1 Mose 29:1-35
29 Lɔ ɔ se ɔ, Yakob tsa e blɔ hiami ɔ nɔ nɛ e pue nɔ kɛ ho nihi nɛ a ngɛ Puje He blɔ ɔ a zugba a nɔ ya.
2 Kɛkɛ nɛ e ya na vu ko ngɛ nga a nɔ, nɛ e na jijɔ kuu etɛ nɛ a buu si ngɛ vu ɔ he, ejakaa a yɛɔ nyu ngɛ jamɛ a vu ɔ mi kɛ haa to kuu ɔmɛ. Tɛ ngua ko ngɛ vu ɔ nya.
3 Ke a bua to kuu ɔmɛ tsuo a nya ngɛ lejɛ ɔ, a kpɛneɔ tɛ ɔ kɛ jeɔ vu ɔ nya, nɛ a haa to ɔmɛ nyu, nɛ lɔ ɔ se ɔ, a kpale kpɛneɔ tɛ ɔ kɛ buɔ vu ɔ nya.
4 Lɔ ɔ he ɔ, Yakob bi mɛ ke: “Ye nyɛmimɛ, jije nyɛ je?” kɛkɛ nɛ a de lɛ ke: “Wa je Haran.”
5 E bi mɛ ke: “Anɛ nyɛ le Laban, Nahor bibi ɔ lo?” nɛ a de lɛ ke: “Wa le lɛ.”
6 Kɛkɛ nɛ e bi mɛ ke: “E ngɛ saminya lo?” A he nɔ ke: “Ee, e ngɛ saminya. Hyɛ, e biyo Rahel lɛ e kɛ jijɔ ɔmɛ ma a nɛ!”
7 Kɛkɛ nɛ Yakob de mɛ ke: “Je jɔɛ lolo. E sui be nɛ a ma bua to kuu ɔmɛ a nya lolo. Nyɛ ha jijɔ ɔmɛ nyu, nɛ nyɛ ya ha mɛ ní nɛ a ye.”
8 Kɛkɛ nɛ a de ke: “A ngmɛ́ wɔ blɔ kaa waa pee jã, ja a bua to kuu ɔmɛ tsuo a nya, nɛ a kpɛne tɛ ɔ kɛ je vu ɔ nya. Lɔ ɔ se loko wa ma ha jijɔ ɔmɛ nyu.”
9 Benɛ e kɛ mɛ ngɛ munyu tue ɔ, Rahel kɛ e tsɛ ɔ jijɔ ɔmɛ ba su lejɛ ɔ, ejakaa to hyɛlɔ ji lɛ.
10 Benɛ Yakob na Rahel, e yayo nyɛminyumu Laban biyo ɔ kɛ Laban jijɔ ɔmɛ ɔ, oya nɔuu nɛ Yakob ya kpɛne tɛ ɔ kɛ je vu ɔ nya, nɛ e ha e tsɛko Laban jijɔ ɔmɛ nyu.
11 Kɛkɛ nɛ Yakob fĩɔ Rahel nya he* nɛ e wo e gbi nɔ nɛ e fo ya.
12 Nɛ Yakob de Rahel ke e tsɛ ɔ weku no* ji lɛ, nɛ e ji Rebeka binyumu. Kɛkɛ nɛ Rahel tu fo nɛ e ya bɔ e tsɛ ɔ amaniɛ.
13 Benɛ Laban nu Yakob, e nyɛmiyo ɔ binyumu ɔ he sane ɔ pɛ ɔ, e tu fo nɛ e kɛ lɛ ya kpe. E fua lɛ, nɛ e fĩɔ e nya he, nɛ e ngɔ lɛ kɛ ba e we ɔ mi. Nɛ Yakob de Laban nɔ́ fɛɛ nɔ́ nɛ ya nɔ ɔ.
14 Laban de lɛ ke: “Ngɛ anɔkuale mi ɔ, ye weku no tutuutu* ji mo.” Lɔ ɔ he ɔ, e kɛ lɛ hi si nyɔhiɔ kake.
15 Kɛkɛ nɛ Laban de Yakob ke: “Anɛ e sa kaa o sɔmɔ mi yaka gu akɛnɛ ye weku no* ji mo ɔ he je lo? Mo de mi, mɛni ma kɛ wo mo hiɔ?”
16 Jamɛ a be ɔ mi ɔ, Laban ngɛ biyihi enyɔ. A tsɛɛ nɔkɔtɔma a ke Lea, nɛ a tsɛɛ wayotsɛ ɔ ke Rahel.
17 Lea hɛngmɛ be fɛu kpakpa ko, se Rahel lɛɛ e ji yo nɛ e hi kɛ pi si, nɛ e he ngɛ fɛu saminya.
18 Yakob ná Rahel he suɔmi, lɔ ɔ he ɔ, e de ke: “I suɔ nɛ ma sɔmɔ mo jeha kpaago ngɛ o biyo wayoo Rahel he.”
19 Kɛkɛ nɛ Laban de lɛ ke: “E hi kaa ma ngɔ lɛ kɛ ha mo pe nɛ ma ngɔ lɛ kɛ ha nyumu kpa ko. Yaa nɔ nɛ o kɛ mi nɛ hi si.”
20 Nɛ Yakob sɔmɔ jeha kpaago ngɛ Rahel he, se jeha kpaago ɔ ngɛ kaa ligbi bɔɔ pɛ ngɛ e hɛ mi, ejakaa e suɔ Rahel.
21 Kɛkɛ nɛ Yakob de Laban ke: “Ye be ɔ nya ta, lɔ ɔ he ɔ, ngɔɔ ye yo ɔ kɛ ha mi, nɛ i kɛ lɛ nɛ ná bɔmi.”
22 Enɛ ɔ he ɔ, Laban bua e kpɔ ɔ mi bi ɔmɛ tsuo a nya nɛ e ngmɛ mɛ okplɔɔ.
23 Se jamɛ a gbɔkuɛ ɔ, Laban ngɔ e biyo Lea mohu kɛ ba ha Yakob konɛ e kɛ lɛ nɛ ná bɔmi.
24 Jehanɛ ɔ se hu ɔ, Laban ngɔ e mawayo Zilpa kɛ ha e biyo Lea konɛ e pee e mawayo.
25 Benɛ je na a, Yakob na kaa Lea mohu nɛ a ngɔ kɛ ba ha lɛ ɔ nɛ! Lɔ ɔ he ɔ, e bi Laban ke: “Mɛni o pee mi nɛ ɔ? Anɛ pi Rahel he je nɛ i sɔmɔ mo ɔ lo? Mɛni he je nɛ o sisi mi ɔ?”
26 Kɛkɛ nɛ Laban de lɛ ke: “Wa hiɛmɛ nɛ ɔ kusumi ngmɛ́ blɔ kaa a ha jokuɛyo gba be mi nɛ nɔkɔtɔma a sɛ we gba si himi mi lolo.
27 Mo nya yo nɛ ɔ he otsi. Lɔ ɔ se ɔ, ma ngɔ yo kaketsɛ ɔ hu kɛ ha mo nɛ o kpale sɔmɔ mi jeha kpaago kɛ to nane mi.”
28 Yakob pee jã, nɛ e nya yo ɔ he otsi, lɔ ɔ se ɔ, Laban ngɔ e biyo Rahel hu kɛ ha lɛ kaa e yo.
29 Laban ngɔ e mawayo Bilha hu kɛ ha e biyo Rahel konɛ e pee e mawayo.
30 Kɛkɛ nɛ Yakob kɛ Rahel hu ná bɔmi, nɛ e suɔ Rahel wawɛɛ pe Lea, nɛ e kpale sɔmɔ Laban jeha kpaago.
31 Benɛ Yehowa na kaa Yakob sume* Lea a, e ha nɛ e ngɔ hɔ,* se Rahel lɛɛ, yosa ji lɛ.
32 Lɔ ɔ he ɔ, Lea ba ngɔ hɔ nɛ e fɔ binyumu, nɛ e wo lɛ biɛ ke Reuben,* ejakaa e de ke: “Yehowa na ye nɔ́ nami ɔ, nɛ jehanɛ ɔ lɛɛ ye huno ɔ maa suɔ mi.”
33 E ba ngɔ hɔ ekohu nɛ e fɔ binyumu, kɛkɛ nɛ e de ke: “Akɛnɛ Yehowa nu kaa ye huno ɔ sume mi he je ɔ, e ha mi nɔ nɛ ɔ hulɔ.” Kɛkɛ nɛ e wo lɛ biɛ ke Simeon.*
34 E kpale ngɔ hɔ ekohu nɛ e fɔ binyumu nɛ e de ke: “Amlɔ nɛ ɔ lɛɛ ye huno ɔ maa mɛtɛ ye he, ejakaa i fɔ binyumuhi etɛ kɛ ha lɛ.” Lɔ ɔ he ɔ, a wo lɛ biɛ ke Levi.*
35 Nɛ e kpale ngɔ hɔ ekohu nɛ e fɔ binyumu nɛ e de ke: “Jehanɛ ɔ lɛɛ ma je Yehowa yi.” Enɛ ɔ he ɔ, e wo lɛ biɛ ke Yuda.* Lɔ ɔ se ɔ, e fɔ we hu.
Sisi Ningmahi
^ E ma nyɛ maa pee kaa e tsitsa he, aloo e hɛ nya, aloo e he kpa ko.
^ Ngɛ Hebri gbi mi ɔ, “nyɛminyumu.”
^ Ngɛ Hebri gbi mi ɔ, “ye wu kɛ ye he lo.”
^ Ngɛ Hebri gbi mi ɔ, “nyɛminyumu.”
^ Ngɛ Hebri gbi mi ɔ, “nyɛ.”
^ Ngɛ Hebri gbi mi ɔ, “e bli e fɔmi kotoku nya.”
^ E sisi ji, “Hyɛ, Binyumu!”
^ E sisi ji “Nɔ́ Numi.”
^ E sisi ji “Mɛtɛ He; Tsa.”
^ E sisi ji, “Yi Jemi; Yi Jemi Nɔ́.”
