Lucaden pa Jehovah pe girwako wigi i lok me wibye pi niyegi i kom ngo ma Baibul pwonyo. Pe wabito kwir, pe wadonyo i pati mo keken me wibye, pe waye tic i opic mo keken ma kubbe ki tim me wibye, dok pe watimo gin mo keken me loko gamente. Watye ki niye ni Baibul miniwa tyen lok mucwiny ma lubbe ki lok meno.

•   Walubo lanen pa Yecu, ma okwero bedo latela me wibye. (Jon 6:15) En opwonyo lupwonnyene pe me bedo “jo me lobo” dok owaco ka maleng ni pe gurwak wigi i lok me wibye.​—Jon 17:14, 16; 18:36; Marako 12:13-17.

•   Watye ki gen i kom Ker pa Lubanga, ma Yecu oloko pire i kare ma owaco ni: “Lok man me kwena maber me ker pa Lubanga kibitito i wi lobo ducu.” (Matayo 24:14) Macalo jo ma gicung pi Ker pa Lubanga dok gitye ki tic me tito pi bino pa Ker meno, pe warwako wiwa i lok me wibye me lobo mo keken kadi wa me lobo ma wabedo iye.​—2 Jo Korint 5:20; Jo Epeco 6:20.

•   Wabedo agonya me tito kwena maber me Ker pa Lubanga bot dano me pati ducu pien pe wacwako tung ka mo keken i lok me wibye. Watute matek me nyutone i lokwa ki ticwa ni wajenge i kom Ker pa Lubanga, dok ni en keken aye ma bicobo pekki ducu me lobo-ni.​—Jabuli 56:11.

•   Wanote i wi lobo ducu macalo utmege pien pe wadonyo i apokapoka me wibye. (Jo Kolocai 3:14; 1 Petero 2:17) Kitungcel, jo me dini ma gidonyo i tim me wibye gibedo ki apokapoka i kingi.​—1 Jo Korint 1:10.

 Waworo gamente. Kadi bed ni pe wadonyo i tim me wibye, waworo luloc me gamente me lobo ma wabedo iye. Man rwatte ki cik me Baibul ma waco ni: “Dano acel acel myero owiny luloc ma giloye.” (Jo Roma 13:1) Walubo cik, waculo mucoro, dok waribbe ki gamente i tutene me miyo jami ma mitte pi ber bedo pa lutedero. Me ka goyo pulan me turo gamente, walubo tira me Baibul ma waco ni myero waleg pi “luker ki jo ma tye i rwom ma malo,” tutwalle ka gibimoko tam ma twero gudo worowa.​—1 Temceo 2:1, 2.

 Waworo bene twero pa jo mukene me moko tam pigi kengi ma lubbe ki lok me wibye. Me labolle, pe wabalo yub me bolo kwir dok pe wadwoyo tam pa ngat mo ma mito bolo kwir.

 Tika tam me bedo ma pe wacwako tung ka mo pud ocakke nyen? Pe. Lukwena kacel ki Lukricitayo mukene i cencwari me acel bene pe gudonyo i tim me wibye. Buk me Beyond Good Intentions waco ni: “Kadi bed onongo gingeyo ni myero giwor luloc, Lukricitayo me cencwari me acel pe guye me donyo i tim me wibye.” Buk me On the Road to Civilization bene waco ni Lukricitayo macon “pe onongo giye tic i opic ma kubbe ki tim me wibye.”

 Tika wabalo kuc me lobowa ka pe wadonyo i tim me wibye? Pe. Wan wamaro kuc dok myero gamente pe obed ki lworo i komwa. Nen kong ripot pa National Academy of Sciences of Ukraine me 2001. Ripot man oloko i komwa ni: “I kare-ni, jo mogo pe gimaro ni Lucaden pa Jehovah pe gidonyo i tim me wibye; dok meno aye oweko luloc me Nazi onongo ginenogi ni gin lubal.” Ento kadi wa i te loc me Soviet Union, Lucaden “pud gumedde ki lubo cik pa gamente.” Gutiyo ki cwinygi ducu i fam ki cuma me yubo jami dok pe gukelo jemo mo keken i kom loc meno.” Ripot meno dok omedde ni: “I kare-ni bene, niye kacel ki tic pa Lucaden pa Jehovah pe balo kuc ki ber bedo pa jo me lobo mo keken.”