La 139:1-24
Kɛ ha la nɔ hyɛlɔ ɔ. La nɛ David po.
139 Oo Yehowa, o hyɛ ye mi tsuo, nɛ o le mi.
2 Ke i hi si ɔ, o le, nɛ ke i te si hu o le.
O naa ye susumihi ngɛ tsitsaa.
3 Ke i hia blɔ ɔ, o hyɛɛ* mi, nɛ ke i hwɔ si hu o hyɛɛ mi;O le ye blɔ ɔmɛ tsuo.
4 Oo Yehowa, loko ye lilɛ ma de nɔ́ ko ɔ,O le lɛ tsuo momo.
5 Ngɛ ye se kɛ ye hɛ mi ɔ, o bɔle mi kɛ kpe;Nɛ o kɛ o nine fɔ ye nɔ.
6 Nile nɛ ɔ, ye juɛmi kpi he.*
E hiɛ ha mi tsɔ pe bɔ nɛ ma nyɛ ma nu sisi.*
7 Jije ma nyɛ ma tu o mumi ɔ nya fo kɛ ya?Nɛ jije ma nyɛ ma tu fo kɛ je o hɛ mi kɛ ya?
8 Ke i kuɔ kɛ ho hiɔwe ya a, o ngɛ lejɛ ɔ,Nɛ ke i pee ye sa ngɛ Yɔkɔ* mi ɔ, hyɛ! o ngɛ lejɛ ɔ.
9 Ke i kɛ makɛ pɛlihi te kɛ hoKonɛ ma ya hi wo nɛ ngɛ he ko tsitsaa nya a,
10 Lejɛ ɔ po, o nine maa tsɔɔ mi blɔ,Nɛ o hiɔ nine maa hɛɛ mi.
11 Ke i de ke: “Bɔ fɛɛ bɔ nɛ ji ɔ, diblii maa laa ye nɔ!” ɔ,
Kɛkɛ nyɔ nɛ bɔle mi ɔ plɛ pee la.
12 Diblii po be diblii kpii pee ha mo,Mohu ɔ, nyɔ mi maa pee heii kaa je nami;Diblii ngɛ kaa la ha mo.
13 Ejakaa mo lɛ o pee ye se tso mi ngmɛ ɔmɛ;O kɛ mi to* ngɛ ye nyɛ fɔmi kotoku mi.
14 I jeɔ o yi, ejakaa bɔ nɛ o plɛ kɛ pee mi ɔ ngɛ nyakpɛ, nɛ e ngɛ gbeye.
O ní tsumi ɔmɛ ngɛ nyakpɛ,I* le enɛ ɔ saminya.
15 Ye wu ɔmɛ laa we moBenɛ a pee mi ngɛ laami mi ɔ,Benɛ a lo mi ngɛ zugba a sisi tɔɔ ɔ.
16 O hɛngmɛ po na mi benɛ i ji muɔ loku ngɛ fɔmi kotoku mi ɔ;A ngma e he níhi tsuo ngɛ o womi ɔ miLigbihi nɛ a pee mɛ ɔLoko eko fɛɛ eko ba.
17 Lɔ ɔ he ɔ, hyɛ bɔ nɛ o susumi ɔmɛ a he jua wa ha mi ha!
Oo Mawu, hyɛ bɔ nɛ a hiɛ babauu ha!
18 Ke i bɔ mɔde kaa ma kane mɛ ɔ, a hiɛ pe zia.
Ke ye hɛ tsɛ̃ ɔ, loloolo ɔ, i ngɛ o kasa nya.*
19 Oo Mawu, ke o gbe yiwutsotsɛmɛ ɔ!
Jinɛ basabasa peeli* maa je ye he kɛ ho,
20 Nihi nɛ a kɛ juɛmi yaya* tuɔ munyuhi kɛ siɔ mo ɔ;A ji o he nyɛli nɛ a kɛ o biɛ ɔ tsuɔ ní ngɛ blɔ yaya nɔ.
21 Oo Yehowa, nihi nɛ a nyɛɔ mo ɔ, i nyɛɔ mɛ,Nɛ nihi nɛ tsɔɔ o hɛ mi atuã a, anɛ a he tai pee we mi lo?
22 I ná a he ninyɛ wawɛɛ;A ba pee ye he nyɛli nitsɛnitsɛ.
23 Oo Mawu, moo kpa ye mi, nɛ o le ye tsui mi.
Moo hyɛ ye mi, nɛ o le susumihi nɛ haoɔ mi.
24 Hyɛ ke ji blɔ yaya ko ngɛ ye mi lo,Nɛ o nyɛɛ ye hɛ mi ngɛ neneene blɔ ɔ nɔ.
Sisi Ningmahi
^ Ngɛ Hebri gbi mi ɔ, “susuɔ.”
^ Aloo “ngɛ nyakpɛ ha mi tsɔ.”
^ Ngɛ Hebri gbi mi ɔ, “E ya hiɔwe tsɔ pe bɔ nɛ ma nyɛ ma su he.”
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Baiblo komɛ de ke “O puɛ mi.”
^ Aloo “Ye klaa.”
^ Ngɛ Hebri gbi mi ɔ, “loloolo ɔ, ma hi mɛ kanee.”
^ Aloo “muɔ he fɔ yeli.”
^ Aloo “Nihi nɛ a kɛ mɛ nitsɛmɛ a juɛmi.”
