Luka Sane Kpakpa a 7:1-50
7 Benɛ e gbe nɔ́ nɛ e ma de ni ɔmɛ ɔ nya a, e sɛ Kapenaum ma a mi.
2 Jehanɛ ɔ, ta buli a nɔkɔtɔma ko nyɔguɛ nɛ e suɔ lɛ saminya a be he wami kulaa, nɛ e miɔ nɛ e ma gbo.
3 Benɛ e nu Yesu he ɔ, e tsɔ Yuda bi ɔmɛ a nikɔtɔma amɛ ekomɛ kaa a ya de lɛ konɛ e ba nɛ e ba tsa e nyɔguɛ ɔ.
4 A ba Yesu ngɔ nɛ a ba bɔni lɛ pɛɛ kpami wawɛɛ ke: “Ke o pee nɔ́ nɛ ɔ ngɔ ha lɛ ɔ, e sa lɛ,
5 ejakaa e suɔ wa ma a, nɛ lɛ nɛ e ma wa kpe he ɔ nɛ.”
6 Enɛ ɔ he ɔ, Yesu kɛ mɛ ho. Se benɛ e piɛ bɔɔ nɛ a maa su we ɔ mi ɔ, ta buli a nɔkɔtɔma a tsɔ huɛmɛ komɛ kaa a ya de lɛ ke: “Nyɔmtsɛ, koo hao o he, i sɛ kaa ma ha nɛ o ba ye we mi.
7 Enɛ ɔ he je nɛ i bui ye he kaa e sa mi kaa ma ba o ngɔ ɔ nɛ. Se moo tu munyu, nɛ o ha nɛ ye tsɔlɔ ɔ nɛ e ná he wami.
8 Ejakaa imi hu i ngɛ nɔ ko sisi, nɛ imi hu i ngɛ ta buli ngɛ ye sisi, nɛ i deɔ nɔ kake ke, ‘Yaa!’ nɛ e yaa, nɛ i deɔ nɔ kpa hu ke, ‘Ba!’ nɛ e baa, nɛ i deɔ ye nyɔguɛ ke, ‘Pee enɛ ɔ!’ nɛ e peeɔ.”
9 Benɛ Yesu nu munyu nɛ ɔmɛ ɔ, nyumu ɔ he pee lɛ nyakpɛ, nɛ e plɛ e he nɛ e de asafo kuu ɔ nɛ ngɛ e se nyɛɛe ɔ ke: “I ngɛ nyɛ dee ke, ngɛ Israel po ɔ, i nɛ nɔ ko nɛ e hemi kɛ yemi kle kaa nyumu nɛ ɔ nɔ́ ɔ.”
10 Nɛ benɛ nihi nɛ e tsɔ mɛ ɔ kpale a se kɛ ho we ɔ mi ya a, a ya na kaa nyɔguɛ ɔ ná he wami.
11 Be bɔɔ se ɔ, e hia blɔ kɛ ho ma ko nɛ a tsɛɔ ke Nain ɔ mi ya. Benɛ e yaa a, e kaseli ɔmɛ kɛ nihi babauu piɛɛ e he.
12 Benɛ e piɛ bɔɔ nɛ e maa su ma a agbo ɔ nya a, hyɛ! nihi tloo nyumu ko nɛ e gbo kɛ ngɛ kpo jee. Lɛ pɛ ji bi nɛ e nyɛ ɔ fɔ, nɛ yalɔyo* ji yo ɔ hulɔ. Ma a mi bi babauu hu piɛɛ e he.
13 Benɛ Nyɔmtsɛ ɔ hɛ ngmɛ gba yo ɔ nɔ ɔ, e he pee lɛ mɔbɔ, nɛ e de lɛ ke: “Mo kpa ya fomi.”
14 Kɛkɛ nɛ e ya su nɔ́ nɛ a ngɔ gbogboe ɔ kɛ fɔ nɔ ɔ he nɛ e pɛtɛ he, nɛ nihi nɛ a tloo gbogboe ɔ da si. Lɔ ɔ se ɔ, e de ke: “Niheyo, i ngɛ mo dee ke, tee si!”
15 Kɛkɛ nɛ nyumu ɔ nɛ e gbo ɔ te si nɛ e hi si, nɛ e bɔni munyu tumi, nɛ Yesu ngɔ lɛ kɛ ha e nyɛ ɔ.
16 Gbeye nu mɛ tsuo nɛ a bɔni Mawu hɛ mi nyami womi nɛ a ngɛ dee ke: “A tle gbalɔ ngua ko si ngɛ wa kpɛti,” nɛ a de hu ke: “Mawu kai e we bi.”
17 Nɛ e he sane nɛ ɔ gbɛ fĩa Yudea tsuo, kɛ mahi tsuo nɛ bɔle si ɔmɛ a mi.
18 Jehanɛ ɔ, Yohane kaseli ɔmɛ ya bɔ Yohane ní nɛ ɔmɛ tsuo.
19 Enɛ ɔ he ɔ, Yohane tsɛ e kaseli ɔmɛ a ti ni enyɔ, nɛ e tsɔ mɛ Nyɔmtsɛ ɔ ngɔ kaa a ya bi lɛ ke: “Anɛ mo ji Nɔ Nɛ E Ma a lo, aloo e sa nɛ waa hyɛ nɔ kpa blɔ?”
20 Benɛ nyumu ɔmɛ ba e ngɔ ɔ, a ba de lɛ ke: “Yohane Nɔ Baptisilɔ ɔ tsɔ wɔ kaa wa ba bi mo ke, ‘Anɛ mo ji Nɔ Nɛ E Ma a lo, aloo e sa nɛ waa hyɛ nɔ kpa ko blɔ?’”
21 Jamɛ a ngmlɛfia a mi ɔ, e tsa nihi fuu nɛ a be he wami ɔ, kɛ nihi nɛ a hiɔ ɔ mi wa a, nɛ e hia mumi yayamihi, nɛ e bli hɛ yuyuili a hɛ ngmɛ.
22 E ha mɛ heto ke: “Nyɛɛ ya nɛ nyɛ ya de Yohane níhi nɛ nyɛ na kɛ níhi nɛ nyɛ nu ɔ: Amlɔ nɛ ɔ, hɛ yuyuili ngɛ nɔ́ hyɛe, nɛ glɔtsɛmɛ ngɛ nyɛɛe, kpititsɛmɛ a he ngɛ tsɔe, nɛ nihi nɛ a tue nui nɔ́ ɔ ngɛ nɔ́ nue, a ngɛ gbogboehi a si tlee, nɛ a ngɛ sane kpakpa a fiɛɛe kɛ ngɛ ohiatsɛmɛ hae.
23 Nɔ nɛ ye he sane tɔ̃tɔ̃ we e nane ɔ ngɛ bua jɔmi.”
24 Benɛ Yohane tsɔli ɔmɛ je kɛ ho ɔ, Yesu bɔni Yohane he munyu tumi kɛ bɔni asafo kuu ɔmɛ tsɔɔmi ke: “Mɛni nɛ nyɛ je kpo kɛ ya nga a nɔ konɛ nyɛ ya hyɛ ɔ? Go nɛ kɔɔhiɔ ngɛ lɛ mimiɛɛe lo?
25 Lɛɛ mɛni nɛ nyɛ je kpo kɛ ya konɛ nyɛ ya hyɛ ɔ? Nyumu ko nɛ e wo tade bɔdɔɔ* lo? Hyɛ, nihi nɛ a woɔ tade nɛ ngɛ fɛu saminya, nɛ a yeɔ ngɔɔmi ɔ, matsɛmɛ a wehi a mi nɛ a ngɛ.
26 Ke jã a, lɛɛ mɛni nɛ nyɛ je kpo kɛ ya konɛ nyɛ ya hyɛ mɔ? Gbalɔ lo? Ee, i ngɛ nyɛ dee ke, e pe gbalɔ kulaa.
27 Nɔmlɔ nɛ ɔ he nɛ a ngma ngɛ ke: ‘Hyɛ! i ngɛ ye tsɔlɔ ɔ tsɔe kɛ sɛ o hlami,* nɛ e ma dla o blɔ ɔ ngɔ to mo!’ ɔ nɛ.
28 I ngɛ nyɛ dee ke, ngɛ nihi nɛ yihi fɔ mɛ a kpɛti ɔ, nɔ ko be nɛ e pe Yohane, se nɔ nyafii ngɛ Mawu Matsɛ Yemi ɔ mi ɔ pe lɛ.”
29 (Benɛ ni ɔmɛ tsuo kɛ tó tsuli ɔmɛ nu nɔ́ nɛ ɔ, a jaje kaa Mawu ji dalɔ, ejakaa a baptisi mɛ kɛ Yohane baptisimi ɔ.
30 Se Farisi bi ɔmɛ kɛ nihi nɛ a le Mlaa a saminya a bui ga* nɛ Mawu wo mɛ ɔ tue akɛnɛ Yohane baptisii we mɛ ɔ he je.)
31 “Lɛɛ mɛnɔmɛ a he ma ngɔ yi nɔ bi nɛ ɔmɛ kɛ to, nɛ a ngɛ kaa mɛnɔmɛ?
32 A ngɛ kaa jokuɛwi nɛ a hii si ngɛ jua nɔ nɛ a ngɛ a sibi dee ke: ‘Wa kpa bɛ ha nyɛ, se nyɛ dui; wa wo ya, se nyɛ fo we.’
33 Jã kɛ̃ nɛ benɛ Yohane ba a, e yi niye ní, nɛ e nui wai, se nyɛ de ke, ‘Daimonio ngɛ e mi.’
34 Nɔmlɔ Bi ɔ lɛɛ nɛ e ba a, e yeɔ ní, nɛ e nuɔ ní, se nyɛ deɔ ke, ‘Hyɛ! nyumu jiklɔɔtsɛ kɛ wai nulɔ, tó tsuli kɛ yayami peeli a huɛ!’
35 Ngɛ enɛ ɔ tsuo se ɔ, a guɔ juɛmi bimɛ ɔmɛ* tsuo a nɔ kɛ buɔ lɛ dalɔ.”*
36 Jehanɛ ɔ, Farisi bi ɔmɛ a ti nɔ kake de lɛ hluu ke, e kɛ lɛ nɛ ba ye ní. Enɛ ɔ he ɔ, e sɛ Farisi no ɔ we ɔ mi nɛ e ya hi si ngɛ okplɔɔ ɔ he.
37 Nɛ hyɛ! yo ko nɛ nihi le lɛ ngɛ ma a mi kaa e ji yayami peelɔ ɔ ná le kaa e ngɛ ní yee ngɛ Farisi no ɔ we ɔ mi, nɛ e ngɔ alabastro tɔ kɛ e mi nu nɛ e he via kɛ ba.
38 Nɛ e ba da Yesu nane he ngɛ e se je, nɛ e bɔni ya fomi nɛ vo nyu ɔ ngɛ Yesu nane ɔmɛ a nɔ puee, nɛ e ngɔ e yi bwɔmi kɛ tsu. Jehanɛ se hu ɔ, e fĩɔ e nane ɔmɛ a he, nɛ e ngmɛ nu kɛ e he via a ngɔ pue e nane ɔmɛ a nɔ.
39 Benɛ Farisi no ɔ nɛ e tsɛ lɛ ní yemi ɔ na nɔ́ nɛ ɔ, e de ngɛ e yi mi ke: “Ke gbalɔ ji nyumu nɛ ɔ niinɛ ɔ, jinɛ e ko le nɔmlɔ nɛ yo nɛ ɔ nɛ e ngɛ e he tae ɔ ji. E ko le kaa e ji yayami peelɔ.”
40 Se Yesu he nɔ nɛ e de lɛ ke: “Simon, i ngɛ nɔ́ ko nɛ ma de mo.” Simon de ke: “Tsɔɔlɔ, mo de!”
41 “Nyumuhi enyɔ ye sika palɔ ko hiɔ; nɔ kake ye lɛ hiɔ denario 500, se nɔ kake lɛɛ, denario 50.
42 Benɛ a nɛ nɔ́ ko nɛ a kɛ maa wo lɛ hiɔ ɔ, e ngɔ mɛ ni enyɔ ɔmɛ tsuo a hiɔ ɔ kɛ ke mɛ. Enɛ ɔ he ɔ, a ti mɛnɔ lɛ maa suɔ sika palɔ ɔ wawɛɛ?”
43 Simon ha heto ke: “E peeɔ mi kaa nɔ nɛ e ngɔ fuu kɛ ke lɛ ɔ.” Yesu de lɛ ke: “O heto ɔ da.”
44 Kɛkɛ nɛ e plɛ e hɛ mi kɛ tsɔɔ yo ɔ, nɛ e de Simon ke: “Tse o ngɛ yo nɛ ɔ hyɛe? Benɛ i sɛ o we ɔ mi ɔ, o ha we mi nyu nɛ ma kɛ fɔ ye nane he. Se yo nɛ ɔ fo ya nɛ e ngɔ e vo nyu ɔ kɛ pɔ ye nane ɔmɛ a he, nɛ e ngɔ e yi bwɔmi kɛ tsu.
45 O fĩɔ we ye nya he, se yo nɛ ɔ lɛɛ, kɛ je benɛ i ba a, e kpa we ye nane ɔmɛ a he fiɔmi.
46 O pue we ye yi mi nu, se yo nɛ ɔ plɛ nu kɛ e he via kɛ pue ye nane ɔmɛ a he.
47 Enɛ ɔ he ɔ, i ngɛ mo dee ke, e ngɛ mi kaa e yayami ɔmɛ hiɛ babauu* mohu lɛɛ, se a ngɔ lɛ tsuo kɛ pa lɛ, ejakaa suɔmi nɛ e ngɛ ɔ kle. Se nɔ nɛ a maa ngɔ bɔɔ pɛ kɛ pa lɛ ɔ, suɔmi nɛ jamɛatsɛ ɔ ngɛ ɔ pi.”
48 Kɛkɛ nɛ e de yo ɔ ke: “A ngɔ o he yayami ɔmɛ kɛ pa mo.”
49 Nihi nɛ a kɛ lɛ hii si ngɛ okplɔɔ ɔ he ɔ bɔni a sibi bimi ke: “Mɛnɔ ji nyumu nɛ ɔ nɛ e ngɔɔ yayamihi po kɛ paa a?”
50 Se e de yo ɔ ke: “O hemi kɛ yemi ɔ he o yi wami; yaa ngɛ tue mi jɔmi mi.”
Sisi Ningmahi
^ Aloo “ahoyo.”
^ Aloo “tade saminyayoo.”
^ Hela, “nyɛɛ o hɛ mi.”
^ Aloo “blɔ tsɔɔmi.”
^ Aloo “níhi nɛ juɛmi tsuɔ ɔ.”
^ Aloo, “woɔ lɛ nguɔ.”
^ Aloo “kle.”
