Kicika ma i doggola onongo obedo ka ma kidonyo ki iye me cito i Kabedo Maleng me ot pa Lubanga. Baibul me New World Translation of the Holy Scriptures ma kigoyo ma peya mwaka 2023 oromo, waco ni “kicika ma i doggola me donyo ma i nyim kicika me ot lacce romo kubit 20, ma rom ki lac me ot maditte; borre malo romo kubit 120.” (2 Tekwaro 3:​4, NWT) Baibul mukene bene waco ni kicika ma i doggola me donyo onongo borre malo tye “kubit 120,” ma meno tyen lokke ni borre malo romo mita 53 (futi 175) kulu!

Ento, ma lubbe ki Baibul me leb Muno me New World Translation ma kigoyo i 2023, kicika ma i doggola me donyo me ot pa Lubanga ma Solomon ogero, “borre malo onongo romo kubit 20,” nyo mita 9 (futi 30). a Nen kong tyen lok mogo manok ma omiyo kitimo alokaloka man.

Bor pa kicika ma i doggola me donyo pe kiloko iye i 1 Luker 6:3. I tyeng man, lanebi Jeremia ocoyo borre ki piny ento pe borre malo. Ci i cura ma lubo, en otito kore ki kore jami ma pigi tego ma i ot pa Lubanga calo, Nam me mola, litino gadigadi apar, kacel ki wir me mola aryo ma gicung ki woko i nyim kicika me doggola me donyo. (1 Luker 7:​15-37) Ka ada kicika me doggola me donyo onongo borre malo kato mito 50 dok kato wi ot pa Lubanga woko, ci pingo Jeremia pe otito pi borre malo? Kadi wa i nge mwaki miya mapol lacen, lucoc me tekwaro pa Lujudaya gucoyo ni kicika me doggola me donyo onongo pe bor kato wi ot pa Lubanga ma Solomon ogero.

Lukwan mogo gitye ki akalakala kace onongo twerre me gero kicika me donyo ma borre malo romo kubit 120 kulu i kom kor ot pa Lubanga. Odi mogo maboco ma kigero ki godi ki matafali i kare macon, me labolle kicika me donyo i odi pa lubange me Ejipt, onongo tere bedo malac dok wiye ridde bedo matidi. Ento ot pa Lubanga ma Solomon ogero onongo dok pat. Lukwan mogo giwaco ni kinong me kor ot pa Lubanga onongo pe kato kubit 6, nyo mita 2.7 (futi 9). Lacoc mo ma coyo lok i kom gedo me kare macon ma nyinge Theodor Busink owaco ni: “Ma lubbe ki kinong me kor ot [me nyim ot pa Lubanga], pe twere me gero kicika me doggola me donyo ma borre romo kubit 120 kulu.”

Twero bedo ni coc ma nonge i 2 Tekwaro 3:4 pe kikobo kakare. Kadi bed ni coc mogo ma kicoyo ki cing me kare macon waco ni “kubit 120” i tyeng man, coc mogo ma kigeno adada, me labolle Codex Alexandrinus ma kicoyo mwaki makato 1,500 angec ki Codex Ambrosianus ma kicoyo mwaki makato 1,400 angec waco ni “kubit 20.” Pingo romo bedo ni lakob coc cinge ocer ci ocoyo ni “120”? Nyig lok me leb Ibru ma kicoyo ni “miya” mito bedo rom adada ki “kubit.” Pi meno, onongo twero bedo yot adada pi lakob coc me coyo ni “miya” me ka coyo ni “kubit.”

Ngene kene ni, kadi bed watute me niang lok magi kacel ki nyuto cal ot pa Lubanga ma Solomon ogero kit ma onongo nen kwede kikome, waketo cwinywa tutwalle i kom gin ma ot pa Lubanga cung pire—ma en aye ot pa Lubanga i yo me cwiny. Pud dong watye ki pwoc madit ya, ni Jehovah olwongo luticce ducu me wore i ot meno!—Ibru 9:​11-14; Yabo 3:12; 7:​9-17.