Tango Tika Tye Ada?​—Tyen Lok Adek Mumiyo Dano Gikwero

TYEN LOK ME 1: Tango pe twere pienni gituro cik ma doro ginacweya. Niangowa ma lubbe ki cik ma doro ginacweya jenge i kom kwed ma lucayan gutimo i kom cwec murumowa. Ento, niangowa i kom “cik ma doro ginacweya-ni” romo bedo nok adada. (Yubu 38:4) Ngat ma odyere i lok me cayan twero jalo kwone ducu i kwano cik mo acel ma doro ginacweya. Ento ka gin mo acel “opokke,” ci myero en dok kong ongi niangone i kom cik meno. Man rom ki carolok mo acel ma wacci, “Ogwal acel obalo wang pii.”

Lapor mo acel nyuto kit ma yot kwede me jengo tamwa i kom lok mo ma ngecce pe kitito weng. John Locke (mwaka 1632-1704) otito gin mo mutimme i kin lacungudwar me lobo Holland ki kabaka me Saim: I kare ma lacungudwar-ni tye ka tito pi lobone Holland bot kabaka-ni, en owacci i kine mukene lyec woto i wi nam. Kabaka-ni okwero lok meno lajwac kun wacci lacungudwar-ni lagoba. Ento, lacungudwar-ni onongo tye ka tito gin mo ma kabaka-ni peya oneno i kwone. Kabaka man onongo pe ngeyo ni ka nam omakke odoko pee, ci lyec twero wot i wiye. Ye lok man onongo tek mada bot kabaka-ni pienni pe ki ngec muromo i kom lok man.

Tam kong i kom jami ma kicobogi i kare-ni ma onongo kitamo ni pe twere i mwaki mogo mapol mukato angec:

● Dege romo tuk/tware ki i lobo Amerika wa i lobo Singapore labongo pye ka mo keken kun nongo otingo dano makato 800, kun tuk mairo 560 pi cawa acel (kilomita 900).

● I kare-ni bene, dano ma i lobe mapat pat giromo lok nyo boko lok wang ki wang kun gitiyo ki kompiuta.

● Wer miya mapol ata kiromo ketogi i DVD.

● Ludaktari ma gitimo ayango giromo kobo adunu nyo itao pa ngat moni i kom ngat mukene.

Gin ango ma waromo wacone ma lubbe ki lok ada magi? Gin ma waromo wacone aye en: Ka dano giromo timo jami mogo ma i mwaki mukato angec onongo ginen calo timogi tek, ci Lubanga ma ocweyo polo ki lobo wa ki jami ducu ma i iye-ni romo timo jami mogo me aura ma pe watwero niang i komgi dok ma pe watwero porogi i kare-ni. *​—Acakki 18:14; Matayo 19:26.

TYEN LOK ME 2: Baibul jenge i kom tango wek dano gubed ki niye. Baibul pe wacci omyero waye tango ducu ma kitimo. Ento wacciwa bene ni myero waye tango mukene. Baibul cikowa ni myero wagwokke pe me keto genwa i kom tango ki lanyut mogo matego. Nen kong kit ma cikowa kwede: “Bino pa dano ma turo cik a ki i tic pa Catan kun tye ki teko ducu, ki lanyut mogo ki tango mogo me goba. Dok bibedo ki lwak bwola maraco pi jo ma birwenyo matwal, pien gukwero maro lok me ada ma kono olargi.”​—2 Jo Tecalonika 2:9, 10.

Yecu Kricito bene owacci jo mapol ma giwacci gibedo lulub kore gibibino ento kun nongo i ada pe gubedo lulub kore. Mogo biwacce ni: “Rwot, Rwot, yam pe watito lok pa Lubanga i nyingi, kun waryemo cen maraco ki dok watimo tango mapol?” (Matayo 7:22, New International Version) Ento Yecu owacci ebikwerogi woko ni pe gubedo lulub kore. (Matayo 7:23) Man te lokke ni Yecu pe opwonyo ni tango ducu a ki bot Lubanga.

Lubanga pe waco bot jo ma wore ni guket niyegi ducu i kom tango. Ma ka meno, niyegi myero ocung i kom lok ada.​—Jo Ibru 11:1.

 Me lapore, tam kong i kom cer pa Yecu Kricito, ma obedo tango ma pud ngene loyo ma kicoyo pire i Baibul. Mwaki mapol i nge cerre, Lukricitayo mogo i Korint gucako bedo ki akalakala ka Yecu ocer ada. Lakwena Paulo okonyo Lukricitayo magi nining? Tika en owaco mere keken ni “Wubed ki niye matek”? Pe kumeno. Nen kong kit ma en opoyo wigi kwede i kom cer pa Yecu. En owacci “giyike [Yecu], ka dong gicere woko i nino me adekke, kun lubo coc ma yam gicoyo, dok ni yam onen bot Petero, ka dok onen bot jo apar wiye aryo ca. Ka dok onen bot utmego makato miya abic lawangacel; pol dano mogo i kom jo-nu pud gitye kwo.”​—1 Jo Korint 15:4-8.

Tika onongo pire tek ka ada Lukricitayo magi gitye ki niye i kom tango meno? Paulo omedde ni: “Ka Kricito yam pe gicero, ci kwena ma watito-ni dong yone pe, kadi wa niyewu bene yone pe.” (1 Jo Korint 15:14) Paulo pe otero lok man tuko tuko. Oromo bedo ni cer pa Yecu i yo me tango-ni pe otimme nyo otimme ada! Ento Paulo ongeyo ni tango man otimme ada pien lwak lucaden mapol ata onongo pud gitye kwo i kare meno. Ki lok ada, lucaden magi onongo gitye atera me to ma ka kwero gin ma guneno ki wanggi.​—1 Jo Korint 15:17-19.

TYEN LOK ME 3: Tango timme pigi kengi dok jo ma kwangi nok aye pe gingeyo. Jo mogo ma gukwano matut giwacci tango me Baibul-li pe gutimme pi teko pa Lubanga ento gutimme pigi kengi. Gitamo ni ka kiwacci gutimme pi teko pa Lubanga ci miyo dano giye. Kadi bed ni jami ma timme pigi kengi calo oyengyeng, two, ki dong muk pa ngom kubbe ki tango, ento timme pa jami magi ducu tye ki gin acel ma pire tek. Pe gitimme i karene kikome kit ma kitito kwede i Ginacoya.

Me labolle, jo mukene giwacci gemo me acel ma kikelo i kom lobo Ejipt, loko Kulu Nile me doko remo-ni otimme pien kot olwoko ngom makwar i Nile kacel ki kwidi mo makwar ma kilwongo ni flagellates. Ka ikwano i Baibul, kulu man kiloko odoko remo ada ento pe daba makwar aye omol iye. Ka ikwano ki diro Nia 7:14-21 inongo ni tango man otimme i kare ma Moses owaco ki Aron ni ogo Kulu Nile ki odo. Kadi bed ni lokke pa kulu-ni otimme pire kene, ento goyo pii man ma Aron ogoyo i karene kikome ki odo-ni nyuto tango!

Labol me aryo ma nyuto ber pa tango me timme i karene kikome aye i kare ma Luicrael onongo dong gicok donyo i Lobo ma Kiciko Pire. Kulu Jordan onongo opong ma pe giromo kato loka tungcel. Baibul tittiwa gin mutimme kit man: ‘Ka dong lulamdog ma gutingo canduk me gicikke-ni guo i Jordan, guluto tyengi i pii ma i doge-ni, ci pii ma mol piny ma a ki tung malo-ni ogut ocung woko ma opong otinge malo likung ma ojer wa i Adam.’ (Yocwa 3:15, 16) Tango man mono otimme pi oyengyeng kece muk pa ngom? Wang Baibul man pe waco kumeno. Kare ma gin man otimme iye nyuto tango. Tango man otimme i karene kikome ma Jehovah owacci bitimme iye.​—Yocwa 3:7, 8, 13.

Tika tye gin ma kilwongo ni tango? Labongo goba, Baibul wacci gitye. Kit ma Baibul wacciwa kwede, tango pe gubedo gin ma gitimme pigi kengi. Ci dong waromo penye kekenwa ni, tika pore me wacci tango pe romo timme pienni pe gubedo gin ma timme nino ducu?

[Lok ma tye piny]