1. Mɛni sane wa ma nyɛ ma bi wa he?

ANƐ be komɛ ɔ, wa peeɔ yeyeeye ngɛ níhi nɛ maa ba hwɔɔ se kaa lakpa jami hɛ mi kpatami, Gog nɛ je Magog tuami ɔ kɛ Harmagedon ta a he lo? Anɛ o bi o he sane nɛ ɔ hyɛ lo? ‘Ke behi nɛ a mi wa nɛ ɔmɛ ba a, ma nyɛ ma ya nɔ nɛ ma ye anɔkuale kɛ ya si nyagbe lo?’ Ke sane nɛ ɔ ba o juɛmi mi hyɛ ɔ, lɛɛ Yesu munyu nɛ e tu nɛ ngɛ ngmami ɔ nɛ a ngɔ ní kasemi ɔ kɛ da nɔ ɔ mi ɔ nɛ wa ma susu he ɔ maa ye bua mo wawɛɛ. E de ke: “Nyɛ ko ye tsui. Nyɛ he . . . ye.” (Yoh. 14:1) Hemi kɛ yemi nɛ mi wa maa ye bua wɔ nɛ wa fĩ si ngɛ si fɔfɔɛ fɛɛ si fɔfɔɛ nɛ waa kɛ maa kpe hwɔɔ se ɔ a mi.

2. Mɛni wa ma nyɛ maa pee kɛ wo wa hemi kɛ yemi ɔ mi he wami, nɛ mɛni he wa ma susu ngɛ ní kasemi nɛ ɔ mi?

² Ke wa susuɔ níhi nɛ wa peeɔ amlɔ nɛ ɔ ke waa kɛ wa hemi kɛ yemi he kahi kpe ɔ he ɔ, e maa ye bua wɔ nɛ waa le nɔ́ nɛ wa ma nyɛ maa pee kɛ wo wa hemi kɛ yemi mi he wami. Ke wa susuɔ blɔ nɔ nɛ wa guɔ kɛ daa kahi nɛ waa kɛ kpeɔ ɔ nya a he ɔ, wa ma nyɛ maa le hehi nɛ e sa nɛ waa wo wa hemi kɛ yemi ɔ mi he wami ngɛ. Ke wa da ka ko nya a, e haa nɛ wa hemi kɛ yemi mi waa, nɛ e maa ye bua wɔ nɛ wa nyɛ nɛ wa fĩ si ngɛ kahi nɛ waa kɛ maa kpe hwɔɔ se ɔ a mi. Ngɛ ní kasemi nɛ ɔ mi ɔ, wa ma susu si fɔfɔɛ eywiɛ a mi nɛ e biɔ nɛ Yesu kaseli ɔmɛ nɛ a ná hemi kɛ yemi fuu ɔ he. Lɔ ɔ se ɔ, wa ma susu nɔ́ nɛ wa ma nyɛ maa pee konɛ wa fĩ si ngɛ si fɔfɔɛ kaa jã a mi, kɛ bɔ nɛ e ma dla wɔ kɛ ha níhi nɛ maa ba hwɔɔ se ɔ ha.

3. Ngɛ Mateo 6:30, 33 ɔ nya a, mɛni si fɔfɔɛhi a mi nɛ eko ɔ, e ma bi nɛ wa ha nɛ wa hemi kɛ yemi ɔ mi nɛ wa?

³ Ngɛ anɔkuale mi ɔ, wekuyi fɛɛ wekuyi suɔ nɛ e ha e yo kɛ  e bimɛ niye ní, heha ní, kɛ hwɔ he. Se pi be fɛɛ be nɛ jã peemi ngɛ gbɔjɔɔ ngɛ be nɛ níhi a mi wa nɛ ɔ mi. Wa nyɛmimɛ komɛ a ní tsumi ngmɛɛ mɛ, a bɔ mɔde nɛ a hla ekpa hluu se a nɛ eko. A kpɛti ni komɛ hu kpa ní tsumi komɛ nɛ e sɛ kaa Kristofohi nɛ a tsuɔ tsumi. Ngɛ si fɔfɔɛ kaa kikɛ nɛ ɔmɛ a mi ɔ, e sa nɛ wa ná hemi kɛ yemi nɛ mi wa kaa Yehowa ma ha waa kɛ wa weku ɔ níhi nɛ wa hia a. Yesu ma munyu nɛ ɔ nɔ mi ngɛ e Yoku ɔ Nɔ Fiɛɛmi ɔ Mi. (Kane Mateo 6:30, 33.) Ke wa ngɛ hemi kɛ yemi nɛ mi wa kaa Yehowa be wɔ kuae ɔ, waa kɛ wa juɛmi maa ma e sɔmɔmi nɔ. Ke wa na bɔ nɛ Yehowa ngɛ wɔ ye buae ha a, wa maa na lɛ kaa e ji nɔ ko nɛ ngɛ nitsɛnitsɛ, nɛ wa hemi kɛ yemi ɔ mi maa wa.

4-5. Benɛ weku ko pee yeyeeye ngɛ a hiami níhi a he ɔ, mɛni lɛ ye bua mɛ?

⁴ Mo susu bɔ nɛ weku ko nɛ ngɛ Venezuela a ná Yehowa yemi kɛ buami he se ha benɛ a pee yeyeeye ngɛ a hiami níhi a he ɔ he nɛ o hyɛ. Be ko nɛ be ɔ, Castro weku ɔ tsuɔ ní ngɛ mɛ nitsɛmɛ a ngmɔ mi nɛ a náa sika bɔ nɛ sa kɛ hyɛɛ a he. Kɛkɛ nɛ nyumu komɛ kɛ tuhi ba kpɔ̃ a zugba a ngɛ a dɛ nɛ a fiee mɛ. Miguel nɛ lɛ ji wekuyi ɔ de ke: “Amlɔ nɛ ɔ, wa tsuɔ ní ngɛ nɔ ko zugba nɛ wa ya ba a nɔ. Daa ligbi ɔ, i sɔleɔ kɛ haa Yehowa kaa e ha wɔ níhi nɛ wa hia a ngɛ jamɛ a ligbi ɔ mi.” E ngɛ mi kaa si himi ɔ mi wa kɛ ha Castro weku ɔ mohu lɛɛ, se a ngɛ hemi kɛ yemi nɛ mi wa kaa a hiɔwe Tsɛ ɔ ma ha mɛ a hiami níhi daa ligbi, nɛ a yaa asafo mi kpehi kɛ fiɛɛmi be fɛɛ be. A kɛ Matsɛ Yemi ɔ yeɔ kekleekle blɔ he ngɛ a si himi mi, nɛ Yehowa hu haa mɛ a hiami níhi.

⁵ Benɛ Miguel kɛ e yo Yurai kɛ si fɔfɔɛhi nɛ a mi wa ngɛ kpee ɔ, a ngɔ a hɛ kɛ fɔ bɔ nɛ Yehowa ye bua mɛ ha a nɔ. Be komɛ ɔ, Yehowa guɔ nyɛmimɛ a nɔ kɛ haa mɛ níhi nɛ a hia a aloo a yeɔ bua Miguel konɛ e ná ní tsumi. Be komɛ hu ɔ, Yehowa guɔ asafo ɔ ní tsumi kɔni ɔ nɔ kɛ haa mɛ a hiami níhi. Yehowa kua we mɛ kɔkɔɔkɔ. Enɛ ɔ ha nɛ a na kaa a weku ɔ hemi kɛ yemi ɔ mi ngɛ wae be fɛɛ be. Be ko benɛ a biyo nɔkɔtɔma Yoselin tsɔɔ bɔ nɛ Yehowa ye bua mɛ ha a, e de ke: “Ke i na bɔ nɛ Yehowa ye bua wɔ ha a, e woɔ mi he wami wawɛɛ. I naa lɛ kaa e ji ye huɛ nɛ ma nyɛ ma ngɔ ye hɛ kɛ fɔ e nɔ be fɛɛ be.” E de hu ke: “Nyagbahi nɛ wa weku ɔ gblee mi ɔ dla wɔ kɛ ha haomi nguahi nɛ waa kɛ maa kpe hwɔɔ se ɔ.”

6. Mɛni o ma nyɛ maa pee kɛ wo o hemi kɛ yemi ɔ mi he wami ke o kɛ sika he nyagba ngɛ kpee?

⁶ Anɛ o kɛ sika he nyagba ngɛ kpee lo? Ke jã a, lɛɛ o ná we lɛ gbɔjɔɔ kulaa. Se o ma nyɛ maa ngɔ be nɛ ɔ kɛ fia o hemi kɛ yemi ɔ kɛ ma si. Moo sɔle nɛ o kane Yesu munyuhi nɛ ngɛ Mateo 6:25-34 ɔ nɛ o pue o yi mi tɛ ngɛ he. Mo susu nɔ́ hyɛmi níhi nɛ ngɛ mwɔnɛ ɔ nɛ tsɔɔ bɔ nɛ Yehowa ye bua nihi nɛ a kɛ teokrase ní tsumihi ye kekleeke blɔ he ha a he. (1 Kor. 15:58) Ke o pee jã a, o ma ná nɔ mi mami nɛ mi wa kaa o hiɔwe Tsɛ ɔ maa ye bua mo kaa bɔ nɛ e ye bua nihi nɛ a kɛ jamɛ a si fɔfɔɛ ɔ eko kpe ɔ. E le  níhi nɛ o hia nɛ e le blɔ nɔ nɛ e maa gu kɛ tsu he ní. Ke o na bɔ nɛ Yehowa ngɛ mo ye buae ha amlɔ nɛ ɔ, o hemi kɛ yemi ɔ mi maa wa nɛ o ma nyɛ maa da kahi nɛ a mi wa pe jã po a nya hwɔɔ se.—Hab. 3:17, 18.

7. Ngɛ Mateo 8:23-26 nya a, mɛni blɔ nɔ nɛ “kɔɔhiɔ ngua ko” ka Yesu kaseli ɔmɛ a hemi kɛ yemi?

⁷ Benɛ Yesu kɛ e kaseli ɔmɛ kɛ kɔɔhiɔ ngua ko ya kpe ngɛ wo ɔ nɔ ɔ, Yesu ngɔ jamɛ a si fɔfɔɛ ɔ kɛ ye bua e kaseli ɔmɛ konɛ a na hehi nɛ a hia hemi kɛ yemi fuu ngɛ. (Kane Mateo 8:23-26.) Be mi nɛ kɔɔhiɔ ngua a ngɛ fiae ɔ, Yesu lɛɛ e hwɔɔ mahe fuaa, se e kaseli ɔmɛ lɛɛ a ye gbeye nɛ a tsɛ̃ɛ lɛ kaa e he a yi wami. A Nyɔmtsɛ ɔ bi mɛ ke: “Mɛni he je nɛ nyɛ ngɛ gbeye yee kikɛ nɛ ɔ? Nyɛ hemi kɛ yemi pi pɛ.” E sa nɛ kaseli ɔmɛ nɛ gbeye nu mɛ ɔ ko le kaa Yehowa ma nyɛ maa po a kɛ Yesu a he piɛ nɛ nɔ́ ko be mɛ awi yee. Mɛni wa ma nyɛ maa kase ngɛ sane nɛ ɔ mi? Hemi kɛ yemi nɛ mi wa ma nyɛ maa ye bua wɔ nɛ waa da “kɔɔhiɔ ngua” nya loo si fɔfɔɛhi nɛ a ngɛ kaa kɔɔhiɔ ngua a nya.

8-9. Mɛni blɔ nɔ nɛ Anel kɛ e hemi kɛ yemi ɔ he ka kpe, nɛ mɛni lɛ ye bua lɛ nɛ e nyɛ nɛ e da nya?

⁸ Nyɛmiyo ko nɛ e sɛ we gba si himi mi nɛ a tsɛɛ lɛ ke Anel nɛ e je Puerto Rico ɔ nyɛ nɛ e da nyagba ko nɛ mi wa nya, nɛ lɔ ɔ wo e hemi kɛ yemi ɔ mi he wami. Nyɛ ha nɛ wa susu e nɔ hyɛmi nɔ́ ɔ he nɛ waa hyɛ. “Kɔɔhiɔ ngua” nitsɛnitsɛ ji ka nɛ e kɛ kpe ɔ nɛ. E ka a je sisi ngɛ jeha 2017 ɔ mi benɛ kɔɔhiɔ nɛ nya wa nɛ a tsɛɛ ke Hurricane Maria a fia nɛ e kpata e we ɔ hɛ mi ɔ. Enɛ ɔ ha nɛ e ní tsumi hu je e dɛ. Anel de ke: “Benɛ i kɛ si fɔfɔɛhi nɛ a mi wa nɛ ɔmɛ ngɛ kpee ɔ, i ngɔ ye hɛ kɛ fɔ Yehowa nɔ kɛ gu sɔlemi nɔ. Nɛ i ha we nɛ yeyeeye peemi nɛ ha nɛ ma gbɔjɔ.”

⁹ Anel tsɔɔ kaa nɔ́ kpa ko nɛ ye bua lɛ nɛ e nyɛ da e nyagba a nya ji tue bumi nɛ e pee. E de ke: “Blɔ tsɔɔmi nɛ Yehowa asafo ɔ kɛ ha nɛ i nyɛɛ se ɔ ye bua mi nɛ i pee kpoo. I ba yɔse hu kaa Yehowa gu nyɛmimɛ a nɔ kɛ wo mi he wami, nɛ a ha mi níhi nɛ i hia a konɛ ma hi wami mi.” E de hu ke: “Yehowa ha mi babauu pe bɔ nɛ i bi lɛ ɔ po, nɛ ye hemi kɛ yemi hu mi ba wa wawɛɛ.”

10. Ke o kɛ si fɔfɔɛ ko nɛ ngɛ kaa “kɔɔhiɔ ngua ko” ngɛ kpee ɔ, mɛni o ma nyɛ maa pee?

¹⁰ Anɛ o kɛ “kɔɔhiɔ ngua ko” ngɛ kpee ngɛ o si himi mi lo? Eko ɔ, adebɔ mi oslaa ha nɛ o ngɛ nɔ́ nae, aloo eko ɔ, hiɔ ko nɛ nya wa nɛ ngɛ kaa kɔɔhiɔ ngua ha nɛ o kɔni mi jɔ̃ nɛ o li nɔ́ nɛ o maa pee. Eko ɔ, o maa pee yeyeeye be komɛ, se ko ha nɛ yeyeeye peemi nɛ ɔ nɛ tsi o nya ngɛ o hɛ nɛ o kɛ maa fɔ Yehowa nɔ ɔ he. Moo hɛ kɛ su Yehowa he kɛ gu sɔlemi nɔ. Moo wo o hemi kɛ yemi ɔ mi he wami kɛ gu o yi mi tɛ nɛ o ma pue ngɛ bɔ nɛ Yehowa ye bua mo ha be ko nɛ be ɔ nɔ. (La 77:11, 12) O ma nyɛ ma ná nɔ mi mami kaa Yehowa be mo kuae gblegbleegble.

11. Mɛni he je nɛ e sa nɛ waa fia wa pɛɛ si kaa wa maa bu nihi nɛ a nyɛɛɔ asafo ɔ hɛ mi ɔ tue ɔ?

 ¹¹ Mɛni ji nɔ́ kpa ko nɛ ma nyɛ maa ye bua mo kɛ da kahi a nya? Kaa bɔ nɛ Anel tsɔɔ ɔ, tue bumi maa ye bua mo. Mo ná hɛ kɛ nɔ fɔmi ngɛ nihi nɛ Yehowa kɛ Yesu ngɛ a mi hɛ kɛ nɔ fɔmi ɔ a mi. Be komɛ ɔ, nihi nɛ a hla kaa a nyɛɛ asafo ɔ hɛ mi ɔ kɛ blɔ tsɔɔmi ko ma ha nɛ eko ɔ, wa maa na lɛ kaa nile be mi. Se ke wa bu mɛ tue ɔ, Yehowa maa jɔɔ wɔ. Mawu Munyu ɔ kɛ nyɛmimɛ a níhi a si kpamihi haa nɛ wa naa kaa tue bumi he ɔ nɔ yi wami. (2 Mose 14:1-4; 2 Kron. 20:17) Mo pue o yi mi tɛ ngɛ nɔ hyɛmi ní nɛ ɔmɛ a he. Jã nɛ o maa pee ɔ maa wo mo he wami nɛ o ya nɔ nɛ o fĩ Yehowa asafo ɔ se amlɔ nɛ ɔ kɛ hwɔɔ se. (Heb. 13:17) Ke o pee jã a, o be amanehlu ngua nɛ e be kɛe nɛ e maa ba a gbeye yee.—Abɛ 3:25.

12. Ngɛ Luka 18:1-8 ɔ nya a, mɛni blɔ nɔ nɛ hemi kɛ yemi ma nyɛ maa ye bua wɔ nɛ wa fĩ si ke a yi wɔ dami sane?

¹² Yesu le kaa dami sane nɛ a be yee ɔ maa ka e kaseli ɔmɛ a hemi kɛ yemi. Bɔ nɛ pee nɛ e ye bua mɛ nɛ a nyɛ nɛ a da nya a, e kɛ nɔ́ he tomi nɔ́ nɛ a ngma ngɛ Luka womi ɔ mi ɔ tsu ní. Yesu tu yalɔyo ko nɛ e ya nɔ nɛ e kpa kojolɔ ko nɛ e yi dami sane ɔ pɛɛ kaa e ye dami sane ha lɛ. Yalɔyo ɔ ngɛ nɔ mi mami kaa ke e kɔni mi jɔ̃ we ɔ, kojolɔ ɔ maa ye dami sane ha lɛ. Nyagbenyagbe ɔ, kojolɔ ɔ kplɛɛ e ní bimi ɔ nɔ ha lɛ. Mɛni wa kaseɔ ngɛ mi? Yehowa a pi nɔ nɛ e dɛ ji lɛ. Se Yesu de ke: “Ngɛ anɔkuale mi ɔ, . . . ke a kpaa ngmlaa kɛ tsɛɔ lɛ nyɔ kɛ pia a, anɛ e be dami sane yee ha mɛ lo?” (Kane Luka 18:1-8.) Yesu de hu ke: “Ke nɔmlɔ Bi ɔ ba a, ngɛ anɔkuale mi ɔ, anɛ e maa na hemi kɛ yemi nɛ ɔ ngɛ zugba a nɔ lo?” Ke a yi wɔ dami sane ɔ, e sa nɛ waa to wa tsui si nɛ wa fĩ si kɛ tsɔɔ kaa wa ngɛ hemi kɛ yemi kaa yalɔyo ɔ. Ke wa ngɛ hemi kɛ yemi kaa jã a, wa ma nyɛ ma ná nɔ mi mami kaa Yehowa ma tsu wa sane ɔ he ní ha wɔ amlɔ nɛ ɔ loo pee se. Jehanɛ nɛ ɔ, e sa nɛ wa he ye kaa sɔlemi ngɛ he wami. Be komɛ ɔ, Yehowa ma ha wa sɔlemihi a heto bɔ nɛ wa hyɛ we blɔ.

13. Kɛ sɔlemi ye bua weku ko nɛ a yi mɛ dami sane ɔ ha kɛɛ?

¹³ Mo susu nyɛmiyo ko nɛ a tsɛɛ lɛ ke Vero nɛ e ngɛ Democratic Republic of Congo ɔ níhi a si kpami he nɛ o hyɛ. Ta buli ba tua a kɔpe ɔ, enɛ ɔ he ɔ, e he ba hia nɛ Vero kɛ e huno nɛ e pi Odasefo no ɔ, kɛ a biyo nɛ e ye jeha 15 ɔ nɛ a tu fo. Benɛ a ngɛ blɔ ɔ nɔ kɛ yaa a, a ya su he ko nɛ ta buli tsi blɔ ngɛ, nɛ ta buli ɔmɛ nɛ a ngɛ lejɛ ɔ wo a he gbeye kaa a maa gbe mɛ. Benɛ Vero bɔni ya fomi ɔ, e biyo ɔ bɔ mɔde kaa e maa jɔɔ e tsui he kɛ gu sɔlemi nɛ e sɔle nɛ e kɛ Yehowa biɛ tsu ní ngɛ mi si abɔ ɔ nɔ. Benɛ e sɔle ta a, ta buli ɔmɛ a nɔkɔtɔma a bi lɛ ke, “Jokuɛyo, mɛnɔ tsɔɔ mo bɔ nɛ a sɔleɔ ha?” E de ke, “Ye yayo nɛ tsɔɔ mi, nɛ e da Mateo 6:9-13 ɔ nɔ kɛ pee jã.” Ta buli ɔmɛ a nɔkɔtɔma a de lɛ ke, “Jokuɛyo, o kɛ o fɔli ɔmɛ nyɛɛ ya ngɛ tue mi jɔmi mi nɛ Yehowa o Mawu ɔ nɛ po nyɛ he piɛ!”

14. Mɛni ma nyɛ maa ka wa hemi kɛ yemi ɔ, nɛ mɛni maa ye bua wɔ nɛ waa da nya?

 ¹⁴ Níhi a si kpahi nɛ ɔmɛ tsɔɔ wɔ kaa e sɛ nɛ waa bu sɔlemi kaa e ji nɔ́ nyafii. Se ke a ha we o sɔlemihi a heto mla kaa bɔ nɛ o ngɛ hlae loo ngɛ blɔ nɛ o ngɛ hlae ɔ nɔ hu nɛɛ? Kaa bɔ nɛ yalɔyo ɔ nɛ ngɛ Yesu nɔ́ he tomi nɔ́ ɔ mi ɔ pee ɔ, yaa nɔ nɛ o sɔle, nɛ o ná nɔ mi mami kaa Yehowa be mo kuae, nɛ ngɛ be nɛ sa mi ɔ, e ma ha o sɔlemi ɔ heto. Yaa nɔ nɛ o sɔle kɛ bi Yehowa mumi klɔuklɔu ɔ. (Filip. 4:13) Mo kai kaa e be kɛe nɛ Yehowa maa jɔɔ mo babauu nɛ o hɛ maa je o haomi ɔmɛ tsuo a nɔ. Ke Yehowa ye bua mo nɛ o nyɛ nɛ o da kahi a nya amlɔ nɛ ɔ, e maa wo mo he wami nɛ o ma nyɛ maa da kahi nɛ o kɛ maa kpe hwɔɔ se ɔ hu a nya.—1 Pet. 1:6, 7.

15. Kaa bɔ nɛ Mateo 17:19, 20 ɔ tsɔɔ ɔ, mɛni nyagba nɛ Yesu kaseli ɔmɛ kɛ kpe?

¹⁵ Yesu tsɔɔ e kaseli ɔmɛ kaa hemi kɛ yemi maa ye bua mɛ nɛ a da si fɔfɔɛhi nɛ a mi wa a nya. (Kane Mateo 17:19, 20.) Be ko ɔ, Yesu kaseli ɔmɛ nyɛ we nɛ a hia mumi yayami ngɛ nyumu ko mi, e ngɛ mi kaa a nyɛ nɛ a pee jã be ko nɛ be ɔ. Mɛni ji nyagba a? Yesu tsɔɔ kaa a hia hemi kɛ yemi fuu. E de mɛ kaa ke a ngɛ hemi kɛ yemi bɔ nɛ sa a, a ma nyɛ ma tsu nyagbahi nɛ a ngɛ kaa yokuhi ɔ a he ní! Wɔ hu waa kɛ nyagbahi nɛ a ngɛ kaa yokuhi ɔ kpeɔ.

16. Kɛ hemi kɛ yemi ye bua Geydi nɛ e nyɛ nɛ e da haomi nɛ nya wa nɛ ba e nɔ ɔ nya ha kɛɛ?

¹⁶ Mo susu nyɛmiyo ko nɛ a tsɛɛ lɛ ke Geydi nɛ e je Guatemala nɔ hyɛmi nɔ́ ɔ he nɛ o hyɛ. Ligbi ko nɛ e kɛ e huno Edi a je asafo mi kpe kɛ yaa we mi ɔ, a ya gbe e huno ɔ ngɛ blɔ ɔ nɔ. Kɛ Geydi hemi kɛ yemi ɔ ye bua lɛ nɛ e nyɛ nɛ e da aywilɛho nɛ nya wa nɛ ɔ nya ha kɛɛ? E de ke: “Sɔlemi yeɔ bua mi nɛ i ngɔɔ ye haomi ɔmɛ kɛ fɔɔ Yehowa nɔ nɛ i náa tue mi jɔmi. I naa kaa Yehowa guɔ ye weku li kɛ ye huɛmɛ nɛ a ngɛ asafo ɔ mi ɔ a nɔ kɛ hyɛɛ ye nɔ. Ye he nɛ i kɛ wo Yehowa sɔmɔmi mi vii ɔ ye bua mi nɛ ye haomi ɔ nya ba si, nɛ i hɛwi ngɛ hwɔɔ he tsɔ. Benɛ i gblee si fɔfɔɛ nɛ ɔ mi se ɔ, i ba na kaa ka fɛɛ ka nɛ ma kɛ kpe hwɔɔ se ɔ, ma nyɛ ma da nya ngɛ Yehowa, Yesu, kɛ Yehowa asafo ɔ yemi kɛ buami nya.”

17. Mɛni wa ma nyɛ maa pee ke waa kɛ si fɔfɔɛ ko nɛ mi wa kaa yoku ɔ kpe?

¹⁷ Anɛ o suɔlɔ ko gbo nɛ o ngɛ aywilɛho yee lo? Mo ná be kɛ kane nihi nɛ a tle mɛ si kɛ je gbeje nɛ a tu a he munyu ngɛ Baiblo ɔ mi ɔ a he ní nɛ o kɛ wo o hemi kɛ yemi ɔ mi he wami. Anɛ o weku no ko nɛ a fiee lɛ kɛ je asafo ɔ mi ɔ ha nɛ o ngɛ aywilɛho yee lo? Moo kase ní nɛ o ná nɔ mi mami kaa blɔ nɛ Yehowa guɔ nɔ kɛ tsɔseɔ nɔ ɔ hi be fɛɛ be, nɛ e se be. Moo na nyagba fɛɛ nyagba nɛ o kɛ ngɛ kpee ɔ kaa e ji he blɔ nɛ o kɛ maa fia o hemi kɛ yemi ɔ kɛ ma si. Moo je o tsui mi nɛ o sɔle kɛ ha Yehowa. Ko tsɔ o he banee, mohu ɔ, o kɛ o nyɛmimɛ nyumuhi kɛ yihi nɛ bɔ. (Abɛ 18:1) Moo pee níhi nɛ  maa ye bua mo konɛ o nyɛ nɛ o fĩ si, ke e ma bi nɛ o fo ya po. (La 126:5, 6) Moo ya asafo mi kpehi kɛ fiɛɛmi be fɛɛ be nɛ o kane Baiblo ɔ daa ligbi. Moo ngɔ o juɛmi kɛ ma jɔɔmihi nɛ a se be nɛ Yehowa ngɛ kɛ ha mo ɔ nɔ. Ke o na bɔ nɛ Yehowa ngɛ mo ye buae ha a, hemi kɛ yemi nɛ o ngɛ ɔ mi maa hi wae be fɛɛ be.

18. Ke o yɔse kaa o hemi kɛ yemi ɔ mi wɛ kpakpa ko ɔ, mɛni o ma nyɛ maa pee?

¹⁸ Ke ka ko nɛ o kɛ kpe be ko nɛ be loo ka ko nɛ o kɛ ngɛ kpee amlɔ nɛ ɔ ha nɛ o na kaa o hemi kɛ yemi mi wɛ kpakpa ko ɔ, o kɔni mi nɛ ko jɔ̃. Moo na lɛ kaa e ji he blɔ nɛ o ná nɛ o kɛ maa wo o hemi kɛ yemi mi he wami. Mo bi nɔ́ nɛ Yesu bɔfo ɔmɛ bi ɔ. A de ke: “Ha wɔ hemi kɛ yemi fuu.” (Luka 17:5) Jehanɛ hu ɔ, mo pue o yi mi tɛ ngɛ nɔ hyɛmi níhi nɛ wa susu a he ngɛ ní kasemi nɛ ɔ mi ɔ a he. Kaa bɔ nɛ Miguel kɛ Yurai pee ɔ, mo pue o yi mi tɛ ngɛ si fɔfɔɛhi tsuo nɛ Yehowa ye bua mo ngɛ mi ɔ a he. Kaa bɔ nɛ Vero biyo ɔ kɛ Anel pee ɔ, moo sɔle wawɛɛ, titli ke o kɛ haomi nɛ mi wa ngɛ kpee. Nɛ kaa bɔ nɛ e ji ngɛ Geydi blɔ fa mi ɔ, mo kai kaa Yehowa ma nyɛ maa gu weku li kɛ huɛmɛ a nɔ kɛ ha mo o hiami níhi. Ke o ha nɛ Yehowa ye bua mo nɛ o nyɛ da kahi nɛ o kɛ ngɛ kpee amlɔ nɛ ɔ a nya a, o ma ná nɔ mi mami kaa e maa ye bua mo nɛ o fĩ si ngɛ ka fɛɛ ka nɛ eko ɔ, o kɛ maa kpe hwɔɔ se ɔ a mi.

19. Mɛni nɔ mi mami Yesu ná, nɛ mɛni nɔ mi mami mo hu o ma nyɛ ma ná?

¹⁹ Yesu tsɔɔ e kaseli ɔmɛ hehi nɛ a hia hemi kɛ yemi fuu ngɛ, se e ji he atsinyɛ kaa Yehowa maa ye bua mɛ nɛ a da kahi nɛ a kɛ maa kpe hwɔɔ se ɔ a nya. (Yoh. 14:1; 16:33) E ngɛ nɔ mi mami kaa hemi kɛ yemi nɛ mi wa maa ye bua asafo kuu ngua ko konɛ a nyɛ nɛ a gblee amanehlu ngua a nɛ e be kɛe nɛ e maa ba a mi slɔkee. (Kpoj. 7:9, 14) Anɛ o maa piɛɛ asafo kuu ngua nɛ ɔ he lo? Ngɛ Yehowa yemi kɛ buami nya a, o ma nyɛ maa piɛɛ a he ke o pee nɔ́ fɛɛ nɔ́ nɛ o ma nyɛ amlɔ nɛ ɔ kɛ wo o hemi kɛ yemi ɔ mi he wami!—Heb. 10:39.