Kit ma kinyuto kwede i cal ma tung acuc-ci, jo mapol gitamo ni i Nino me Ngolokop, tipo pa jo bilion mapol gibicung i nyim kom ker pa Lubanga ci kingolo kop i wigi ma lubbe ki jami ma gutimo con—jo mogo kibiminigi mot me kwo i polo, ento jo mukene kibiwangogi i mac me kapiny. Ento Baibul dok nyuto ni Nino me Ngolokop tye pi laro dano ki i tim maraco. (Jabuli 96:13) Lubanga ocimo Yecu me bedo Langolkop ma bigiko tim maraco.—Kwan Icaya 11:1-5; Tic pa Lukwena 17:31.

I kare ma Adam, laco ma Lubanga okwongo cweyone ojemo i kom Lubanga akaka, en ocato likwayine ducu i opii me bal, can ki to. (Jo Roma 5:12) Me cobo peko man, Yecu bicero jo bilion mapol ata ma guto. Buk me Niyabo nyuto ni man bitimme i kare me loc pa Yecu ma bitero mwaki alip acel.—Kwan Niyabo 20:4, 11, 12.

Kibingolo kop i wi jo ma kicerogi pe pi jami ma gutimo ma peya guto ento pi jami ma gibitimone ka kinyutiwa lok ma kicoyo i “buk adola” ma kiloko i kome i Niyabo cura 20. (Jo Roma 6:7) Lakwena Paulo owaco ni jo magi ma kibicerogi ci kiminigi kare me ngeyo lok i kom Lubanga-ni, bibedo “jo ma kitgi atir wa ki jo ma kitgi pe atir.”—Kwan Tic pa Lukwena 24:15.

Jo ma guto ma onongo pe gingeyo Lubanga Jehovah dok pe gutiyo pire kibiminigi kare me lokke ki dong me timo jami matir. Ka guloko kitgi, ci rom ma nongo gudonyo i “cer me kwo.” Ento jo mogo ma kibicerogi pe gibibedo ki miti me pwonyo yo pa Jehovah. Pi meno, rom ma nongo kicerogi pi “ngolokop” me to i wigi.—Kwan Jon 5:28, 29; Icaya 26:10; 65:20.

I agikki me Nino me Ngolokop ma bitero mwaki alip acel-li, nongo dong Jehovah odwoko jo ma lugen me doko jo ma pe ki roc kit ma en onongo oyubo con. (1 Jo Korint 15:24-28) Man pud dong gen mamwonya ya pi jo ma luwiny! Lubanga bigonyo Catan larac ki i bur ma tere pe gik-ki i nge mwaki alip acel wek dok otem dano pi tyen me agikki. Catan dok bitemo loko dano woko ki bot Jehovah, ento jo ma gucung matek dok gukwero donyo i atematema pa Catan-ni gibinongo kwo ma pe tum i lobo paradic.—Kwan Icaya 25:8; Niyabo 20:7-9.

Baibul bene tiyo ki nyig lok ni “nino me ngolokop” me lok i kom jami ma bitimme ka kitye ka jwero lobo man marac-ci. Nino me ngolokop man bibino atura kit ma otimme kwede i kare ma Lubanga ocoro Pii Aluka i kare pa Nua ci otyeko yalwak pa lutim maraco me kare meno ducu. Ki yomcwiny madit, ka kijwero ‘jo ducu ma pe gilworo Lubanga’ ci man biyabo yo pi lobo manyen ‘ka ma kit ma atir bibedo iye.’—Kwan 2 Petero 3:6, 7, 13.

Pi ngec mapol, nen pot karatac 213-215 me buk man, ma Lucaden pa Jehovah aye gugoyo. Baibul Mono Ada Pwonyo gin Ango?