Calo yamo carbon monoxide, Catan pe nen, ma weko bedo tek bot dano me ngeyo en dok kite rac adada. Lubanga pe owekowa ata, en miniwa kony. Omyero pe ilwor Catan ka ce itiyo maber ki jami magi ma Lubanga omiyogi-ni.

Kero me yero gin ma wamito. Yakobo 4:7 waco ni: “Wulweny matek ki Catan, ci en biringowu woko.” Kadi bed Catan tek adada, en pe romo diyo in me timo jami ma pe imito timogi. In iromo yero gin ma imito. 1 Petero 5:9 waco ni: “Wucung matek i nyime [Larac-ci] pi niye.” Wi myero opo ni i kare ma Yecu okwero bita adek pa Catan, Catan oweke woko. (Matayo 4:11) In bene itwero kwero bita pa Catan.

Bedo larem Lubanga. Yakobo 4:8 cuko cwinywa ni myero ‘wanyikke cok bot Lubanga.’ Jehovah lwongi me bedo ki wat macok kwede. In itwero timo meno nining? Yo maber me cako timo meno aye me pwonyo lok mapol madok i kome ki i Baibul. (Jon 17:3) Jami ma ipwonyogi-ni bikonyi me maro Jehovah, dok mar meno bicuko cwinyi me timo mitine. (1 Jon 5:3) Gin ango ma Wonwa me polo bitimone ka ce inyikke cok bote? Yakobo omedde ni, Lubanga “bene binyiko cok botwu.”

Lubanga ocikke me gwokowa. Carolok 18:10 kwanne ni: “Nying Rwot [Jehovah] obedo calo cel matek ka ma dano ma kite atir ringo iye ci laro kwone.” Ento, man pe te lokke ni nying Lubanga obedo calo lwit ma dano gitiyo kwede wek okonygi. Ma ka meno, te lokke ni jo ma  gilworo nying Lubanga giromo lega bote wek gunong gwok cawa mo keken.

Lanen me aluba. Tic pa Lukwena 19:19 pwonyowa gin mo ma pire tek adada ma lubbe ki jo ma gulokke gudoko Lukricitayo i Epeco, ni: “Jo ma yam lujogi gukelo buk tyetgi guguro kacel guwangogi woko i nyim lwak ducu. Ka gikwano welgi ci ginongo romo lim ryal alip pyerabic kulu.” * Lukricitayo magi guwango gin mo keken ma kubbe ki tim tyet tyet kadi bed wele onongo tek. Labol meno pwonyowa gin ma pire tek adada i kare-ni. Lobo-ni odonyo matut i tim tyet tyet. Jami ma kubbe ki tim tyet tyet kacel ki tim mogo ma watamo ni pe girac giromo ywayo jogi i komwa. Omyero watute matek kun wakwero lajwac kodi jami magi ducu.​—Nwoyo Cik 18:10-12.

Pi mwaki 50 kulu, Rogelio, ma kiloko i kome i pwony mukwongo-ni onongo pe ye ni Larac-ci tye. Ento, i ngeye en oloko tamme woko. Pingo? Rogelio owaco ni: “I kare ma anongo Baibul pi tyen mukwongo i kwona, ngec me Ginacoya okonya me ye ni Larac-ci tye. Ngec meno tye ka gwoka kombeddi-ni wek pe apot i owicce.”

Tika itye ka kuro nino ma Catan nongo dong pe matwal? Iromo kurone. Ginacoya tito ni i kare me anyim, Larac-ci ma tye ka bwolo dano mapol-li ‘gibibolo woko i nam me mac ki gweng calfa ma mac oliyo.’ (Niyabo 20:10) Ki lok ada, mac kacel ki gweng calfa kikome-ni pe gitwero wango cwec me cwiny ma pe nen. Pi meno, nam me mac-ci cung pi to matwal. Catan dong bibedo pe pi naka. Man bibedo kare me yomcwiny madit adada pi jo ma gimaro Lubanga.

I kare-ni, medde kun itute matek me pwonyo lok i kom Jehovah kacel ki yone. * Go kong ni itye ka kwo i kare ma nongo kiwaco ni “Catan dong pe matwal!”