KWO i kare-ni pe tye kit ma Lubanga onongo mito ni obed kwede. En onongo mito ni lobo-ni opong ki jo ma giworo twero me loc pa Lacwec, kun ginongo adwogi maber ki i tirane, dok ginyuto kite me mar. Onongo myero gunote ki dano luwotgi ka giwoto ki gwoko lutinogi, pwonyo jami manyen, ki loko lobo ducu wek odok paradic.

• ‘En bijuko lweny woko i wi lobo ducu.’​—Jabuli 46:9.

• ‘Kare oromo me . . . neko jo ma tye ka balo lobo woko.’​—Niyabo 11:18.

• “Pe tye dano mo ma bedo i lobowa ma biwaco ni, ‘An koma lit.’”​—Icaya 33:24.

• “Jona ma an aye ayerogi gibibilo tic me cinggi pi kare malac.”​—Icaya 65:22.

Lok pa lunebi magi bicobbe nining? Lubanga oketo Wode, Yecu macalo Kabaka ma loyo gamente mo ma roc pe iye ma biloc ki i polo kun loyo wi lobo. Baibul lwongo gamente man ni Ker pa Lubanga. (Daniel 2:44) Baibul loko kit man i kom Yecu: ‘Lubanga bimiye komker. . . . En biloc calo kabaka.’​—Luka 1:32, 33.

I kare ma Yecu tye i lobo, en otimo tango mapol me nyuto ni i kare ma en biloyo lobo, en biweko kwo pa dano bedo maber loyo kit ma tye kwede i kare-ni.

• En ocango kit two ducu, me nyuto kit ma en bikwanyo kwede two ki goro ducu ki i kom dano.​—Matayo 9:35.

• En ojuko yamo magwar ma onongo tye ka twago pii, me nyuto kit ma en bigwoko kwede dano kun doro teko pa ginacweya ducu.​—Marako 4:36-39.

• En opito dano alip mapol, me nyuto ni ebimiyo jami ducu ma mitte pi kwo.​—Marako 6:41-44.

• En oloko pii odoko kongo vino i ka nyom mo, me nyuto ni ebikonyo dano me bedo ki yomcwiny.​—Jon 2:7-11.

Itwero nongo kwo maber man ma Lubanga tye ka yubo pi jo ma gimare nining? Tye gin mo ma omyero itim. Baibul waco ni omyero inong “yo ma tero dano i kwo, dok jo ma nongo yo meno ginok.”​—Matayo 7:14, NW.

Yo ma tero dano i kwo obedo ngo? Lubanga otito ni: “An a Rwot [Jehovah] Lubangawu amito pwonyowu wek wubed maber, kun atelowu i yo ma myero wuwot iye.” (Icaya 48:17) Lubo yo man aye obedo kit me kwo ma pud dong ber loyo.

Yecu owaco ni: “An a yo, ki ada, ki kwo.” (Jon 14:6) Ka watimo gin ma Yecu owaco dok walubo  lanene, wabinyikke cok ki Lubanga dok kwowa bidoko maber.

Itwero nongo yo ma tero dano i kwo nining? Tye dini mapol adada, ento Yecu ociko ni: “Pe dano ducu ma gilwonga ni, ‘Rwot, Rwot’ aye gibidonyo i ker me polo, ento ngat ma tiyo gin ma Wora ma i polo mito.” (Matayo 7:21) En bene owaco ni: “Wubingeyogi i kom kitgi.” (Matayo 7:16) Baibul twero konyi me ngeyo dini me ada ki pokone ki dini goba.​—Jon 17:17.

Itwero lubo yo ma tero dano i kwo nining? Man kwako ngeyo Ngat ma omiyo kwo bot dano ducu: En obedo anga? Nyinge nga? Kite tye nining? Ngo ma en tye ka timone piwa? Ngo ma en mito ni watim? *

Lubanga onongo pe mito ni dano oti tic, ocam, otuk tuko, dok onywal lutino keken. Watwero ngeyo Lacwecwa dok wadoko lureme. Watwero nyuto ni wamare ki timo mitine. Yecu owaco ni: “Man en kwo ma pe tum, ni ginge in Lubanga acel me ada.”​—Jon 17:3.

Pwonyo kit me yomo cwiny Lubanga acel me ada twero mito ni watim alokaloka mogo i kwowa. Man twero nen calo gin matek. Ento i adane, kwowa bidoko ber mada ka wacako wot i yo ma tero dano i kwo. Me konyi wek inong lagam pi lapenyi madok i kom Lubanga, Lucaden pa Jehovah gitye ki yub me kwano Baibul labongo cul mo, i cawa ki kabedo ma opore piri. Itwero kubbe kwedwa kun itiyo ki kabedowa me Intanet me www.mt1130.com./ach.