1, 2. Mɛni ji haomi komɛ nɛ nihi fuu kɛ ngɛ kpee, se mɛni Mawu sɔmɔli suɔ kaa a maa pee?

WAA kɛ haomihi kpeɔ ngɛ wa be nɛ ɔ mi. Oslaahi hyi zugba a nɔ tɔ. Zugba mimiɛmihi, zugba mimiɛmihi nɛ yaa nɔ ngɛ wo mi, la nɛ puɛɔ ní, nyu nɛ jeɔ nihi, yokuhi a pɛ́mi, lasiogblee, kɛ kɔɔhiɔ nɛ nya wa ngɛ adesahi haoe. Jehanɛ se hu ɔ, weku mi nyagbahi, kɛ nyagbahi nɛ ni kakaakahi kɛ kpeɔ ha nɛ gbeye kɛ aywilɛho hyi je ɔ mi tɔ. E ji anɔkuale kaa ‘haomi baa wɔ tsuo wa nɔ tlukaa.’—Fiɛlɔ 9:11.

² Mawu webi nyɛ nɛ a ngɛ si himi nɛ mi wa nɛ ɔmɛ a nya dae. Se kɛ̃ ɔ, e sa nɛ waa pee klaalo kaa wa maa da si himi saisaa nɛ mi wa nɛ waa kɛ maa kpe hwɔɔ se be mi nɛ je nɛ ɔ nyagbe ɔ ngɛ sue ɔ nya. Mɛni blɔ nɔ wa maa gu nɛ wa nyɛ nɛ waa da haomi nɛ ɔmɛ a nya konɛ wa kɔni mi nɛ ko wo nyu? Mɛni maa ye bua wɔ nɛ waa kɛ kã nɛ da haomihi nɛ waa kɛ kpeɔ mwɔnɛ ɔ a nya?

3. Kaa bɔnɛ a tsɔɔ ngɛ Romabi 15:4 ɔ, ke waa kɛ haomihi ngɛ kpee ɔ, mɛni blɔ nɔ wa ma nyɛ ma ná bua womi ngɛ?

³ E ngɛ mi kaa nihi fuu kɛ si himihi nɛ a mi wa ngɛ kpee mwɔnɛ ɔ pe be ko nɛ be ɔ mohu lɛɛ, se pi mwɔnɛ ɔ nɛ adesahi kɛ haomihi bɔni kpemi. Nyɛ ha nɛ waa hyɛ nɔ́ nɛ wa ma nyɛ maa kase ngɛ Mawu sɔmɔli komɛ nɛ a nyɛ da a haomihi a nya ngɛ blema be ɔ mi ɔ a he.—Rom. 15:4.

4. Mɛni haomihi David kɛ kpe, nɛ mɛni ye bua lɛ nɛ e nyɛ da nya?

⁴ Mo susu haomi komɛ nɛ David nyɛ nɛ e da nya a he nɛ o hyɛ. Matsɛ ko hla kaa e maa gbe lɛ, he nyɛli kɛ lɛ hwu ta, a ba nuu e yihi pani nya kɛ je, e he ni komɛ je e se, nɛ e ye tsui. (1 Sam. 18:8, 9; 30:1-5; 2 Sam. 17:1-3; 24:15, 17; La 38:4-8) Níhi nɛ Baiblo ɔ de kɛ kɔ David si himi he ɔ ha nɛ wa na bɔnɛ haomi nɛ ɔmɛ ye e tsui ha a heii.  Se haomi nɛ ɔmɛ puɛ we huɛ bɔmi nɛ ngɛ e kɛ Yehowa a kpɛti ɔ. E kɛ hemi kɛ yemi nɛ mi wa de ke: ‘Yehowa ji ye he wami nɛ buu ye he; mɛnɔ gbeye ma ye mɔ?’—La 27:1; kane La 27:5, 10.

5. Mɛni ye bua Abraham kɛ Sara nɛ a nyɛ da si himi nɛ mi wa nya?

⁵ Abraham kɛ Sara ya to nibwɔ ngɛ ma se zugba komɛ a nɔ nɛ a hi bo tsuhi a mi a wami be hiɛhiɛɛ. Pi be tsuaa be nɛ a ná si himi ɔ gbɔjɔɔ. Kaa nɔ hyɛmi nɔ́ ɔ, hwɔ ba ma a mi, nɛ mahi nɛ bɔle mɛ ɔ hu ba tua mɛ. Se kɛ̃ ɔ, a mwɔ a yi mi kpɔ kaa ma maa da haomi nɛ ɔmɛ a nya, nɛ a pee jã. (1 Mose 12:10; 14:14-16) Mɛni blɔ nɔ a gu kɛ da haomi nɛ ɔmɛ a nya? Mawu Munyu ɔ de wɔ ke, “ma nɛ Abraham ngɛ blɔ hyɛe ji ma nɛ Mawu nitsɛ to sisi, nɛ lɛ nɔuu e fia.” (Heb. 11:8-10) Abraham kɛ Sara ngɔ a hɛ kɛ fɔ níhi nɛ ngɛ a hɛ mi ɔ nɔ, nɛ a ha we nɛ níhi nɛ bɔle mɛ ngɛ je ɔ mi ɔ nɛ je a juɛmi ngɛ nɔ.

6. Mɛni blɔ nɔ wa ma nyɛ maa gu kɛ kase Hiob?

⁶ Hiob kɛ si himi nɛ mi wa wawɛɛ kpe. Mo susu bɔnɛ e nu he ha benɛ e pee kaa nɔ́ nɛ níhi yɛ nya ha lɛ ngɛ si himi mi ɔ he nɛ o hyɛ. (Hiob 3:3, 11) Nɔ́ nɛ puɛ sane ɔ kulaa ji kaa Hiob nui nɔ́ heje nɛ jamɛ a ní ɔmɛ ba e nɔ ɔ sisi saminya. Se kɛ̃ ɔ, e ha we nɛ e kɔni mi nɛ jɔ kɔkɔɔkɔ. E ya nɔ nɛ e ye anɔkuale kɛ ha Mawu, nɛ e hɛɛ e hemi kɛ yemi ɔ mi. (Kane Hiob 27:5.) Hiob pee nɔ hyɛmi nɔ́ kpakpa kɛ ha wɔ wawɛɛ nitsɛ!

7. Mɛni haomi komɛ nɛ Paulo kɛ kpe ngɛ e Mawu jami mi, se mɛni ye bua lɛ nɛ e kɛ kã ya nɔ nɛ e sɔmɔ?

⁷ Jehanɛ se hu ɔ, mo susu nɔ hyɛmi nɔ́ nɛ bɔfo Paulo pee ɔ he nɛ o hyɛ. ‘E na nɔ́ ngɛ ma mi, kɛ nga nɔ, kɛ wo hɛ mi.’ E tsɔɔ kaa ‘hwɔ kɛ kuma ye lɛ, fiɛ hu ye lɛ, nɛ he hami nɔ́ bɔ lɛ.’ Paulo tsɔɔ hu kaa ‘e ye ligbi kake, nɛ ji nyɔ kɛ pia ngɛ wo mi,’ eko ɔ, enɛ ɔ ba benɛ e ngɛ lɛ ko mi nɛ lɛ ɔ ya butu ɔ. (2 Kor. 11:23-27) Ngɛ enɛ ɔ tsuo se ɔ, mo kadi su nɛ e je kpo be ko nɛ e piɛ nguɛ nya nɛ e gbo ngɛ Mawu nɛ e ngɛ sɔmɔe ɔ heje ɔ. Pee se ɔ, e de ke: “Se nɔ́ nɛ ɔ ba mi, konɛ wa ko ngɔ wa hɛ kɛ fɔ wɔ nitsɛmɛ wa nɔ, se mohu waa ngɔ wa he kɛ fɔ Mawu nɔ. Ejakaa lɛ nɛ e tleɔ ni gbogboehi si. Mawu nɛ́ je wɔ kɛ je gbenɔ muɔ nya kaa kikɛ nɛ ɔ ngɛ wɔ jee kɛ mwɔɔ; nɛ e ma je wɔ ekohu.” (2 Kor. 1:8-10) Pi nɔ tsuaa nɔ nɛ e kɛ haomihi fuu kpeɔ kaa bɔnɛ e ba ngɛ Paulo blɔ fa mi ɔ. Se kã nɛ Paulo pee kɛ da haomihi a nya a ma nyɛ maa wo wa ti nihi fuu wa bua.

8. Kɛ haomihi nɛ ngɛ je ɔ mi mwɔnɛ ɔ ma nyɛ maa sa wa he ha kɛɛ? Mo ha enɛ ɔ he nɔ hyɛmi nɔ́.

⁸ Mwɔnɛ ɔ, oslaahi kɛ nyagbahi hyi je ɔ mi tɔ, enɛ ɔ ha nɛ nihi fuu nuɔ he kaa a ngɛ nɔ́ nae tsɔ pe bɔnɛ sa. Kristofoli komɛ po nuɔ he jã. Lani, * nɛ e kɛ e huno ngɛ sɔmɔe ngɛ Australia kaa be tsuo sɔmɔli ɔ de ke, benɛ a de lɛ kaa e ná helo mi pa ngɛ e nyɔ mi ɔ, e hao wawɛɛ kaa nɔ́ nɛ oslabai gba kɛ ba ná mi. E de ke, “Tsopahi nɛ a ngɛ pee ha mi ɔ ha nɛ i be he wami kulaa, nɛ i naa kaa se nami ko be ye he.” Nɔ́ nɛ ha nɛ e haomi ɔ mi pa wa ji kaa a, a pee e huno kpɛti wu operation nɛ e sa kaa e hyɛ lɛ. Ke waa kɛ si himi ko kaa kikɛ kpe ɔ, mɛni wa ma nyɛ maa pee?

9, 10. (a) Mɛni e sɛ kaa waa ngmɛ Satan blɔ nɛ e pee? (b) Mɛni blɔ nɔ wa maa gu kɛ da “amanehlu babauu” nɛ a wo ta ngɛ Bɔfo Ɔmɛ A Nítsumi 14:22 ɔ nya?

⁹ E sa nɛ waa le kaa Satan suɔ nɛ e da haomihi nɛ waa kɛ kpeɔ ɔ a nɔ konɛ e kɛ puɛ wa hemi kɛ yemi ɔ. Se e sɛ nɛ waa ngmɛ lɛ blɔ nɛ e gu blɔ nɛ ɔ nɔ kɛ puɛ bua jɔmi nɛ wa ngɛ náe ɔ. Abɛ 24:10 de ke: “Ke haomi ba o nɔ nɛ o pee gbedee ɔ, e tsɔɔ kaa o he wami pi sãasãa?” Ke wa pueɔ wa yi mi tɛ ngɛ Baiblo ɔ mi nɔ hyɛmi níhi nɛ wa susu a he kɛ sɛ hlami ɔ a he ɔ, lɔɔ maa ye bua wɔ nɛ wa ná kã kɛ da haomihi a nya.

 ¹⁰ E sa nɛ e hi wa juɛmi mi hu kaa wa be nyɛe maa ye wa he ngɛ haomihi tsuo a he. Ngɛ anɔkuale mi ɔ, e sa nɛ waa hyɛ blɔ kaa waa kɛ haomihi maa kpe. (2 Tim. 3:12) Bɔfo Ɔmɛ A Nítsumi 14:22 de wɔ ke: “E sa kaa waa gblee amanehlu babauu mi kɛ sɛ Mawu matsɛ yemi ɔ mi.” Ko ha nɛ haomihi nɛ o kɛ kpeɔ ɔ nɛ jɔ̃ o kɔni mi, mohu ɔ, moo bu haomi nɛ ɔmɛ kaa a ji he blɔhi nɛ o ná nɛ o kɛ maa tsɔɔ kaa o ngɛ hemi kɛ yemi kaa Mawu ngɛ he wami nɛ e kɛ maa ye bua mo.

11. Mɛni wa maa pee konɛ haomihi nɛ waa kɛ kpeɔ ngɛ si himi mi ɔ nɛ ko ha nɛ wa kɔni mi nɛ jɔ̃?

¹¹ E he hia nɛ waa kɛ wa juɛmi nɛ ma ní kpakpahi a nɔ. Mawu Munyu ɔ de wɔ ke: “Bua jɔmi haa nɔ tsɔɔ e hɛ mi; tsui yemi haa nɔ peeɔ vii.” (Abɛ 15:13) Dɔkitahi yɔse kɛ je blema kaa ke nɔ ko be he wami nɛ e susuɔ kaa e hiɔ ɔ maa jɔ ɔ, e jɔɔ. Behi fuu ɔ, ke nɔ ko nu nɔ́ ko nɛ e pi tsopa nitsɛ po, nɛ e he ye kaa e ma ha nɛ e hiɔ ɔ nɛ jɔ ɔ, e jɔɔ. Se ke hiɔtsɛ ko susu kaa tsopa nɛ a ha lɛ ɔ ngɛ lɛ hiɔ kpahi hae ɔ, lɔɔ haa nɛ e hiɔ ɔ mi waa. Nɔ́ hetomi nɔ́ nɛ ɔ tsɔɔ kaa ke be tsuaa be ɔ, wa susuɔ níhi nɛ wa be nyɛe ma tsake ngɛ wa si himi mi ɔ a he ɔ, wa kɔni mi ma nyɛ maa jɔ. Wa bua jɔ kaa Yehowa yeɔ bua wɔ nitsɛnitsɛ. Ngɛ oslaa behi a mi po ɔ, e yeɔ bua wɔ kɛ guɔ he wami womi munyu nɛ ngɛ e Munyu ɔ mi, yemi kɛ buami nɛ wa nyɛmimɛ haa wɔ, kɛ he wami nɛ mumi klɔuklɔu ɔ woɔ wɔ ɔ nɔ. Ke wa susuɔ ní nɛ ɔmɛ a he ɔ, lɔɔ ma ha wa ma ná bua jɔmi. Moo pee níhi nɛ ma ha nɛ o ma nyɛ maa da haomi tsuaa haomi nɛ o kɛ maa kpe ɔ nya, konɛ o kɛ o juɛmi nɛ ma ní kpakpahi a nɔ mohu pe nɛ o maa hi ní yayamihi nɛ ya nɔ ngɛ o si himi mi ɔ a he susue.—Abɛ 17:22.

12, 13. (a) Mɛni ye bua Mawu sɔmɔli nɛ a nyɛ da oslaahi nɛ ba a nɔ ɔ nya? Mo ha enɛ ɔ he nɔ hyɛmi nɔ́. (b) Ngɛ mɛni blɔ nɔ oslaahi ma nyɛ ma ha nɛ wa yɔse nɔ́ nɛ he hia ngɛ wa si himi mi?

¹² Lingmi nɛ ɔ, oslaa nɛ nya wa ba ma komɛ a nɔ. Nɔ́ nɛ sa kadimi ji kaa wa nyɛmimɛ nɛ a ngɛ ma nɛ ɔmɛ a nɔ ɔ nyɛ nɛ a to a tsui si kɛ da haomi nɛ ɔmɛ a nya. Enɛ ɔ tsɔɔ we kaa jã nɛ a pee ɔ ngɛ gbɔjɔɔ. Ngɛ jeha 2010 a sisije mi ɔ, zugba mimiɛmi nɛ nya wa kɛ zugba mimiɛmi nɛ yaa nɔ ngɛ wo mi nɛ ba ngɛ Chile ɔ puɛ wa nyɛmimɛ fuu a wehi, kɛ a níhi, nɛ ngɛ he komɛ po ɔ, e kpata a nɔ́ tsuaa nɔ́ hɛ mi. Ngɛ enɛ ɔ tsuo se ɔ, nyɛmimɛ ɔmɛ ya nɔ nɛ a ha nɛ huɛ bɔmi kpakpa hi a kɛ Yehowa a kpɛti. Samuel, nɛ e we hɛ mi kpata kulaa a de ke: “Ngɛ be nɛ mi wa nɛ ɔ tsuo mi ɔ, i kɛ ye yo ɔ wa jɔɔ we Kristofoli akpehi kɛ fiɛɛmi yami kɔkɔɔkɔ. I he ye kaa ní nɛ ɔmɛ nɛ wa pee ɔ ye bua wɔ nɛ wa pee we yeyeeye.” Nyɛminyumu nɛ ɔ, kɛ e yo ɔ, kɛ nyɛmimɛ kpahi fuu ha we nɛ haomi nɛ ɔ nɛ jɔ̃ a kɔni mi, mohu ɔ, a ya nɔ nɛ a kɛ kã sɔmɔ Yehowa.

¹³ Ngɛ September 2009 ɔ mi ɔ, hiɔmi nɛ nya wa ko nɛ, nɛ e je nihi babauu ngɛ Philippines ma nɛ ji Manila a hehi fuu. Nyumu niatsɛ ko nɛ e níhi fuu a hɛ mi kpata a de ke: “Nyu ɔ je nɔ tsuaa nɔ, enɛ ɔ ha nɛ niatsɛmɛ kɛ ohiatsɛmɛ tsuo na nɔ́.” Enɛ ɔ ha nɛ wa kaiɔ Yesu ga womi nɛ nile ngɛ mi nɛ ɔ, “Nyɛɛ to juetli ha nyɛ he ngɛ hiɔwe, he nɛ wɔyewɔye, kɛ kana puɛ we ní ngɛ, nɛ juli hu ju we ɔ.” (Mat. 6:20) Sika kɛ helo nya níhi a hɛ mi kpataa, enɛ ɔ he ɔ, nihi nɛ a dii ní nɛ ɔmɛ a se titli ngɛ a si himi mi ɔ, a nine nyɛɔ si. Nile ngɛ mi wawɛɛ nitsɛ kaa waa kɛ wa juɛmi maa ma huɛ bɔmi kpakpa nɛ ngɛ waa kɛ Yehowa wa kpɛti ɔ nɔ, ejakaa huɛ bɔmi nɛ ɔ ma nyɛ maa hi si daa ngɛ haomihi nɛ waa kɛ maa kpe ɔ tsuo se!—Kane Hebribi 13:5, 6.

14. Mɛni yi mi tomihi a heje nɛ wa peeɔ kã ngɛ?

¹⁴ Yesu tsɔɔ kaa ke e ba a, haomihi maa ba, se e de ke: “Nyɛ ko ye gbeye.”  (Luka 21:9) Wa ngɛ yi mi tomihi a heje nɛ e sa kaa wa ná hɛ kɛ nɔ fɔmi, ejakaa Yesu Kristo nɛ ji wa Matsɛ ɔ kɛ Yehowa nɛ ji je mluku ɔ Bɔlɔ ɔ fi wa se. Paulo wo Timoteo he wami nɛ e de lɛ ke: ‘Mumi nɛ Mawu ha wɔ ɔ ha we nɛ wa yeɔ gbeye; mohu e ji mumi nɛ woɔ wɔ he wami, nɛ haa wa náa suɔmi kɛ haa nihi, nɛ wa yeɔ wa he nɔ.’—2 Tim. 1:7.

15. Mɛni ji nɔ́ nɛ Mawu sɔmɔli komɛ de nɛ tsɔɔ kaa a ngɛ hɛ kɛ nɔ fɔmi ngɛ Mawu mi, nɛ kɛ wɔ hu wa ma plɛ kɛ ná kã nɛ a pee ɔ eko kɛɛ?

¹⁵ Mo kadi munyu komɛ nɛ Mawu sɔmɔli tu nɛ tsɔɔ kaa a ngɛ hɛ kɛ nɔ fɔmi nɛ mi wa nitsɛnitsɛ. David de ke: ‘Yehowa ji ye he bulɔ, kɛ ye yi baalɔ; e nɔ lɛ i ngɔ ye hɛ kɛ fɔ. E piɛɛɔ ye he, nɛ e haa mi bua jɔmi.’ (La 28:7) Paulo tsɔɔ kaa e ngɛ hɛ kɛ nɔ fɔmi nɛ mi wa wawɛɛ ngɛ Mawu mi. E de ke: “Ngɛ enɛ ɔmɛ tsuo a mi ɔ, nɔ nɛ suɔ wɔ ɔ haa wa yeɔ kunimi babauu.” (Rom. 8:37) Jã kɛ̃ nɛ benɛ Yesu kɛ haomi yaa kpe ɔ, Yesu ha nɛ e pee heii kɛ ha nihi nɛ a ngɛ lɛ tue bue ɔ kaa huɛ bɔmi gbagbanii ngɛ e kɛ Mawu a kpɛti. E de ke: ‘Pi imi nɔ kake nɛ maa piɛ, ejakaa Tsɛ ɔ kɛ mi ngɛ.’ (Yoh. 16:32) Mɛni wa naa ngɛ munyu nɛ ɔmɛ nɛ Mawu sɔmɔli tu ɔ mi? Wa naa kaa mɛ tsuo a ngɛ hɛ kɛ nɔ fɔmi nɛ mi wa ngɛ Yehowa mi. Ke wɔ hu wa ngɛ hɛ kɛ nɔ fɔmi kaa jã ngɛ Mawu mi ɔ, lɔɔ ma nyɛ maa wo wɔ kã konɛ wa nyɛ nɛ waa da haomi saisaa nɛ waa kɛ maa kpe mwɔnɛ ɔ nya.—Kane La 46:1-3.

16. Mɛni heje nɛ e he hia kaa waa kase Mawu Munyu ɔ?

¹⁶ Kristofono be nyɛe ma ná kã ngɛ lɛ nitsɛ a dɛhe. Mohu ɔ, ja e le Mawu nɛ e kɛ e hɛ fɔ e nɔ loko e ma ná kã. Wa ma nyɛ maa pee enɛ ɔ kɛ gu e Munyu ɔ nɛ ji Baiblo ɔ nɛ wa maa kase ɔ nɔ. Nyɛmiyo ko nɛ e hao wawɛɛ ɔ tsɔɔ nɔ́ nɛ ye bua lɛ. E de ke: “I kaneɔ ngmamihi nɛ a woɔ nɔ bua si abɔ.” Anɛ waa kɛ blɔ tsɔɔmi nɛ a kɛ haa wɔ kaa waa pee weku Mawu jami daa otsi ɔ tsuɔ ní lo? Ke wa peeɔ ní nɛ ɔmɛ ɔ, lɔɔ maa ye bua wɔ nɛ wa ma ná su nɛ la polɔ ɔ ná a eko. E de ke: “I suɔ o mlaa a kaa nɔ́ ko! Ke je na kikɛ nɛ ɔ, e he pɛ i susuɔ.”—La 119:97.

17. (a) Mɛni ma nyɛ maa ye bua wɔ konɛ wa nyɛ nɛ waa pee kã? (b) Mɛni blɔ nɔ nɛ nɔ ko he sane nɛ a ngma ngɛ wa womi ɔmɛ a mi ɔ ye bua mo ngɛ?

¹⁷ Jehanɛ se hu ɔ, wa ngɛ Baiblo kasemi womihi nɛ munyuhi nɛ ngɛ a mi ɔ haa nɛ hɛ kɛ nɔ fɔmi nɛ wa ngɛ ngɛ Yehowa mi ɔ mi waa. Nyɛmimɛ fuu náa nihi a he sanehi nɛ a ngmaa kɛ woɔ wa womi tɛtlɛɛ ɔmɛ a mi ɔ he se. Nyɛmiyo ko nɛ je Asia nɛ ná juɛmi mi hiɔ ko ɔ ná bua jɔmi benɛ e kane nyɛmi ko he sane ɔ. Nɔ́ nɛ e kane ɔ kɔɔ nyɛminyumu ko nɛ e sɔmɔ kaa ma se sane kpakpa fiɛɛlɔ be ko nɛ be, nɛ lɛ hu e ná jamɛ a hiɔ ɔ eko ɔ he. E ngma ke, “Enɛ ɔ ye bua mi nɛ i le nɔ́ nɛ ngɛ mi pee ɔ, nɛ e ha nɛ i ná hɛ kɛ nɔ fɔmi.”

18. Mɛni heje nɛ e sa nɛ waa sɔle be tsuaa be ɔ?

 ¹⁸ Sɔlemi ma nyɛ maa ye bua wɔ ngɛ si himihi tsuo a mi. Bɔfo Paulo ma nɔ mi kaa sɔlemi he hia. E de ke: “Nyɛ ko hao ngɛ nɔ́ ko nɔ́ he; se mohu nɔ́ tsuaa nɔ́ mi ɔ, nyɛɛ kɛ sɔlemi, kɛ pɛɛ kpami, kɛ sina nɛ wo nyɛ hiami ní ɔmɛ a ta ha Mawu. Nɛ Mawu he jɔmi nɛ pã adesa juɛmi tsuo ɔ maa bu nyɛ tsui, kɛ nyɛ juɛmi he ngɛ Kristo Yesu mi.” (Filip. 4:6, 7) Anɛ wa sɔleɔ be tsuaa be konɛ Mawu nɛ ye bua wɔ nɛ wa nyɛ nɛ waa da si himihi nɛ a mi wa a a nya lo? Alex, nɛ ji nyɛminyumu ko nɛ je Britain nɛ e hao wawɛɛ be kɛkɛɛ ɔ de ke: “Ní nɛ i kɛ Yehowa sɛɛɔ ngɛ sɔlemi mi, kɛ Yehowa tue nɛ i buɔ kɛ guɔ e Munyu ɔ kanemi nɔ ɔ ji nɔ́ nɛ ye bua mi wawɛɛ.”

19. Kɛ e sa kaa waa na asafo mi kpehi nɛ wa maa ya a ha kɛɛ?

¹⁹ Kpehi nɛ wa yaa a hu yeɔ bua wɔ nɛ wa nyɛɔ daa haomihi a nya. La polɔ ko ngma ke: ‘I ná nɛ i ba lejɛ ɔ! Ye hɛ ngɛ jae ngɛ mo Yehowa o we ɔ he.’ (La 84:2) Anɛ e peeɔ mo hu jã lo? Lani, nɛ wa wo e ta kɛ sɛ hlami ɔ tsɔɔ bɔnɛ e naa Kristofoli a he nya buami ha. E de ke: “E sa nɛ ma ya kpehi. I le kaa ke i ngɛ blɔ hyɛe kaa Yehowa nɛ ye bua mi kɛ da ye haomi ɔmɛ a nya a, ja i ya kpehi.”

20. Mɛni blɔ nɔ wa he nɛ waa kɛ woɔ fiɛɛmi nítsumi ɔ mi kɛ kã a yeɔ bua wɔ ngɛ?

²⁰ Matsɛ Yemi fiɛɛmi nítsumi ɔ nɛ waa kɛ kã tsuɔ ɔ yeɔ bua wɔ nɛ wa nyɛɔ daa haomihi a nya hulɔ. (1 Tim. 4:16) Nyɛmiyo ko nɛ je Australia nɛ e kɛ haomihi fuu kpe ɔ de ke: “Jinɛ i sume nɛ ma ya fiɛɛmi, se asafo mi nɔkɔtɔma ko de mi ke ma ba piɛɛ e he kɛ ya. I kɛ lɛ wa ya. I na kaa Yehowa ngɛ mi ye buae; be tsuaa be nɛ ma fiɛɛ kɛ ha nɔ ko ɔ, ye bua jɔɔ.” (Abɛ 16:20) Nihi fuu na kaa ke a ye bua nihi nɛ a ná hemi kɛ yemi ngɛ Yehowa mi ɔ, mɛ hu a hemi kɛ yemi ɔ mi waa. Jã nɛ a peeɔ ɔ haa nɛ a hɛ jeɔ a haomi ɔmɛ a nɔ nɛ a kɛ a juɛmi nyɛɔ maa níhi nɛ a he hia wawɛɛ ɔ a nɔ.—Filip. 1:10, 11.

21. Ke waa kɛ haomihi ngɛ kpee ɔ, mɛni nɔ mi mami wa ma nyɛ ma ná?

²¹ Yehowa ha wɔ níhi fuu nɛ ma nyɛ maa ye bua wɔ konɛ wa ná kã kɛ da haomihi nɛ waa kɛ kpeɔ mwɔnɛ ɔ a nya. Ke waa kɛ ní nɛ ɔmɛ tsuɔ ní saminya, nɛ wa susuɔ Mawu sɔmɔli nɛ a kɛ kã da haomihi nɛ a kɛ kpe ɔ nya a he, nɛ wa kase mɛ ɔ, wa ma ná nɔ mi mami kaa wa ma nyɛ maa da kahi a nya nɛ wa kɔni mi be nyu woe. E ngɛ mi kaa ní yayamihi fuu ma nyɛ maa ba benɛ je nɛ ɔ nyagbe ɔ ngɛ sue nɛ ɔ mohu lɛɛ, se wa ma nyɛ maa nu he kaa bɔnɛ Paulo nu he ɔ. E de ke: “A kongoɔ wɔ basabasa, se wa gbo we. . . . Wa kɔni mi jɔ̃ we.” (2 Kor. 4:9, 16) Ngɛ Yehowa yemi kɛ buami nya a, wa ma nyɛ maa da haomihi nɛ waa kɛ kpeɔ mwɔnɛ ɔ a nya.—Kane 2 Korintobi 4:17, 18.