PWONY ME 12

In Itwero Nyikke Cok Bot Lubanga Nining?

TUKI

1. Lubanga tika winyo lega ducu?

Jehovah lwongo dano me rok ducu ni gunyikke cok bote i lega. (Jabuli 65:2) Ento en pe winyo, nyo gamo, lega ducu. Me lapore, lega pa laco ma uno dakone, Lubanga pe bijolone. (1 Petero 3:7) Dok bene, i kare ma Luicrael gubedo ka timo jami maraco, Lubanga okwero winyo legagi. Nen ka maleng ni, lega obedo mot. Ento, Lubanga gire winyo lega pa lutim bal madongo ka gungut.—Kwan Icaya 1:15; 55:7.

2. Omyero waleg nining?

Lega obedo but worowa, pi meno omyero waleg bot Jehovah, Lacwecwa keken. (Matayo 4:10; 6:9) Kit macalo watye ki roc-ci, omyero waleg i nying Yecu pien en aye oto pi balwa. (Jon 14:6) Jehovah pe mito ni wanwo lega ma wamako i wiwa nyo ma nongo kicoyo i buk. En mito ni waleg lega ma oa ki i cwinywa.—Kwan Matayo 6:7; Jo Pilipi 4:6, 7.

Lacwecwa twero winyo kadi wa lega ma kilego lalingling. (1 Camuel 1:12, 13) En mito ni waleg kare ki kare calo i odiko, otyeno, i cawa me cam, ki dong ka watye i peko.—Kwan Jabuli 55:22; Matayo 15:36.

3. Pingo Lukricitayo gicito i cokke?

Nyikke cok bot Lubanga pe yot pien wakwo i kin jo ma gipe ki niye i kom Lubanga, dok gingalo cikkene me kelo kuc i lobo. (2 Temceo 3:1, 4; 2 Petero 3:3, 13) Pi meno, wamito cuko cwiny ki bot luye luwotwa, dok gin bene gimito ni wacuk cwinygi.—Kwan Jo Ibru 10:24, 25.

Mako lirem ki jo ma gimaro Lubanga konyowa me nyikke cok bot Lubanga. Cokke pa Lucaden pa Jehovah miniwa kare me nongo adwogi maber ki i niye pa jo mukene.—Kwan Jo Roma 1:11, 12.

4. In itwero nyikke cok bot Lubanga nining?

Itwero nyikke cok bot Jehovah ka ilwodo lok i kom gin ma ipwonyo ki i Lokke. Lwod lok i kom ticce, tirane kacel ki cikkene. Lega ki lwodo lok miyo wadongo pwoc ma a ki i cwinywa pi mar ki ryeko pa Lubanga.—Kwan Yocwa 1:8; Jabuli 1:1-3.

Itwero nyikke cok bot Lubanga ka ce igeno en, dok itye ki niye i kome. Ento niye gire obedo calo gin makwo dok mito agwoka. Omyero ibed ka teno kor niyeni kun ilwodo lok i kom jami ma ipwonyogi.—Kwan Matayo 4:4; Jo Ibru 11:1, 6.

5. Adwogi maber ango ma inongo ka inyikke cok bot Lubanga?

Jehovah paro pi jo ma marre. En twero gwokogi ki i kom gin mo keken ma romo balo niyegi nyo gengogi me nongo kwo ma pe tum. (Jabuli 91:1, 2, 7-10) En ocikowa i kom yo mogo me kwo ma twero balo yotkomwa kacel ki yomcwinywa. Jehovah pwonyowa ki yo me kwo ma pud dong ber loyo.—Kwan Jabuli 73:27, 28; Yakobo 4:4, 8.