SARA tsu ní nɛ pɔ tɔ e he nɛ e wo e yi nɔ kɛ ngɛ nɔ́ ko hyɛe ngɛ tsitsaa. E to e sɔmɔli ɔmɛ a he blɔ nya saminya nɛ lɔ ɔ ha nɛ a kɛ bua jɔmi ngɛ ní tsue. Lɛ nitsɛ hu e kɛ e he wo ní tsumi ɔ mi. Moo po si fɔfɔɛ nɛ ɔ he foni ngɛ o juɛmi mi nɛ o hyɛ. Pɔ tɔ Sara he nɛ e ngɛ e nine nguɛ ɔmɛ gbɔlee. Eko ɔ, a bo tsu ɔ he komɛ gba nɛ e gbo dengme kɛ kpɛ hehi nɛ gba a tsuo. A kɛ to he womi nɛ pee bo tsu nɛ ɔ. Bo tsu ɔmɛ a se kɛ, nɛ pu kɛ hiɔmi nɛ nɛɛ ɔ ha nɛ a hɛ mi kpa. Enɛ ɔ kai Sara kaa a je blɔ hiami ɔ sisi kɛ. Amlɔ nɛ ɔ, pu ɔ yaa nɔ si, nɛ e be kɛe nɛ du ma bu. Kɛ je mɔtu nɛ Abraham * je we ɔ mi ɔ, e bɛ lolo, nɛ Sara ngɛ blɔ ɔ nɔ hyɛe kaa e maa na lɛ nɛ e ma lo. Benɛ e na nɔ ko nɛ ma jee kaa e huno ɔ, e tsui nɔ e mi nɛ e muɔ hɛlii.

Jeha nyɔngma kɛ se ji nɛ ɔ nɛ Abraham kpaka e weku ɔ tsuo kɛ po Yufrate Pa a kɛ ho Kanaan zugba a nɔ ya. E ngɛ mi kaa Sara li he nɛ a yaa a mohu lɛɛ se e fĩ e huno ɔ se. E le kaa Yehowa si womi kɛ kɔ nina nɛ a jɔɔ kɛ ma ko nɛ maa ba a he ɔ maa sa e huno ɔ he. Anɛ e maa sa Sara hu he lo? Yosa ji lɛ, nɛ amlɔ nɛ ɔ e ye jeha 75. Eko ɔ, e ma susu kaa, ‘Nɛ́ imi ji Abraham yo ɔ, lɛɛ kɛ Yehowa si womi nɛ ɔ ma plɛ kɛ bami ha kɛɛ?’ Eko ɔ, si womi ɔ se ngɛ kɛe ha lɛ tsɔ. Sisi numi ngɛ he kaa e ma susu jã.

Be komɛ ɔ, wɔ hu eko ɔ, wa susuɔ be nɛ Mawu si womihi ma ba mi ɔ a he. Ke wa ngɛ si womi ko nɛ wa bua jɔ he blɔ hyɛe ɔ, e yee kaa wa maa to wa tsui si. Mɛni wa ma nyɛ maa kase ngɛ Sara hemi kɛ yemi ɔ mi?

Abraham weku ɔ tsuo hia kɛ je Egipt. (1 Mose 13:1-4) A ya to si ngɛ yoku ko nɔ ngɛ Betel puje he blɔ. Kanaan bi tsɛɛ Betel ma a ke Luz. Akɛnɛ a ngɛ yoku nɔ he je ɔ, eko ɔ Sara ma nyɛ maa na Si Womi Zugba a nɔ. Kɔpehi fuu ngɛ lejɛ ɔ, nɛ gbɛjegbɛhi ngɛ nɛ blɔ hiali guu nɔ kɛ yaa ma kpahi a nɔ. E ngɛ mi kaa Sara na bɔ nɛ zugba a fɔɔ si ha mohu lɛɛ se e nɛ ma mi he nɛ e je ɔ. A tsɔse lɛ ngɛ Ur ma a mi ngɛ Mesopotamia. Lejɛ ɔ kɛ he nɛ a ngɛ amlɔ nɛ ɔ kɛmi maa pee si tomi 1,200 (kilomita 1,900). E si e weku li kɛ ní kpahi babauu nɛ haa nɔ bua jɔmi ngɛ si himi mi kaa jua yemi hehi, tsuapohi kɛ we kpakpa nɛ e hi mi ɔ. E ma nyɛ maa ba kaa a be nyu he nyagba po ngɛ Ur ma a mi! Se Sara susu we ní nɛ ɔmɛ a he ngɛ si himi ekpa nɛ a ya je mi ɔ mi nɛ lɔ ɔ nɛ ha nɛ e hao.

Kadi nɔ́ nɛ mumi klɔuklɔu ɔ wo bɔfo Paulo he wami nɛ e ngma jeha 2,000 se. Benɛ e ngɛ Abraham kɛ Sara a hemi kɛ yemi ɔ he munyu tue ɔ, e de ke: “Ma mi he nɛ a je ɔ, a ngɛ he susue jinɛ a ko ná he blɔ nɛ a kpale kɛ ho lejɛ ɔ ya.” (Hebri Bi 11:8, 11, 15) Abraham kɛ Sara susu we si himi nɛ a si ngɛ se ɔ he. Kaa a susu jamɛ a si himi ɔ he ɔ,  jinɛ a ko kpale kɛ ho Ur ya nɛ he blɔ nɛ se be nɛ Mawu kɛ ma ha mɛ ɔ ko bɔ mɛ. Jinɛ wa ko bui mɛ kaa nihi nɛ a pee hemi kɛ yemi he nɔ hyɛmi nɔ́ kpakpa. Nɛ eko ɔ, nɔ ko po be lee kaa a hi si hyɛ.

Sara hyɛ we e se, mohu ɔ, e kɛ e hɛ ma níhi nɛ a ngɛ e hɛ mi ɔ nɔ. E ya nɔ nɛ e fĩ e huno ɔ se ngɛ a blɔ hiami ɔ tsuo mi. E yeɔ bua lɛ kɛ gbɛɛ bo tsu ɔ ke ji kaa a ma tsa blɔ hiami ɔ nɔ, nɛ e yeɔ bua lɛ kɛ hyɛɛ lohwe ɔmɛ a nɔ hulɔ. Ke a ya su he nɛ a maa to si ngɛ ɔ, e yeɔ bua kɛ maa bo tsu ɔ ekohu. E ya nɔ nɛ e da tsakemihi kɛ nyagba kpa komɛ a nya. Yehowa kpale ti si nɛ e wo Abraham ɔ mi ekohu, se loloolo ɔ, a wui Sara ta ngɛ mi!​—1 Mose 13:14-17; 15:5-7.

Nyagbenyagbe ɔ, Sara to kaa e ma de Abraham e juɛmi ngɛ nɔ́ ko he. Moo lɛɛ hyɛ bɔ nɛ Sara maa pee e hɛ mi ha benɛ e ngɛ dee ke: ‘Yehowa tsi ye fɔmi nya’ a. Lɔ ɔ se ɔ, e de e huno ɔ ke e kɛ e mawayo Hagar nɛ fɔ bimɛ. Hyɛ bɔ nɛ nɔ́ nɛ Sara ngɛ e huno ɔ bie kaa e pee ɔ maa dɔ lɛ ha! Ngɛ wa be nɛ ɔ mi lɛɛ enɛ ɔ peemi he maa wa, se ngɛ jamɛ a be ɔ mi ɔ, nɔ ko ma nyɛ maa ngɔ yo enyɔ loo plã nɛ e kɛ lɛ ma fɔ. * Eko ɔ, Sara susu kaa kɛ gu blɔ nɛ ɔ nɔ ɔ, Mawu yi mi tomi kaa e ma ha Abraham nina maa hiɛ babauu nɛ a pee ma a maa ba mi. Bɔ tsuaa bɔ nɛ e ji ɔ, e suɔ nɛ e pee nɔ́ ko nɛ e peemi yee saminya. Kɛ Abraham pee e ní ha kɛɛ? Baiblo ɔ tsɔɔ kaa e “kplɛɛ nɔ́ nɛ [Sara] de lɛ ɔ nɔ.”​—1 Mose 16:1-3.

Anɛ munyu nɛ ɔ tsɔɔ kaa Yehowa nɛ ha Sara de e huno ɔ nɔ́ nɛ ɔ lo? Dɛbi. Mohu ɔ, nɔ́ nɛ e bi ɔ tsɔɔ kaa e hɛɛ adesa susumi. E susu kaa Mawu lɛ ha we nɛ e fɔ. E li kaa Mawu ma nyɛ ma tsu sane ɔ he ní ngɛ blɔ kpa nɔ. Bɔ nɛ Sara to kaa e ma tsu sane ɔ he ní ha a mohu maa ngɔ haomi kɛ ba e nɔ. Se enɛ ɔ hu tsɔɔ kaa e fo we lɛ pɛ e nɔ́ mi. Akɛnɛ wa ngɛ je nɛ nihi foɔ mɛ pɛ a nɔ́ mi he je ɔ, anɛ su kpakpa nɛ ɔ nɛ Sara je kpo ɔ sɛ kadimi lo? Ke waa kɛ Mawu suɔmi nya ní peemi pee oti ngɛ wa si himi mi ɔ, lɔ ɔ maa tsɔɔ kaa wa ngɛ Sara kasee.

E kɛ we kulaa nɛ Abraham wo Hagar hɔ. Eko ɔ, Hagar susu kaa hɔ nɛ e ngɔ ɔ ha nɛ e he ba se nami pe Sara. Enɛ ɔ ha nɛ e bui Sara hu. Hyɛ bɔ nɛ nɔ́ nɛ ɔ ma hao Sara ha! Akɛnɛ Mawu fĩ Sara se nɛ Abraham hu ngmɛ lɛ blɔ he je ɔ, Sara doo Hagar nya wawɛɛ. Hagar ba fɔ binyumu nɛ e wo lɛ biɛ ke Ishmael. (1 Mose 16:4-9, 16) Benɛ Sara  ye jeha 89 nɛ e huno ɔ ye jeha 99 ɔ, Yehowa kɛ mɛ tu munyu ekohu. Sɛ gbi nɛ je Yehowa ngɔ ɔ ngɛ bua jɔmi wawɛɛ nitsɛ!

Yehowa kpale wo e huɛ Abraham si kaa e ma ha nɛ e nina maa hiɛ babauu. Mawu tsake e biɛ ha lɛ. E biɛ nitsɛ ji Abram. Se Yehowa ha lɛ biɛ kpa nɛ ji Abraham nɛ sisi ji “Je Mahi Babauu A Tsɛ.” Jehanɛ ɔ lɛɛ Yehowa wo Sara ta ngɛ sane ɔ mi. A tsɔɔ nɔ́ nɛ Sara hu maa pee. E biɛ nitsɛ ji Sarai nɛ eko ɔ, e sisi ji ‘Pɛ Wolɔ.’ Se Mawu ha lɛ biɛ kpa nɛ ji Sara, nɛ lɔ ɔ nɛ nihi fuu le mwɔnɛ ɔ. Mɛni ji biɛ Sara a sisi? E sisi ji “Matsɛmɛ A Nyɛ”! Yehowa tsɔɔ nɔ́ he je nɛ e ha yo nɛ e suɔ e sane ɔ jamɛ a biɛ ɔ. Yehowa de ke: “Ma gbaa lɛ, nɛ ma ha e ma fɔ binyumu ha mo. Ma gbaa lɛ nɛ e maa pee je mahi a nyɛ, nɛ e bimɛ ɔmɛ ekomɛ ma ba pee matsɛmɛ.”​—1 Mose 17:5, 15, 16.

Yehowa maa gu Sara binyumu ɔ nɔ nɛ e ma ha si nɛ e wo kaa e maa gu nina ko nɔ kɛ gbaa jemahi tsuo ɔ maa ba mi! Biɛ nɛ Mawu tsɔɔ kaa a wo binyumu ɔ ji Isak. Biɛ nɛ ɔ sisi ji “Muɔmi.” Benɛ Abraham nu kaa Yehowa maa jɔɔ Sara kɛ binyumu ɔ, ‘e kɛ e hɛ mi bu si nɛ e muɔ.’ (1 Mose 17:17) E pee lɛ nyakpɛ nɛ e bua jɔ hulɔ. (Roma Bi 4:19, 20) Nɛ Sara hu nɛɛ?

Pee se ɔ, nyumuhi etɛ komɛ ba slaa Abraham. Jamɛ a ligbi ɔ, pu nya wa ngmangmaangma, se nɔ kɛ e yo nɛ a wa ngɛ jeha mi nɛ ɔ kɛ oya yemi pee mɛ nubwɔ. Abraham de Sara ke: “Ngɔɔ o mamu kpakpa a; pɔtɔ lɛ nɛ o kɛ sa abolo ha ni etɛ esɔ!” Jamɛ a be ɔ, nubwɔ peemi biɔ mɔde bɔmi wawɛɛ. Abraham si we ní tsumi ɔ tsuo ngɔ fɔɛ e yo ɔ nɔ; e sa fo nɛ e ya gbe na bɔbɔyoo ko nɛ e kɛ pee niye ní nɛ e ngɔ ha mɛ nɛ e ha mɛ nɔ́ ko nɛ a nu. (1 Mose 18:1-8) Mamoo ɔ, nyumu nɛ ɔmɛ ɔ, Mawu bɔfohi ji mɛ! Eko ɔ, sane nɛ ɔ nɛ bɔfo Paulo susu he ɔ lɛ ha nɛ e ngma ke: “Nyɛ ko jɔɔ nibwɔ peemi hulɔ, ejakaa nibwɔ peemi nɔ nɛ ni komɛ gu kɛ he hiɔwe bɔfohi a tuu nɛ a li tete.” (Hebri Bi 13:2) Anɛ o ma nyɛ maa kase nibwɔ peemi he nɔ hyɛmi nɔ́ kpakpa nɛ Abraham kɛ e yo Sara pee ɔ lo?

Benɛ bɔfo ɔmɛ a ti nɔ kake ti si nɛ Mawu wo kaa Sara ma fɔ binyumu ɔ mi kɛ ha Abraham ɔ, jamɛ a be ɔ mi ɔ Sara ngɛ bo tsu ɔ mi nɛ e ngɛ mɛ tue bue. Ke e hyɛ jeha nɛ e ye nɛ a ke e ma fɔ bi ɔ, e pee lɛ nyakpɛ nɛ e he we yi. Lɔ ɔ he ɔ, e muɔ nɛ e bi e he ke: “Be nɛ ɔ mi nɛ i bwɔ, nɛ ye huno hu bwɔ kikɛ nɛ ɔ, ma pa na ngɔɔmi ko ngɛ yo kɛ nyumu a buami mi lo?” Bɔfo ɔ bi Sara sane kɛ dla e juɛmi. E bi lɛ ke, ‘Anɛ nɔ́ ko peemi wa ha Yehowa lo?’ Sara ye gbeye, nɛ e kplɛɛ we nɔ kaa e pee ja. Se sisi numi ngɛ nɔ́ nɛ e pee ɔ he. E wo e gbi nɔ kɛ de ke: “I muɛ.” Se bɔfo ɔ de lɛ ke: “O muɔ.”​—1 Mose 18:9-15.

Anɛ muɔ nɛ Sara muɔ ɔ tsɔɔ kaa e be hemi kɛ yemi lo? Dɛbi. Baiblo ɔ de ke: “Hemi kɛ yemi lɛ ha Abraham na he wami nɛ a kɛ fɔɔ bi be mi nɛ e bwɔ, nɛ Sara nitsɛ hu pee yosa, ejakaa e bu nɔ nɛ wo lɛ si ɔ anɔkualetsɛ.” (Hebri Bi 11:11) Sara le Yehowa, nɛ e le kaa Yehowa ma nyɛ ma ha nɛ e si womihi tsuo maa ba mi. Wa ti mɛnɔ lɛ hia we hemi kɛ yemi kaa jã? E sa nɛ waa bɔ mɔde wawɛɛ nɛ waa kase Mawu he ní ngɛ Baiblo ɔ mi. Ke wa pee jã a, wa maa na nɔ́ he je nɛ Sara ná hemi kɛ yemi kaa jã. Yehowa yeɔ anɔkuale nɛ e yeɔ e si womihi tsuo a nɔ. Be komɛ ɔ, bɔ nɛ e ma tsu sane ko he ní ha a ma nyɛ maa pee wɔ nyakpɛ aloo wa juɛmi be he kpee!

Benɛ Sara ye jeha 90 ɔ, e nine su nɔ́ nɛ e kɛ jehahi babauu hyɛ blɔ ɔ nɔ. E fɔ binyumu ha e huno nɛ e ye jeha lafa a! Abraham wo bimwɔyo ɔ biɛ ke Isak loo “Muɔmi,” kaa bɔ nɛ Mawu de lɛ ɔ. Hyɛ bɔ nɛ eko ɔ, pɔ tɔ Sara he ha se e kɛ bua jɔmi ngɛ dee ke: “Mawu ha nɛ muɔ ba ye  nya he jehanɛ. Nɔ tsuaa nɔ nɛ maa nu he ɔ, e kɛ mi maa muɔ.” (1 Mose 21:6) Nike ní nɛ Yehowa kɛ dloo lɛ nɛ ɔ ha nɛ e ná bua jɔmi kɛ ya si be nɛ e gbo. Se enɛ ɔ hu ngɔ ní tsumi kɛ ba fɔ e kuɛ nɔ.

Benɛ Isak ye jeha enuɔ ɔ a tsɔ lɛ nyɔ, nɛ weku ɔ tsuo ngmɛ okplɔɔ ngua ko. Se nyagba ko ngɛ. Sara “na kaa” nɔ́ ko yɛ nɔ saminya. Hagar bi Ishmael nɛ jamɛ a be ɔ e ye jeha 19 ɔ yeɔ jokuɛ Isak he fɛu. Enɛ ɔ pi fiɛmi kɛkɛ. Pee se ɔ, bɔfo Paulo tsɔɔ kaa nɔ́ nɛ Ishmael pee ɔ ji yi mi wami. Sara na he fɛu yemi nɛ ɔ kaa hɛdɔ nɔ́ nɛ e ma nyɛ maa ye e bi ɔ awi. E le pãa kaa e bi Isak ɔ, pi jokuɛ ko kɛkɛ; Yehowa maa gu e nɔ kɛ tsu e yi mi tomi he ní. Lɔ ɔ he ɔ, e ná kã nɛ e gba mi kpoo kɛ tsɔɔ Abraham kaa e fie Hagar kɛ Ishmael kɛ je.​—1 Mose 21:8-10; Galatia Bi 4:22, 23, 29.

Kɛ Abraham pee e ni ha kɛɛ? Ngmami ɔ de ke: “Nɔ́ nɛ ɔ hao Abraham wawɛɛ nitsɛ.” Akɛnɛ e bi ji Ishmael nɛ e suɔ e sane hu he je ɔ, e ye ha lɛ kaa e ma tsu sane ɔ he ní. Se Yehowa na nɔ́ nɛ ngɛ nɔ yae ɔ, nɛ e kɛ e he wo sane ɔ mi. Baiblo ɔ de ke: “Se Mawu de Abraham ke, ‘Koo hao o he ngɛ jokuɛ nyumuyo ɔ kɛ o nyɔguɛ yo Hagar a he. Pee kaa bɔ nɛ Sara de mo ɔ, ejakaa Isak nɔ lɛ nina nɛ i wo mo si ke ma ha mo ɔ maa gu kɛ ba.’” Yehowa ha nɛ Abraham ná nɔ mi mami kaa e maa hyɛ Hagar kɛ e binyumu ɔ a nɔ. Anɔkualetsɛ Abraham bu tue.​—1 Mose 21:11-14.

Sara ji yo kpakpa kɛ ha Abraham. Pi níhi nɛ e huno ɔ bua jɔ he pɛ nɛ e deɔ lɛ. Ke e yɔse nyagba ko nɛ kɛ haomi maa ba weku ɔ mi hwɔɔ se ɔ, e kɛ e huno ɔ sɛɛɔ he ní. E juɛmi kpo nɛ e je ɔ tsɔɔ we kaa e be he si bami. Pee se ɔ, bɔfo Petro nɛ lɛ hu e sɛ gba si himi ɔ tu Sara he munyu kaa e ba e he si kɛ ha e huno nɛ e kɛ pee nɔ hyɛmi nɔ́ kpakpa kɛ ha yigbayihi. (1 Korinto Bi 9:5; 1 Petro 3:5, 6) Ngɛ anɔkuale mi ɔ, kaa Sara tui sane ɔ he munyu ɔ, lɔ ɔ mohu ko tsɔɔ kaa e bui Abraham. Ejakaa nɔ́ nɛ e ko je mi kɛ ba a ko sa Abraham kɛ weku ɔ tsuo a he, nɛ e ko ye mɛ awi nitsɛ. Sara je suɔmi mi kɛ de nɔ́ nɛ e sa kaa e de.

Yigbayihi fuu a bua jɔ Sara nɔ hyɛmi nɔ́ ɔ he. A kase kɛ je Sara nɔ hyɛmi nɔ́ ɔ mi kaa e sa nɛ a ye a hunomɛ anɔkuale nɛ a ba a he si ha mɛ. Yigbayihi komɛ ná nɛ Yehowa kɛ e he wo a si himi mi kaa bɔ nɛ e pee ha Sara a. Se kɛ̃ ɔ, a kaseɔ ní kɛ jeɔ anɔkuale nɛ Sara ye, suɔmi kpo nɛ e je kɛ e tsui si nɛ e to ɔ mi.

E ngɛ mi kaa Yehowa wo yo nɛ e suɔ e sane nɛ ɔ biɛ ke “Matsɛmɛ A Nyɛ,” se Sara hyɛ we blɔ kaa a bu lɛ kaa nɔ ko nɛ e nɔ kuɔ. E be nyakpɛ kaa benɛ e ye jeha 127 nɛ e gbo ɔ, Abraham “ye Sara kɔmɔ, nɛ e nyɛ ya ha lɛ.” * (1 Mose 23:1, 2) E hɛ ja ngɛ e yo nɛ e fiɛ we e he nɛ ɔ he. Atsinyɛ jemi ko be he kaa Yehowa Mawu hu hɛ ja ngɛ yo nɛ yeɔ lɛ anɔkuale nɛ ɔ he, nɛ e to kaa e ma tle lɛ si kɛ ba wami mi ngɛ paradeiso zugba a nɔ. Sara kɛ nihi tsuo nɛ a kaseɔ e hemi kɛ yemi ɔ maa hi si kɛ maa ya neneene ngɛ bua jɔmi mi hwɔɔ se.​—Yohane 5:28, 29.