Anɛ wa ma nyɛ ma ná nɔ mi mami kaa Mawu si womihi tsuo maa ba mi lo? Yesu ngɛ nɔ mi mami ngɛ Mawu si womi ɔmɛ a mi, nɛ e ní tsɔɔmi ɔ hu ha nɛ e tue buli ɔmɛ a hemi kɛ yemi mi wa. Mo susu nɔ́ he tomi nɔ́ nɛ Yesu kɛ tsu ní ngɛ e Yoku ɔ Nɔ Fiɛɛmi ɔ mi nɛ a ngma ngɛ Mateo 5:18 ɔ he nɛ o hyɛ. Lejɛ ɔ de ke: “Niinɛ, i ngɛ nyɛ dee ke, be abɔ nɛ hiɔwe kɛ zugba ngɛ nɛ ɔ, a be nɔ́ nyafii tslɛ [ningma okadi nyafii pe kulaa kake] po jee kɛ je mlaa a mi kɛ ya si a maa gbe nɔ́ tsuaa nɔ́ nya.”

Ningma okadi nyafii pe kulaa ngɛ Hebri ningma okadi ɔmɛ a kpɛti ji י (yod). Nɛ e ji ningma okadi nɛ je Tetragrammaton ɔ sisi. Tetragrammaton ɔ ji bɔ nɛ a ngmaa Mawu biɛ nɛ ngɛ klɔuklɔu nɛ ji Yehowa a ngɛ Hebri gbi mi. * Womi ngmali ɔmɛ kɛ Farisi bi ɔmɛ buɔ ningma okadihi nɛ a kɛ tsu ní ngɛ Mawu mlaa a mi ɔ saminya, nɛ a naa ‘ningma okadi nyafii pe kulaa kake’ po kaa nɔ́ ko nɛ e he hia wawɛɛ.

Yesu ngɛ tsɔɔe kaa e ma nyɛ maa ba kaa hiɔwe kɛ zugba maa be kɛ ho, se Mlaa a mi munyu nyafii pe kulaa po be laae, e maa ba mi kokooko. Se kɛ̃ ɔ, Ngmami ɔ ha wɔ hɛ kɛ nɔ fɔmi kaa hiɔwe kɛ zugba nɛ wa naa nɛ ɔ maa hi si daa. (La 78:69) Lɔ ɔ he ɔ, munyu nɛ ɔ maa nɔ mi kaa Mlaa a mi munyu nyafii pe kulaa po maa ba mi kokooko.

Anɛ Yehowa Mawu hyɛɛ blɔ kaa waa kɛ mlaa a mi oti nyafinyafi ɔmɛ nɛ tsu ní lo? Ee. Mo susu munyu nɛ nyɛɛ se nɛ ɔ he nɛ o hyɛ: A de blema Israel bi ɔmɛ ke a ko ywia Hetsɔmi to bi ɔ wu ɔ eko. (2 Mose 12:46) Eko ɔ, oti nyafinyafi ɔmɛ eko ji nɛ ɔ nɛ. Anɛ a nu nɔ́ he je nɛ e sɛ nɛ a ywia wu ɔ eko ɔ sisi lo? E ma nyɛ maa ba kaa a nui sisi. Yehowa Mawu le kaa munyu nɛ ɔ ji gbami nɛ maa ba mi ngɛ Mesia a blɔ fami. Ejakaa ke a gbe Mesia a ngɛ sɛumi tso ɔ nɔ ɔ, a be e wu ko kue.​—La 34:20; Yohane 19:31-33, 36.

Mɛni nɛ Yesu munyu ɔ tsɔɔ wɔ? Wɔ hu wa ma nyɛ ma ná nɔ mi mami kaa Yehowa Mawu si womihi tsuo maa ba mi kokooko. Hyɛ bɔ nɛ Hebri ningma okadi nyafii pe kulaa a haa wɔ hɛ nɔ kami ha!