Lapeny me 1: Tika Kwona Tye ki Tyen Lok?
ROSALIND, ma odongo i England, onongo tye ki miti me nongo ngec mapol adada. Lamego man bene onongo tye ki miti me konyo dano. I nge tyeko kwanne, en onongo dog tic mo madit adada me konyo jo ma pacogi pe, dok bene okonyo lugoro kacel ki jo ma wigi goro ma miyo giniang mot. Kadi bed ni en onongo tye ki dog tic madit ki jami ducu ma mitte me kom, en owacci: “Pi mwaki mapol abedo ka penye kekene ni, ‘Pingo watye kany?’ dok ‘Tyen lok me kwo mono tye?’”
Pingo wapenyo lapeny man?
Dano pe gitye calo lee ma pe gitamo-ni. Watye ki kero me nongo pwony ki i jami mutimme angec, goyo pulan pi anyim, ki dok yenyo tyen lok me kwowa.
Lagam ango ma dano gimiyo?
Jo mapol gitamo ni tyen lok me kwo obedo nongo lonyo nyo yweka wek ginong yomcwiny.
Lagamgi-ni nyuto gin ango?
Man nyuto ni wan aye wamoko gin ma pire tek i kwowa. Mitiwa pire tek makato miti pa Lubanga.
Baibul mono pwonyo gin ango?
Kabaka Solomon oduro lonyo adada dok oyenyo yomcwiny ento i ngeye en onongo ni man pe miyo dano bedo ki tyen lok matir i kwo. En otito gin ma miyo kwo bedo ki tyen lok matir, ma oweko en ocoyo ni: “Man aye agikki me lok meno; lok ducu dong jo gutyeko winyone. Lwor Lubanga dok ilub cikke ducu.” (Latitlok 12:13) Lubo cik pa Lubanga kwako timo gin ango?
But yub pa Lubanga tye ni myero wabed ki yomcwiny i kwowa. Solomon ocoyo ni: “Dong gin maber makato ma dano myero otim en aye ni en myero ocam cam dok omat mat, wek onong yomcwiny i tic ma en tiyo. Ento aneno ni man bene Lubanga aye ma omiyo.”—Latitlok 2:24.
Lubanga mito ni wamar dok wagwok jo me odiwa. Nen kong tira ma lubone yot dok ma tiyo ma kimiyo bot dano acel acel me ot.
-
“Co bene gumar mongi macalo gimaro komgi kengi.”—Jo Epeco 5:28.
-
‘Dako bene myero onen ni ebedo ki woro matut i kom cware.’—Jo Epeco 5:33.
-
“Wun litino, wuwiny lunyodowu.”—Jo Epeco 6:1.
Ka walubo cik magi me Baibul-li, ci olo wabinongo yomcwiny kacel ki yengo i kwowa. Ento, gin ma pire tek ma watwero timone aye me pwonyo lok i kom Lacwecwa ki dok nyikke cok bote macalo Laremwa. Ki lok ada, Baibul cuko cwinywa ni “Wunyik cok bot Lubanga.” Dok bene cikke ni: “ci en bene binyiko cok botwu.” (Yakobo 4:8) Ka iye lok man me cuko cwiny-nyi, ci kwoni bibedo ki tyen lok kikome.
Pi ngec mapol ma lubbe ki kit ma myero i kwo kwede i yo ma yomo cwiny Lubanga, nen dul me 12 i buk me Baibul Mono Ada Pwonyo Gin Ango? Tye ma iromo kwanyone ki i kabedowa me intanet i www.mt1130.com
