KE O suɔlɔ ko gbo hyɛ ɔ, eko ɔ, mo hu o kɛ si fɔfɔɛ slɔɔtohi kaa kɔmɔ yemi kɛ hɛ ja kpe hyɛ, aloo eko po ɔ, o nu he kaa o be yemi kɛ bualɔ ko. Eko ɔ, mo hu o mi mi fu, o he nile bu mo fɔ, nɛ o ye gbeye hulɔ. Eko po ɔ, o ma bi ke ji kaa e he hia nɛ o hi wami mi.

Ngɛ anɔkuale mi ɔ, ke o ye kɔmɔ be kɛkɛɛ po ɔ, e tsɔɔ we kaa o tɔ̃. Mohu ɔ, e tsɔɔ bɔ nɛ o susuɔ o suɔlɔ nɛ e gbo ɔ he ha. Se kɛ̃ ɔ, anɛ kɔmɔ yemi ma nyɛ ma gbɔ dɔdɔɛ ɔ nɔ lo?

Ke o nuɔ he kaa dɔdɔɛ ɔ se pui hu nɛɛ? Lɛɛ eko ɔ, ga womihi nɛ nyɛɛ se nɛ ɔmɛ ma nyɛ maa wo o bua:

MOO YE KƆMƆ BƆ NƐ SA

E slo bɔ nɛ nɔ fɛɛ nɔ yeɔ kɔmɔ ha, kɛ be abɔ nɛ e kɛ peeɔ jã. Se kɛ̃ ɔ, ya fomi ma nyɛ ma gbɔ yeyee nɛ o nuɔ he ngɛ o mi ɔ nɔ. Vanessa nɛ a wo e ta kɛ sɛ hlami ɔ de ke: “I foɔ ya wawɛɛ; e sa nɛ ma je dɔdɔɛ ɔ kɛ je ye mi.” Sofía, nɛ e nyɛmiyo gbo tlukaa a de ke: “Ke i susu nɔ́ nɛ ba a he ɔ, e dɔɔ mi wawɛɛ. E ngɛ kaa bɔ nɛ a tsɔɔ pa a. E yee nɔ wawɛɛ nitsɛ, se e haa nɛ pa a gbo ɔ.”

MOO TU BƆ NƐ E PEEƆ MO HAA HE MUNYU

Sisi numi ngɛ he kaa be komɛ ɔ, o maa suɔ nɛ mo pɛ o maa hi he ko banee. Se aywilɛho yemi ji tlomi ko nɛ e mi jiɔ wawɛɛ nɛ mo nɔ kake too o be nyɛe  maa tloo. Jared nɛ e ye jeha nyɔngma kɛ kpaago nɛ e papaa gbo ɔ, de ke: “I deɔ ni kpahi bɔ nɛ e peeɔ mi ha. Behi fuu ɔ, e peeɔ mi kaa sisi numi be nɔ́ nɛ i ngɛ deɔ he, se ye bua jɔɔ kaa i kɛ ni kpahi sɛɛɔ he ní.” Janice nɛ a wo e ta kɛ sɛ hlami ɔ kpale de ke: “Ke i kɛ ni kpahi sɛɛ ye nyagba a he ní ɔ, i náa bua womi. I nuɔ he kaa a nu mi sisi, nɛ a maa ye bua mi kɛ da nya.”

MOO KPLƐƐ YEMI KƐ BUAMI NƆ

Dɔkita ko de ke: “Ke nɔ nɛ ngɛ aywilɛho yee ɔ kplɛɛ yemi kɛ buami nɛ e huɛmɛ kɛ e weku li kɛ haa lɛ ɔ nɔ amlɔ nɔuu ɔ, e he wɛ kulaa kaa e maa da si fɔfɔɛ ɔ nya.” Ha nɛ o huɛmɛ nɛ a le nɔ́ pɔtɛɛ nɛ a ma nyɛ maa pee kɛ ye bua mo; a suɔ nɛ a ye bua mo, se a be lee nɔ́ tutuutu nɛ a maa pee kɛ ye bua.​—Abɛ 17:17.

MOO HƐ MO KƐ SU MAWU HE

Tina de ke: “Benɛ Kansa gbe ye huno ɔ, i nyɛ we nɛ ma de lɛ ye nyagba amɛ, ye haomi ɔmɛ kɛ bɔ nɛ i nuɔ he ha a hu, lɔ ɔ he ɔ, i deɔ Mawu nɔ́ fɛɛ nɔ́! Daa ligbi ɔ, i biɔ lɛ kaa e ye bua mi konɛ ma nyɛ ma tsu níhi a he ní saminya ngɛ ligbi ɔ mi. Mawu ye bua mi wawɛɛ ngɛ blɔhi fuu a nɔ.” Tarsha, nɛ e yayo gbo benɛ e ye jeha 22 ɔ de ke: “Baiblo ɔ nɛ i kaneɔ daa ligbi ɔ ji nɔ́ nɛ wo ye bua. E haa nɛ i susuɔ níhi nɛ maa wo mi he wami ɔ a he.”

MOO PO GBOGBOEHI A SI TLEMI Ɔ HE FONI

Tina de hu ke: “Sisije ɔ, hɛ nɔ kami nɛ i ngɛ ngɛ gbogboehi a si tlemi ɔ mi ɔ wui ye bua ejakaa i hia ye huno ɔ nɛ ye binyumu ɔmɛ hu hia a papaa wawɛɛ nitsɛ. Ngɛ anɔkuale mi ɔ, jeha eywiɛ be, nɛ amlɔ nɛ ɔ lɛɛ i pɛtɛ hɛ nɔ kami nɛ ɔ he wawɛɛ nitsɛ. E woɔ ye bua nɛ i nyɛɔ fĩɔ si. I poɔ he foni kaa ma na lɛ ekohu, nɛ enɛ ɔ haa nɛ i náa tue mi jɔmi kɛ bua jɔmi!”

Ngɛ anɔkuale mi ɔ, o be nyɛe ma ná bua womi amlɔ nɔuu. Se kɛ̃ ɔ, Vanessa níhi a si kpami ɔ ma nyɛ maa ye bua. E de ke: “O ma susu kaa o be bua jɔmi nae hu kɔkɔɔkɔ. Se bɔɔbɔɔbɔɔ ɔ, o maa gblee si fɔfɔɛ ɔ mi nɛ o ma ná bua jɔmi.”

Mo kai kaa, o hɛ ma nyɛ ma ja ngɛ o suɔlɔ ɔ he mohu lɛɛ, se o ma nyɛ ma ná bua jɔmi ngɛ si himi mi. Akɛnɛ Mawu ngɛ suɔmi kɛ ha wɔ he je ɔ, waa kɛ lɛ ma nyɛ ma ná huɛ bɔmi konɛ wa ná bua jɔmi ngɛ si himi mi. E be kɛe Mawu ma tle nihi nɛ a gbo ɔ tsuo si. E suɔ nɛ o na o suɔli nɛ a gbo ɔ tsuo ekohu. Nɛ kɔmɔ kɛ aywilɛho nɛ o ngɛ yee ɔ se maa po kɛ maa ya neneene!