Kicwalo woko but Baibul mukwongo me New World Translation i 1950. Nicakke i kare meno, jo mogo gubedo ka miyo tamgi dok gubedo ki akalakala kace lok ma i New World Translation a tye kakare, pien lok mogo ma iye dok pat ki ma i Baibul mukene. Apokapoka meno tye pi tyen lok magi.

•   Lokke genne. Baibul me New World Translation jenge i kom ngec manyen loyo ma kinongo ki i ginacoya macon dok ma genne. Kitungcel, Baibul me King James Version me 1611 jenge i kom ngec ma kinongo ki i ginacoya ma pe genne tutwal dok pe con calo ma kitiyo kwede me gonyo Baibul me New World Translation.

•   Lokke tye kakare. Jo ma gugonyo Baibul me New World Translation gutute matek me gonyo Lok pa Lubanga kit ma en oweko kicoyo kwede con. (2 Temceo 3:16) Jo ma gugonyo Baibul mapol gubedo ka loko lok ma iye wek orwatte ki tekwaro pa dano, me labolle, guleyo ka wang nying Lubanga Jehovah ki nying me dog tic calo Rwot nyo Lubanga.

•   Lok ma iye kigonyo nyig lok ki nyig lok. Baibul me New World Translation dok pat adada ki Baibul mukene-ni pien kibedo ka gonyo lokke ki i Ginacoya macon nyig lok ki nyig lok tekke pe winye marac nyo pe weko ngec mukene woko. Ka lugony Baibul gugonyo lokke kit ma guniang kwede, ci gitwero tic ki tamgi nyo giweko ngec mukene ma pire tek woko.

 Bukke mukene pe. Baibul pa Katoli ki pa dini me Eastern Orthodox tye ki bukke mogo ma kilwongogi ni Apocrypha. Ento pe kiye bukke magi ma lubbe ki cik pa Lujudaya, dok Baibul bene waco ka maleng ni ‘Lujudaya yam kimiyo botgi lok pa Lubanga ma pire tek kun kigenogi ni gibigwoko.’ (Jo Roma 3:1, 2) Pi tyen lok meno, Baibul me New World Translation kacel ki Baibul mukene ma kigonyogi i kare-ni pe gitye ki bukke ma kilwongogi ni Apocrypha.

 Tyeng mogo pe. Baibul mogo tye ki tyeng kacel ki lok ma onongo pe i Ginacoya macon, ento pe kimedo jami magi i Baibul me New World Translation. Jami magi bene pe i Baibul mapol ma kigonyogi i kare-ni, ento ka tye ci nongo kinyuto i tere ni pe tye gin mo ma moko ni tyeng meno onongo tye i Ginacoya macon. b

 Nyig lok mapatpat. I kine mukene, ka kigonyo gin moni nyig lok ki nyig lok twero nyweno wi dano dok niang iye bedo tek. Me labolle, pol kare kigonyo lok pa Yecu ma tye i Matayo 5:3 ni: “Gitye ki gum jo ma lucan i cwiny.” (English Standard Version; King James Version; New International Version) Jo mapol ginongo tek me niang lok meno, dok jo mogo gitamo ni Yecu onongo tye ka nyuto tyen lok muweko pire tek me bedo ngat ma mwol nyo ma lacan. Ento, Yecu onongo tye ka wacone ni wabinongo yomcwiny ka wangeyo ni wamito tira pa Lubanga ki dok ka walubo tirane. Baibul me New World Translation ogonyo i yo ma niange maber ni “jo ma giparo pi cobo mitigi pi jami me cwiny.”—Matayo 5:3. c

•   I waraga ma kicoyo i Decemba 8, 1950, lagony Baibul mo ma nyinge Edgar J. Goodspeed oloko i kom New World Translation of the Christian Greek Scriptures ni: “Atye ki miti me niang ticwu ma tye ka timme i wi lobo ducu-ni, dok cwinya yom ni Baibul man niang iye yot, kigonyo lokke kakare, dok wutute matek i tic me gonyone. Man nyuto ni wuketo cwinywu me kwede lok i yo matut.”

•   Professor Allen Wikgren me University of Chicago onyuto ni New World Translation tye i kin Baibul ma kigonyo kun pe kijenge i kom Baibul me kare-ni, me ka meno kitiyo ki Ginacoya macon.”—The Interpreter’s Bible, Volume I, pot karatac 99.

•   Alexander Thomson, laco mo ma kwedo lok i kom Baibul ocoyo ni Baibul me New World Translation of the Christian Greek Scriptures “nyuto ni jo ma gucoyo gutiyo ki diro, guketo cwinygi me kwan matut dok gutute matek me gonyone kit ma con kiketo kwede i leb Grik.”—The Differentiator, April 1952, pot karatac 52.

•   Kadi bed ni lacoc mo ma nyinge Charles Francis Potter onyuto jami mogo manok ma en onongo ni pe tye maber tutwal, ento en pud owaco ni: “Lugony Baibul man ma pe kingeyogi-ni gugonyo ginakwana maber loyo, Cik Macon wa ki Cik Manyen ducu, jone gutiyo ki diro dok gitye ki ngec matut.”—The Faiths Men Live By, pot karatac 300.

•   Robert M. McCoyen onongo ni kit ma kigonyo kwede ki Baibul me New World Translation pat dok tye i rwom ma lamal, en bene owaco ni: “Kit ma kigonyo kwede ki Cik Manyen nyuto ni dul man [Lucaden pa Jehovah] tye ki luryeko mogo ma gitwero cobo pekki mapol ma kikemme kwede ka kitye ka gonyo Baibul.”—Andover Newton Quarterly, Januari 1963, pot karatac 31.

•   Kadi bed ni Professor S. MacLean Gilmour pe oyeng ki kit ma kigonyo kwede ki lok mogo i Baibul me New World Translation, ento en pud owaco ni jo ma gugonyo Baibul man “gitye ki kero ma kite dok pat me niang ginacoya me leb Grik.”—Andover Newton Quarterly, Sektemba 1966, pot karatac 26.

•   I kare ma Associate Professor Thomas N. Winter oneno New World Translation ma tye i Kingdom Interlinear Translation of the Greek Scriptures, en ocoyo ni: “Komitti ma pe kingeyogi ma gukonyo Baibul man onongo gitye ki ngec manyen loyo dok gutiyo ki ngec matir.”—The Classical Journal, April-Mai 1974, pot karatac 376.

•   I 1989, Laibru mo ma okwano matut i Icrael dok kilwongo ni Professor Benjamin Kedar-Kopfstein, owaco ni: “Ka atye ka kwedo lok i kom Baibul me leb Ibru ki kit me gonyo leb, pol kare atiyo ki Baibul mo me leb Munu ma kilwongo ni New World Translation. Dok kare ducu ka atye ka timo meno, aneno ni jo ma gukonyo Baibul meno gutute matek adada me gonyone i yo ma niang iye yot dok kit ma ginacoya macon onongo tye kwede.”

•   I nge kwed ma professor mo ma okwano lok kom dini ma kilwongo ni Jason David BeDuhn otimo i kom Baibul abongwen mapatpat ma kigonyo i leb Munu, en ocoyo ni: “Baibul me New World Translation aye tye ki ngec matir loyo ka kiporo ki Baibul mukene-ni ducu.” Kadi bed ni pol pa dano kacel ki jo mogo ma gukwano matut giwaco ni Baibul me New World Translation pat ki Baibul mukene-ni pien jo ma gugonyo guloko lokke wek orwatte ki pwony me dinigi, BeDuhn dok owaco ni: “Baibul man dok pat pien kigonyo lokke nyig lok ki nyig lok, dok kigonyo kit macon onongo kicoyo i Cik Macon.”—Truth in Translation, pot karatac 163, 165.