaka; ma pud peya iketo godi ki lobo, onongo in dong itye.’ (Jabuli 90:1, 2) I yo acel-li, lanebi Icaya owaco ni: ‘Pud pe wungeyo bo? Yam peya wuwinyo? Rwot en Lubanga ma bedo nakanaka en aye ma oketo wi lobo ducu.’ (Icaya 40:28) Waraga pa Juda bene oloko i kom Lubanga ni: “Cakke ma peya giketo lobo, nio koni, ki kare ma pe gik” onongo Lubanga dong tye.​—Juda 25.

Wang Baibul magi nyuto ni Lubanga aye “Kabaka ma loyo kare ducu,” kit ma lakwena Paulo owaco-ni. (1 Temceo 1:17) Man nyuto ni kare ducu onongo Lubanga dong tye, kadi bed wadwok tamwa angec wa lakwene. Dok en pud bibedo tye wa i anyim. (Niyabo 1:8) Dong Lubanga opore me bedo Won Twer Ducu pien en bedo nakanaka.

Pingo wanongo niang i kom lok man tek? Pien mwaka me kwowa nok adada ka kiporo ki pa Jehovah, dok man weko niangowa i kom kare ki cawa pat adada ki mege. Ki bot Lubanga mwaka alip acel rom ki nino acel, pien en bedo nakanaka. (2 Petero 3:8) Me laporre: Tika otwongo nyo ocene ma bedo kwo pi nino 50 keken-ni twero niang kit ma dano twero kwo kwede pi mwaka 70 nyo 80? Pe twere! Baibul waco ni warom aroma ki ocene ka kiporowa ki Lacwecwa. Kadi niangowa bene nen lam alama ka kiporo ki niango pa Lubanga. (Icaya 40:22; 55:8, 9) Dong pe tye me ur ni dano pe twero niang maber tutwal jami mogo madok i kom Jehovah.

Kadi bed twero bedo tek me niang ni Lubanga acakkine pe, ento pud watwero nenone ni lok meno rwatte. Kono onongo tye ngat mo ma ocweyo Lubanga, onongo ngat meno bibedo Lacwec. Ento Baibul waco ni Jehovah aye ma ‘oketo [nyo ocweyo] jami ducu.’ (Niyabo 4:11) Medo i kom meno, wangeyo ni lobo ki jami ma i dan polo onongo kong gipe i kare mo mukato angec. (Acakki 1:1, 2) Gucako bedo tye nining? Ngat mo ma ocweyogi onongo kong myero obed tye. Kadi wa ma peya Lubanga ocweyo cwec ma tye ki ryeko calo Wode acel keken ki lumalaika onongo en dong tye. (Yubu 38:4, 7; Jo Kolocai 1:15) Dong nen ka maleng ni Lubanga onongo tye kene i acakki. Pe kicweye acweya; gin mo onongo pe ma twero cweye.

Dano kacel ki jami ducu ma i polo ki lobo gimoko ni Lubanga ma bedo nakanaka tye. En aye ma oweko lobo ki jami ma i dan polo gibedo ka wire awira, dok En aye ma oketo cik ma dorogi. En keken aye ma okuto yamo me yweyo i um gin ducu makwo.​—Yubu 33:4.