Baiblo ɔ bɔ amaniɛ kaa benɛ Media bi ɔmɛ ngɔ Yosef kɛ ho Egipt ya se ɔ, blematsɛ Yakob kɛ e weku ɔ hia kɛ je Kanaan kɛ ho Egipt ya. A ya hi Goshen zugba a nɔ ngɛ Nilo Pa a kasa nya ngɛ Egipt. (1 Mose 47:1, 6) Israel bi ɔmɛ “fɔ babauu nɛ a he hiɛ, . . . a he hu wa saminya.” Enɛ ɔ ha nɛ Egipt bi ɔmɛ ye mɛ gbeye nɛ a nyɛ Israel bi ɔmɛ a nɔ nɛ a ha nɛ a pee nyɔguɛhi.​—2 Mose 1:7-14.

Ni komɛ nɛ a tuɔ munyu kɛ siɔ Baiblo ɔ tsɔɔ kaa Baiblo mi sane nɛ ɔ ji nyazia. Se loloolo ɔ, odase ngɛ nɛ tsɔɔ kaa Shem * nina ye nyɔguɛ ngɛ blema Egipt.

Kaa nɔ hyɛmi nɔ́ ɔ, nihi nɛ a tsuaa si kɛ hlaa blema níhi ɔ ya na he ko nɛ nihi hi hyɛ ngɛ Egipt yiti je. Dr. John Bimson tsɔɔ nya kaa a na odasehi 20 loo nɔ́ nɛ pe jã nɛ tsɔɔ kaa Shem nina hi Egipt yiti je. Jehanɛ hu ɔ, James K. Hoffmeier nɛ e kase Egipt bi a he ní ɔ de ke: “Maa pee jeha 1800 kɛ ya si 1540 L.F.K ɔ, Shem nina nɛ a ngɛ Asia pusinɔ he ɔ hia kɛ ya Egipt ejakaa a bua jɔ lejɛ ɔ he.” E tsa nɔ ke: “Be nɛ ɔ kɛ ‘Be Nɛ Blematsɛmɛ Ɔmɛ Kɛ Hi Si’ ɔ kɔ nɛ níhi nɛ ya nɔ ngɛ jamɛ a be ɔ mi ɔ he munyu nɛ a tu ngɛ Mose Kekleekle Womi ɔ mi ɔ nɛ.”

A na odase kpa ko hu ngɛ Egipt woyi je. A na nyɔguɛhi nɛ a tsu ní ngɛ we ko mi ngɛ Egipt woyi je ɔ a biɛ ngɛ womi nɛ a kɛ ngɔwu pee ɔ nɔ. A ngma womi nɛ ɔ maa pee jeha 2000–1600 L.F.K. Shem nina 40 kɛ se a biɛ piɛɛ biɛ nɛ ɔmɛ a he. Nyɔguɛ nɛ ɔmɛ hooɔ ní, a loɔ ní nɛ a tsuɔ ní kpahi hulɔ. Hoffmeier de ke: “Akɛnɛ Shem nina 40 kɛ se tsuɔ ní ngɛ we kake mi ngɛ Egipt woyi je fã ko nɛ a tsɛɛ ke Thebaid ɔ he je ɔ, wa ma nyɛ ma de ke Shem nina nɛ a ngɛ Egipt, titli ngɛ Nilo Pa a kasa nya a yibɔ ɔ hiɛ bɔ nɛ sa.”

David Rohl nɛ e tsuaa si kɛ hlaa blema níhi ɔ ngma kaa nyɔguɛ nɛ ɔmɛ ekomɛ a biɛ ɔ ngɛ kaa “biɛhi nɛ wa naa ngɛ Baiblo ɔ mi ɔ.” Kaa nɔ hyɛmi nɔ́ ɔ, biɛ komɛ nɛ a na a kɛ biɛ nɛ ɔmɛ kaa Isakar, Asher kɛ Shifra a kɔ. (2 Mose 1:3, 4, 15) Rohl mwɔ e sane ɔ nya ke: “Enɛ ɔ ji odase nɛ maa nɔ mi kaa Israel bi ɔmɛ ye nyɔguɛ ngɛ Egipt.”

Dr. Bimson de ke: “Egipt yi nɔ sane tsɔɔ kaa níhi nɛ Baiblo ɔ de ngɛ Israel bi ɔmɛ nɛ a ya pee nyɔguɛ ngɛ Egipt, kɛ be nɛ a je lejɛ ɔ he ɔ ji anɔkuale.”