“Nen, Atye Kwedwu”
“Nen, Atye Kwedwu”
‘Jo mapol gibibedo ka wirre tungi ki tungi, ki ngec [me ada] bene bimedde.’—DAN. 12:4.
IN IROMO GAMONE NINGO?
Dero oryeny i kom “ngec [me ada]” nining i kare-ni?
Wel jo ma gujolo lok me ada omedde “mapol” nining?
I yo macalo mene ma ngec matir ‘omedde’ kwede?
1, 2. (a) Wangeyo nining ni Yecu tye kwedwa i kare-ni ki bene bibedo kwedwa i kare me anyim? (b) Ma lubbe ki Daniel 12:4, adwogi ango ma bino ka wakwano Ginacoya i yo matut?
GO NI itye i Paradic. Nino ducu ico odiko ma nongo cwinyi yom dok itye atera pi nino meno. Pe itye ki arem mo keken. Goro ki lugaga mogo ma onongo yam yeli con-ni dong gipe. Ineno piny, ingweyo jami, iwinyo lok maber, ki dong dogi ye cam—dul komi ducu gitiyo maber. Itye ki kero muromo, inongo mit pa ticci, luremi pol ata, dok bene ipe ki par mo keken. Magi aye mot ma ibilimogi i te Ker pa Lubanga. Kricito Yecu ma tye Kabaka ma kicimo-ni, bigoyo laa i kom jone ci pwonyogi ki lok pa Jehovah.
2 Jehovah bikonyo jone ma gin lugen ka nongo gitye ka tiyo tic me pwony man ma bitimme i twok lobo ducu-ni. Lubanga gin ki Wode gukonyo jo ma lugen pi cencwari mapol. Ma peya odok i polo, Yecu ojingo cwiny lupwonnyene ni etye kwedgi kare ducu. (Kwan Matayo 28:19, 20.) Wek wabed ki niye matek i kom cikke pa Yecu-ni, kong wanyamu lok mo acel ma Daniel ocoyo wacon ki i Babilon mwaki makato 2,500 angec. Ma lubbe ki “kare me agik[ki]” ma watye ka kwo iye-ni, lanebi Daniel ocoyo ni: ‘Jo mapol gibibedo ka wirre tungi ki tungi, ki ngec [me ada] bene bimedde.’ (Dan. 12:4) I kare ni, ka kiwacci ‘wirre tungi ki tungi’ waniang ni obedo kwan i yo matut kun iketo cwinyi iye. Kwan ma kit meno pud dong kelo adwogi mapol! Jo ma gikwano Ginacoya i yo matut gibinongo ngec me ada ma a ki i Lok pa Lubanga. Lok pa Daniel-li bene wacci jo mapol gibijolo “ngec [me ada].” Inongo bene ni ngec ma kit meno bimedde. Ngecci kibipokone i twok piny ducu. Ka wanyamo kit ma lok pa lanebi-ni ocobbe kwede, wabinongo ni Yecu kara pud tye ka konyo lukwenane i kare-ni dok ni Jehovah tye ki kero me cobo jami ma en ocikke ni ebitimogi.
DERO ORYENY I KOM “NGEC [ME ADA]”
3. Gin ango mutimme i kom “ngec [me ada]” i nge to pa lukwena?
3 I nge to pa lukwena, kitito ni jo mungak gibia ki i kin Lukricitayo me ada ci ginya calo mac. (Tic. 20:28-30; 2 Tec. 2:1-3) Pi mwaki miya mapol, “ngec [me ada]” onongo pe i kin jo ma pe gingeyo lok me Baibul kadi wa jo ma giwacci gibedo Lukricitayo. Kadi bed gikette ni gingeyo Ginacoya, lutela dini pa Lukricitayo ata-ni gubedo ka pwonyo lok goba—“pwony pa cen maraco” ma pe keto deyo i kom Lubanga. (1 Tem. 4:1) Dano lung gubedo i col piny i yo me cwiny. Pwony pa jo mungak-ki onongo kwako pwony goba calo ni Lubanga obedo Triniti, gin mo ma pe to tye i kom dano, ki dong ni jo mukene kiwangogi i mac me kapiny pi naka.
4. I mwaka 1870 ki wiye, gurup pa Lukricitayo mo manok gucako yenyo “ngec [me ada] nining?
4 Ento, i mwaka 1870 ki wiye, mwaki 40 ma peya “kare me agikki” ocakke iye—gurup pa Lukricitayo mo manok ma gitye lugen i Pennsylvania, U.S.A., gucokke kacel ci gucako kwano Baibul i yo matut kun giyenyo “ngec [me ada]” kore ki kore. (2 Tem. 3:1) Gubedo ka lwonge ni Lutino Kwan me Baibul. Magi pe gubedo “luryeko ki lunge-piny” ma Yecu onongo owacci kibikano ngec woko ki botgi-ni. (Mat. 11:25) Lutino kwan magi onongo pe gikette ento gitye ki cwiny me timo miti pa Lubanga. Lutino Kwan me Baibul-li gukwano Baibul ki diro, gunyamo, gulwodo lok i kom Ginacoya, dok gulego pi tira pa Lubanga. Guporo bene tyeng mogo me Baibul kun gingiyo bukke pa jo mukene ma gubedo ka yenyo lok me ada ki i Baibul. Motmot, Lutino Kwan magi me Baibul-li guniang lok me ada ma onongo kikano woko pi mwaki miya mapol ata-ni.
5. Pingo kicoyo trak me The Old Theology?
5 Kadi bed ni Lutino Kwan me Baibul-li cwinygi obedo yom pi ngec ma gitye ka pwonyone-ni, man pe omiyo gubedo ki awaka; gin pe gucako titone bot jo mukene ni ginongo ngec manyen. (1 Kor. 8:1) Ma ka meno, gin gucoyo trak mapol ma wi lokke tye ni The Old Theology. Kicoyo trak magi me konyo dano wek guniang lok me ada ma nonge i Baibul. Trak ma kikwongo coyone kicoyo me konyo jo ma gikwano Baibul me kwero “lok me tekwaro ma dano gipwonyo” kun gijolo pwony me ada pa Yecu kacel ki pa lukwenane.—The Old Theology, Nam. 1, April 1889, pot 32.
6, 7. (a) Cakke i mwaka 1870 ki wiye, lok me ada mene ma kikonyowa me niang iye? (b) Lok me ada mene ma dong yomo cwinyi adada?
6 Pi mwaki 100 kulu, ma Lutino Kwan manok me Baibul gucakke kwede, dero dong otyeko ryeny i kom ngec me ada! * Lok ada magi pe gubedo lok me tuko, ma myero lupwonye dini gubed ka larone. Lok ada magi giyomo cwiny, giyubo kwowa dok gikeliwa gen. Gikonyowa me ngeyo Jehovah—marre kacel ki yubbe. Gititiwa tic pa Yecu, gin mumiyo en obino i lobo ci oto, ki dong gin ma en tye ka timone kombeddi. Lok ada magi ma pigi tego-ni ginyuto gin mumiyo Lubanga oweko tim maraco tye, gin mumiyo wato, kit ma myero waleg kwede, ki kit me nongo yomcwiny me ada.
7 Man dong miyo watwero niang lok mapol pa lunebi ma “giumo” pi mwaki alip ki alip ento dong gitye ka cobbe i kare man me agikki-ni. (Dan. 12:9) Lok magi pa lunebi-ni ginonge i Ginacoya, dok ginonge tutwalle i Jiri ki buk me Niyabo. Jehovah bene okonyowa me niang jami ma pe waromo nenogi—keto Yecu i kom Ker, lweny ma obedo i polo, ki dong bolo Catan piny i lobo kany. (Yabo. 12:7-12) Lubanga bene oweko waromo niang gin mumiyo jami magi gitimme—lweny, oyengyeng, two gemo, kec, kacel ki jo ma kitgi raco ma guweko kwo tek i kare man ma ‘piny rac-ci.’—2 Tem. 3:1-5; Luka 21:10, 11.
8. Wadwoko pwoc bot anga pi jami ma waneno dok wawinyogi-ni?
8 Yecu owaco bot lupwonnyene ni: “Tye ki gum [yomcwiny], dano ma neno gin ma wun wuneno! Pien atittiwu ni, lunebi ki luker mapol yam guparo pi neno gin ma wun wuneno, ento pe guneno, ki winyo gin ma wun wuwinyo, ento pe guwinyo.” (Luka 10:23, 24) Wan bene wawinyo kit meno i kare-ni. Lubanga Jehovah aye oweko twere botwa me “neno” ki “winyo,” nyo niang lok me ada. Dok bene cwinywa yom adada ni “lacungudwar,” cwiny maleng pa Lubanga, kicwalo wek okony lulub kor Yecu me niang “ada ducu”! (Kwan Jon 16:7, 13.) Wiwa pe myero owil ni lok me ada magi pigi tek dok bene mitte ni wapwony ki jo mukene!
“JO MAPOL” GUJOLO “NGEC [ME ADA]”
9. Lwongo ango ma kicwalo i Wi Lubele me April 1881?
9 I April 1881, i nge mwaka aryo ma kicoyo iye Watchtower me acel, magajin man ocwalo lwongo ni lutit kwena ma romo 1,000 kulu gimitte. Lwongo man kwanne ni: “Bot jo ma gitwero miyo cawa manok nyo cawagi ducu me tiyo tic pa Rwot, wamito miyo tam botwu . . . , ni: Wucit i boma madongo nyo matino, ma lubbe ki kerowu, me tic calo Colporteurs [painia] nyo Lutit Kwena, yelle wunu me nongo Lukricitayo ma gitye ki miti, jo mapol ma wubinongogi-ni gitye ki arima me tic pi Lubanga, ento nongo pe lubbe ki ngec me ada; wupwonygi wek gunge kica pa Wonwa kacel ki ber pa Lokke.”
10. Dano gujolo lwongo ma kicwalo pi jo ma gimito tic pi kare malac nining?
10 Lwongo meno nyuto ni Lutino Kwan me Baibul guniang ni tic me tito kwena maber-ri obedo tic ma pire tek ma Lukricitayo me ada myero gutim. Gubedo ki gen ni gibinongo lutit kwena 1,000, pienni i kare meno jo miya manok keken aye gibino i cokke pa Lutino kwan me Baibul. I nge kwano trak nyo magajin, jo mapol gujolo lok me ada dok guye lwongo ma kicwalo-ni. Me lapore, i 1882 laco mo i London, i nge kwano Watchtower ki bukke matino tino pa Lutino Kwan me Baibul, en ocoyo ni: “Wunyutta kit me pwony ki gin ma myero apwony wek acob tic ma Lubanga mito ni ocobbe.”
11, 12. (a) Yub ango ma watye kwede ma rom aroma ki pa colporteurs me kare ca? (b) Colporteurs gucako “kilaci” nyo kacokke nining?
11 I mwaka 1885, Lutino Kwan me Baibul ma romo 300 onongo dong gitye ka tic macalo colporteurs. Lutino kwan magi onongo gitye ki cwiny ma watye kwede i kare-ni—me loko dano wek gudok lupwonnye pa Yecu Kricito. Ento, kit ma gitito kwede kwena onongo pat ki mewa. I kare-ni, wakwano Baibul ki ngat acel acel, dok wamiyo kony ma mitte. Lacen, walwongo latin kwan meno me cako ribbe kacel ki kacokke. I kare ca colporteurs onongo gimiyo bukke bot dano ci gilwongo jo ma gitye ki miti me ribbe kwedgi i kwano Ginacoya macalo gurup. Ma ka kwan ki ngat acel acel, gin gucako “kilaci” nyo kacokke.
12 Me laporre, i mwaka 1907, gurup mo acel pa colporteurs gucito i boma mo ka yenyo jo ma dong gitye ki kopi me Millennial Dawn (ma bene kilwongo ni Studies in the Scriptures). Watchtower otito ni: “Jo magi ma [gitye ki miti-ni] gucokke i gang mo acel. Colporteur magi gunyamo lok i kom Divine Plan of the Ages [Pulan pa Lubanga pi Kare me Anyim] pi Ceng Cabit lung, dok i Ceng Cabit ma lubo meno gucuko cwiny dano me cako bino i cokke kare ki kare.” I mwaka 1911, omege mogo gutemo yo manyen me tito kwena. Luneno ma giwoto awota ma romo gin pyerabic gucako miyo pwony ma kiyubo pi lwak i lobo Amerika ki Canada. Utmege magi gubedo ka gamo adrec pa jo ma gitye ki miti ma guwinyo pwonygi ci guketo yub pi jo magi me cako cokke i gang pa ngat mo me cako “kilaci” manyen. I mwaka 1914, wel kacokke pa Lutino Kwan me Baibul i wi lobo lung onongo dong romo 1,200.
13. Gin ango ma yomo cwinyi i kom kit ma “ngec [me ada] omedde kwede i kare-ni?
13 I kare-ni, tye kacokke ma romo 109,400 i wi lobo lung, ki dok omege ki lumege ma gitiyo calo painia ma romo 895,800. Cokcok dano ma romo milion aboro kulu dong gujolo “ngec [me ada,]” dok gitiyo kwede i kwogi me nino ducu. (Kwan Icaya 60:22.) * Man tye me yomcwiny pien Yecu owaco ni lupwonnyene ‘dano ducu bimon kwedgi pi nyinge.’ En omedde ni lulub kore gibimakogi, gibitweyogi i mabuc, dok kibinekogi. (Luka 21:12-17) Kadi bed atematema pa Catan ki jogine tye magwar, Lucaden pa Jehovah gitye ki yomcwiny madit adada i ticgi me loko dano wek gudok lupwonnye pa Yecu. I kare-ni, gitye ka tito kwena “i wi lobo ducu,” cakke ki i twok lobo ka mangic, i godi, i aro, i boma, ki bene i caro ducu. (Mat. 24:14) Man onongo pe romo timme labongo kony pa Lubanga.
“NGEC [ME ADA]” OTYEKO ‘MEDDE’
14. Bukke kacel ki magajin gukonyo nining i medde pa “ngec [me ada]”?
14 “Ngec [me ada]” otyeko medde pienni dano mapol gitye ka tito lok me kwena maber-ri. Ngec man bene omedde pien kitye ka goyo bukke kacel ki magajin mapol ata. Lutino Kwan me Baibul gugoyo Watchtower mukwongo in Julai 1879, dok i kare meno onongo kilwongo ni Zion’s Watch Tower and Herald of Christ’s Presence. Watchtower meno mukwongo-ni kampuni mo aye ogoyo, dok kigoyo i leb Muno keken gin 6,000. Charles Taze Russell, ma onongo tye mwaka 27 keken-ni kiyero me bedo edita ki bene Lutino Kwan abic ma guteggi i yo me cwiny gubedo ka coyo pwony i magajin man kare ki kare. Watchtower dong kitye ka goyone i leb 195. Magajin man pud dong kigoyo loyo aloya i lobo-ni, kun wel kopi acel acel ma kigoyo tye 42,182,000. Ma lubo kore aye magajin me Awake! dok wel kopi ma kigoyo tye 41,042,000 i leb 84. Medo i kom meno, bukke kacel ki Baibul kitye ka goyogi i wel ma romo milion 100 kulu mwaka ki mwaka.
15. Wan wanongo lim kikwene me goyo bukkewa?
15 Tic man madit-ti kitye ka cobone pi mot ma dano gimiyo kun a ki i cwinygi. (Kwan Matayo 10:8.) Man tye me yomcwiny bot jo ma gicato jami calo macin, karatac, inki, ki dong mukene pien gingeyo ni man keligi lim. Omego mo acel ma wilo jami me goyo bukke i Betel owacci: “Jo ma gitimo biacara ma gibino ka neno macinwa giuro dok giwacci wan watye ki tet me rwom mamalo adada, kun kitungcel tet ma kit man ki wilo ki lim ma dano gimiyo macalo mot. Giuro bene ni jo ma gitiyo i betel pud gitye bulu remogi lyet dok gitiyo ma cwinygi yom.”
NGEC PA LUBANGA BIROMO LOBO DUCU
16. Pingo Jehovah oweko “ngec [me ada] omedde?
16 “Ngec [me ada]” omedde pi tyen lok matir. Pien Lubanga mito ‘laro jo ducu, dok mito ni jo ducu gubed ki ngec matir.’ (1 Tem. 2:3, 4) Jehovah mito ni dano gunge lok me ada wek guwore i yo matir kun ginongo motte. Pien en oguro kacel Lukricitayo manok ma kiwirogi, man oweko “ngec [me ada]” omedde. En bene tye ka guro kacel “lwak dano mapol ata” ma gitye ki gen me kwo i lobo kany pi naka kun gia ki i “rok ducu, ki i kaka ducu, ki dano ducu me wi lobo, ki leb ducu.”—Yabo. 7:9.
17. Medde pa wel jo ma giworo Jehovah-ni nyuto gin ango?
17 Medde pa wel jo ma giworo Jehovah itwok lobo ducu pi mwaki 130 mukato angec-ci nyuto ni Lubanga gin ki Kabaka ma en ocimo, Yecu Kricito, gitye ki cwak madit i kom Lucaden pa Jehovah i lobo kany—gitirogi, gigwokogi, giyubogi, dok bene giminigi pwony. Wel lutic pa Jehovah ma tye ka medde-ni nyuto bene ni ada cikke pa Jehovah wang ma ocobbe i anyim. “Lobo ducu bipong ki ngec pa Rwot [Jehovah], macalo pii pong i nam.” (Ic. 11:9) Dano pud dong gibilimo mot mapol i kare meno!
[Lok ma tye piny]
^ Iromo nongo adwogi maber ka ineno DVD me Jehovah’s Witnesses—Faith in Action, Part 1: Out of Darkness and Jehovah’s Witnesses—Faith in Action, Part 2: Let the Light Shine.
^ Nen buk me Isaiah’s Prophecy—Light for All Mankind II, pot karatac 320.
[Peny me Kwan]
[Cal ma tye i pot karatac 14]
Lutino kwan me Baibul i kare ca onongo pe gikette ento gitye ki cwiny me timo miti pa Lubanga
[Cal ma tye i pot karatac 15]
Kero ma iketo wek “ngec [me ada]” omedde-ni pire tek bot Jehovah
