JO MUKENE giwacci pe ber me penyo Lubanga. Gitamo ni meno pe nyuto woro ka wapenyo Lubanga ni pingo en timo jami mogo ento mukene pe timo. In bene itamo kit meno?

Ka itamo kit meno, ibibedo ki ur ka iniang ni jo mogo ma kitgi atir bene gupenyo Lubanga ki lapeny. Nen kong lapeny mogo ma gubedo ka penyone:

Yubu, laco ma lagen openyo ni: ‘Pingo jo maraco gibedo kwo, giri dok lonyogi woto ki medde?’​—Yubu 21:7.

Kabakuk, lanebi ma onongo gene-ni openyo ni: “Pingo kara yin ibedo neno jo a mom ogen anena, aco kono jo areco tye amwonyo jo abeco, ame kitegi atira katogi kun yin iling giri alinga?”​—Kabakuk 1:13, Baibul me leb Lango.

Yecu Kricito openyo ni: “Lubangana, Lubangana, itenya woko pingo?”​—Matayo 27:46.

Ka ikwano tyeng ma gurumo ka nget tyeng magi, pe ibinongo ni Lubanga Jehovah * okeco pien kipenye ki lapeny magi ma kipenyogi ki cwiny matir-ri. Ki lok ada, en diyo cwinye adada. Me lapore, Lubanga pe keco ka wapenye ni ominiwa jami ma mitte wek wabed ki yotkom. En miniwa jami magi ducu. (Matayo 6:11, 33) Ki bene, en tye atera me miniwa ngec ma twero gwoko cwinywa ki tamwa bedo maber. (Jo Pilipi 4:6, 7) Ada, Yecu owaco bot lupwonnyene ni: “Wulegi, ci gibimiyo botwu.” (Matayo 7:7) Tyeng ma gurumo ka nget cikke man pa Yecu-ni nyuto ni en onongo pe tye ka lok i kom gamo jami me kom keken ento bene nongo lagam pi lapeny mogo ma pigi tego.

Ka onongo itye ki kare me penyo Lubanga, lapeny mene ma onongo ibipenye kwede ki i kin lapeny magi?

• Tika kwona tye ki tyen lok?

• Ngo ma bitimme ka ato?

• Pingo Lubanga weko adeno can?

Kit macalo “Ginacoya ducu ma yam gicoyo, gicoyo pi teko pa cwiny pa Lubanga[-ni],” ibinongo lagamme ducu i Baibul, Lok pa Lubanga. (2 Temceo 3:16) Kong wanenu gin mumiyo jo mukene gipenye ki lapeny ma kiryeyogi malo-ni ki dong lagam ma Baibul miyo.