Fiɛɛlɔ 4:1-16
4 I kpale ngɔ ye juɛmi kɛ ma yi mi wami ní peepeehi tsuo nɛ yaa nɔ ngɛ pu nɛ ɔ sisi ɔ nɔ. I na nihi nɛ a waa mɛ yi mi ɔ a vo nyu ɔ, nɛ nɔ ko be nɛ maa wo a bua. Nɛ nihi nɛ a waa ni ɔmɛ yi mi ɔ, a dɛ lɛ he wami ngɛ, nɛ nɔ ko be nɛ maa wo nihi nɛ a waa mɛ yi mi ɔ a bua.
2 Kɛkɛ nɛ i de ke nihi nɛ a gbo momo ɔ, a nɔ́ hi pe nihi nɛ a ngɛ wami mi loloolo ɔ.
3 Se nɔ nɛ e nɔ́ hi pe mɛ ni enyɔ ɔmɛ tsuo ji nɔ nɛ a fɔ we lɛ lolo, nɛ́ e nɛ níhi nɛ haoɔ nɔ nɛ a peeɔ ngɛ pu nɛ ɔ sisi ɔ.
4 I na bɔ nɛ nɔ́ he pleemi nɛ yaa nɔ ngɛ nihi a kpɛti ɔ haa nɛ nihi bɔɔ mɔde wawɛɛ,* nɛ́ a kɛ ga tsuɔ ní ha; enɛ ɔ hu ji yaka nɔ́, e ngɛ kaa fo nɛ a tuɔ kɛ fieeɔ kɔɔhiɔ se.
5 Kuasia buaa e ninehi a nya kɛ woɔ e he, nɛ e flãã.*
6 He jɔɔmi bɔɔ hi pe ní nɛ a tsuɔ gbegbelii* kɛ fo nɛ a tuɔ kɛ fieeɔ kɔɔhiɔ se.
7 I ngɔ ye juɛmi kɛ ma yaka nɔ́ kpa ko hu nɔ ngɛ pu nɛ ɔ sisi:
8 Nɔ ko ngɛ nɛ lɛ pɛ nɛ e ngɛ, e be huɛ; e be binyumu, nɛ e be nyɛminyumu ko hulɔ, se e tsuɔ ní wawɛɛ nɛ e kpa we. Ní nɛ e náa a sɛ e hɛ mi.* Se anɛ e bi e he ke, ‘Mɛnɔ he je lɛ i ngɛ ní tsue wawɛɛ, nɛ́ lɔ ɔ he je ní kpakpahi ngɛ mi* bɔe ɔ’? Enɛ ɔ hu ji yaka nɔ́ kɛ he nya gbami ní tsumi.
9 Ni enyɔ hi pe nɔ kake, ejakaa a náa hiɔwo kpakpa ngɛ ní nɛ a tsuɔ wawɛɛ ɔ mi.*
10 Ejakaa ke a ti nɔ kake nɔ si ɔ, nɔ kake ɔ maa ye bua lɛ konɛ e te si. Se mɛni maa ba nɔ nɛ e nɔ si nɛ nɔ ko be nɛ maa ye bua lɛ kɛ te si ɔ nɔ?
11 Jehanɛ se hu ɔ, ke ni enyɔ bla kɛ hwɔ si ɔ, a he mi maa dɔ la, se kɛ nɔ kake ngmelu he mi ma plɛ kɛ dɔ la ha kɛɛ?
12 Jehanɛ ɔ, nɔ ko ma nyɛ maa ye nɔ kake ngmelu nɔ, se ke ni enyɔ pee kake ɔ, a ma nyɛ maa te si kɛ wo lɛ. Nɛ kpã etɛ nɛ a lo kɛ bla a, a be nyɛe ma tsɔ lɛ mla.*
13 Niheyo ohiatsɛ nɛ e ngɛ juɛmi ɔ hi pe matsɛ nɔmoyo kuasia nɛ e be juɛmi nɛ e kɛ maa bu kɔkɔ bɔmi tue hu.
14 Ejakaa e* je tsu womi mi kɛ ba pee matsɛ, pohu a fɔ lɛ ohiatsɛ ngɛ jamɛatsɛ ɔ nɔ yemi ɔ mi.
15 I susu nihi tsuo nɛ a ngɛ wami mi nɛ a nyɛɛɔ kɛ yaa kɛ baa ngɛ pu nɛ ɔ sisi ɔ a he. Nɛ i susu bɔ nɛ níhi yaa nɔ ha niheyo ɔ nɛ e ba ye nɔ ngɛ nɔ nɛ sɛ e hlami ɔ se ɔ hu he.
16 E ngɛ mi kaa nihi nɛ a fĩ e se ɔ a he hiɛ babauu mohu lɛɛ, se nihi nɛ a maa ba pee se ɔ, a bua be e he jɔe. Enɛ ɔ hu ji yaka nɔ́, e ngɛ kaa fo nɛ a tuɔ kɛ fieeɔ kɔɔhiɔ se.
Sisi Ningmahi
^ Aloo “haa nɛ nihi tsuɔ ní wawɛɛ.”
^ Ngɛ Hebri gbi mi ɔ, “nɛ e yeɔ lɛ nitsɛ e he lo.”
^ Ngɛ Hebri gbi mi ɔ, “He nɛ a jɔɔ dɛ kɔkɔ kake hi pe ní nɛ a tsuɔ wawɛɛ dɛ kɔkɔ enyɔ.”
^ Ngɛ Hebri gbi mi ɔ, “Ní nami tɔɛ e hɛngmɛ gblegbleegble.”
^ Aloo “ye klaa.”
^ Aloo “ejakaa a náa ní nɛ a tsuɔ wawɛɛ ɔ he se babauu.”
^ Aloo “e tsɔmi yee.”
^ Eko ɔ, bi juɛmitsɛ ɔ he munyu nɛ a ngɛ tue ɔ nɛ.
