Lubanga ocweyo komwa ki kero me cang maber adada. Ka ngat ma kome yot onongo ret, kome “cako yubbe me cango wang bwur meno kadi bed bwure dit nyo tidi.” (Johns Hopkins Medicine) Kom ngat meno cutcut cako juko cwer pa remo, nyayo ler bedo malac dok jingo weko bedo matek.

TAM KONG: Ka Lacwecwa oyubo komwa ki kero me cango wang bwur, ci watwero bedo ki gen i kom cikkene me konyowa wek wacang ka watye ki arem i cwinywa, pe kumeno? Laco jabuli owaco ni, “En cango jo ma cwinygi cwer, dok tweyo wang retgi woko.” (Jabuli 147:3) Ka itye ki arem i cwinyi, macalo adwogi pa gin mo mutimme i kwoni i kare mukato angec nyo i kare-ni, ci ngo ma romo miyo ibedo ki tekcwiny ni Jehovah bitweyo wang reti woko​—i kare-ni ki i kare me anyim?

Lubanga ocikke ni: “Pe ilwor, an atye kwedi, cwinyi pe opoti, pien an Lubangani; abimiyi tek, dok abikonyi.” (Icaya 41:10) Dano ma ngeyo ni Jehovah paro pire bedo ma wiye opye mot dok bedo ki kero me lweny ki pekki mapatpat. Lakwena Paulo olwongo cwiny ma opye mot kit man ni “kuc pa Lubanga ma kato ngec pa jo ducu.” Paulo omedo ni: ‘Atwero jami ducu liweng pi teko ma en miya.’​—Jo Pilipi 4:4-7, 9, 13.

Ginacoya konyowa me dongo niye i kom cikke pa Jehovah pi kwo me anyim. Me labolle, Niyabo 21:4, 5 tittiwa gin ma en bitimo ki dong tyen lok mumiyo watwero genne:

• “En bijwayo pig wanggi woko ducu.” Jehovah bikwanyo pekki ki parwa ducu, kadi bed ma jo mukene gineno calo tidi.

• “Ngat ma obedo i wi komker” i polo, ma en aye Kabaka Won Twer Ducu ma loyo wi ginacweya, bitic ki teko kacel ki twerone me giko pekki kun miyowa kony ma mitte.

• Jehovah cuko cwinywa ni cikkene ducu obedo “lok ma genne dok me ada.” Man tyen lokke ni, Jehovah omoko lok man kun jenge i kom nyinge kacel ki kite macalo Lubanga me ada.

“En bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal. Ci ngat ma obedo i wi komker owacci, ‘Nen, aketo jami ducu doko nyen.’ Ka dok bene owacci, ‘Co lok man, pien lok magi lok ma genne dok me ada.’”​—Niyabo 21:4, 5.

Cwec ma i wi polo ki lobo ma wanenogi ki wangwa kacel ki Baibul nyuto botwa kit pa Lubanga. Kadi bed ginacweya tugo cwinywa me doko lurem Lubanga, ento Baibul tito botwa lwongo pa Lubanga ka maleng ni: “Wunyik cok bot Lubanga, ci en bene binyiko cok botwu.” (Yakobo 4:8) Tic pa Lukwena 17:27 waco ni: “En pe tye cen ka mabor ki bot ngat acel acel i kinwa.”

Ka ikwanyo kare me ngeyo Lubanga, ci ibimoko ada ni ‘en paro piri.’ (1 Petero 5:7) Adwogi maber ango ma wanongo ka wageno Jehovah i yo ma kit man?

Nen kong ngo mutimme i kom omego Toru, ma a ki Japan. En odongo i cing minne ma Lakricitayo, ento lacen odonyo i gurup pa lutim aranyi me Japan ma kilwongogi ni yakuza. En owaco ni, “Onongo atamo ni Lubanga daga adada, dok onongo awinyo calo to pa jo ma oruma, tutwalle jo ma amarogi tye calo pwod ma Lubanga omina.” Toru otito ni kwo marac pa jo ma onongo ebedo i kingi kacel ki tamme marac-ci oweko edoko “ngat ma cwinye col ma pe paro pi dano.” Madok i kom mitine en otito ni, “Onongo amito ni ato ma pud atidi i nge neko ngat mo muywek loya, wek nyinga bene oywek.”

Ento, i kare ma Toru gin ki dakone Hannah gukwano Baibul, Toru oloko kwone ki tamme i yo me aura. Dako pa Toru owaco ni: “Aneno ki wanga kit  ma Baibul okelo alokaloka i kwo pa cwara.” I kom kare-ni Toru waco labongo akalakala mo ni: “Watye ki Lubanga ma paro piwa adada ki acel acel. En pe mito ni dano mo oto, dok en tye atera me timo kica ki ngat mo keken ma ongut i kom balle. En winyo legawa pi jami ma pe watwero wacone bot ngat mo keken dok ngat mo pe twero niang. Ma pe otero kare malac, Jehovah bikwanyo pekkiwa ducu kacel ki jami ma cwero cwinywa. Kadi wa i kare-ni, en tye ka konyowa i yo ma pe watwero byekone. En marowa dok konyowa ka watye ma goro.”​—Jabuli 136:23.

Kit ma gin mutimme i kom Toru nyuto kwede, bedo ki ngec ni Lubanga twero​—dok cokcok-ki bikwanyo pekki kun jwayo pig wang dano ducu, miyowa gen me ada pi anyim dok bene konyowa me kwo kwo maber i kare-ni. Ada, kadi wa i lobo ma opong ki pekki, pud itwero nongo adwogi maber ki i mar pa Lubanga.