Smita, * dako mo ma onongo tye ki mwaka 35 dok bedo i Dhaka, Bangladesh onongo ngene macalo ngat ma lamar dok paro pi jo mukene. Dano onongo gingeye macalo dako ma tiyo matek dok ma cwinye yom ma mito konyo jo mukene me pwonyo lok i kom Lubanga. Lupacone kacel ki lureme gubedo ki ur madit i kare ma two omako Smita ci oto woko atura i cabit acel keken!

James kacel ki dakone onongo gitye ki mwaka 30 ki wiye, dok kitgi onongo rom aroma ki pa Smita. I nino mo acel gin gucito ka limo luremgi ma gibedo i Dog Nam ma tye i Kupoto Ceng me lobo Amerika. Gin pe gudwogo cen i pacogi ma i New york. I kare ma gitye kunnu, gin guto i can me gudo ma oweko arem cwiny malit bot jogi me amara kacel ki lutic luwotgi.

Pe mitte ni inen ka mabor me niang ni tim maraco kacel ki deno can onya adada i kareni. Lutedero kacel ki lumony gito i lweny. Tim gero omiyo jo ma balgi pe gitye ka deno can. Pekki ma ngole atura ki two twero mako ngat mo keken kadi bed ni en latin nyo ladit ma rwomme tye lamal. Peko ma poto atura neko dano lumuku. Apokapoka kacel ki tim maraco onya i kin piny. Oromo bedo ni in bene dong iwok ki i jami magi.

Pore adada me penye ki lapeny macalo magi:

• Pingo jami maraco timme i kom jo ma kitgi ber?

• Tika omyero wakok i kom Lubanga pi jami magi?

• Jami maraco mono gitimme pigi kengi onyo dano aye gikelo?

• Tika watye ka deno can pien watimo jami maraco i kwowa macon ma peya kinywalowa odoco?

• Ka Lubanga won twer ducu tye, pingo en pe gwoko jo ma kitgi ber?

• Tika dano bikwo labongo tim maraco kacel ki deno can?

Me gamo lapeny magi, omyero kong waniang lagam pi lapeny aryo eni: Pingo jami maraco timme i kom dano ducu, ki dok gin ango ma Lubanga obitimo?