Dɛbi, a to we be nɛ wa ma gbo kɛ fɔɛ si. Baiblo ɔ tsɔɔ we kaa wa ngɛ sɛsɛɛ ko, mohu ɔ, e ha nɛ wa na kaa nɔ́ he je nɛ nihi fuu gboɔ ji kaa “haomi baa mɛ tsuo a nɔ fiee.”​—Fiɛlɔ 9:11.

Anɛ Baiblo ɔ de we ke “gbenɔ be ngɛ” lo?

 Ee, Fiɛlɔ 3:2 de ke, “fɔmi be ngɛ, nɛ gbenɔ be ngɛ; ní dumi be ngɛ, nɛ ní kpami be ngɛ.” Se ngɛ anɔkuale mi ɔ, ke o kane Fiɛlɔ 3:1 kɛ 3 ɔ kɛ yaa a, o maa na kaa níhi nɛ yaa nɔ daa ligbi ngɛ wa si himi mi ɔ a he munyu nɛ kuku enyɔ ɔ ngɛ tue ɔ nɛ. (Fiɛlɔ 3:1-8) Kaa bɔ nɛ Mawu to we be pɔtɛɛ nɛ e sa nɛ ngmɔ hulɔ kɛ du ní ɔ, jã kɛ nɛ Mawu to we be nɛ wa ma gbo ɔ kɛ fɔɛ si. Oti ɔ ji, e sɛ nɛ wa ha nɛ níhi nɛ a he hia we tsɔ ngɛ si himi mi ɔ nɛ he wa juɛmi tsuo nɛ wa hɛ ba je wa bɔlɔ ɔ nɔ.​—Fiɛlɔ 3:11; 12:1, 13.

Wa ma nyɛ ma ha nɛ wa wami se nɛ kɛ

 E ngɛ mi kaa oslaahi baa wa nɔ tlukaa mohu lɛɛ, se wa ma nyɛ maa hi si be kɛkɛɛ ke wa mwɔɔ wa yi mi kpɔ ngɛ nile mi. Baiblo ɔ de ke: “Ní leli a tsɔɔmi ngɛ kaa nyu vu nɛ haa nɔ wami. E ma ha nɛ o maa na gbenɔ nɛ ma, konɛ o tu nya fo.” (Abɛ 13:14) Mose de Israel bi ɔmɛ kaa ke a ye Mawu mlaa amɛ a nɔ ɔ, ‘a wami se maa kɛ.’ (5 Mose 6:2) Se ke waa kɛ wa he ya wo ní yayahi a peemi mi, aloo wa ya je kuasia a, e ma nyɛ ma ha nɛ wa gbo mla.​—Fiɛlɔ 7:17.

 Ke wa ba wa je mi saminya kaa mɛni po, wa be nyɛe maa tu gbenɔ nya fo. (Roma Bi 5:12) Se e be kɛe nɛ níhi ma tsake. Baiblo wo si kaa be maa su nɛ “nɔ ko be gboe hu.”​—Kpojemi 21:4.