Wa wekuli tsuo ngɛ mɛ nitsɛmɛ a biɛhi nɛ a kɛ tsɛɔ mɛ. Lohwehi nɛ a lɛɔ ngɛ we mi po ngɛ biɛhi! Anɛ e dɛ blɔ kaa e sa nɛ Mawu nɛ hi biɛ lo? Ngɛ Baiblo ɔ mi ɔ, a tsɛɔ Mawu kɛ palemi biɛhi fuu. Ekomɛ ji Mawu Ope, Nyɔmtsɛ Matsɛ, kɛ Bɔlɔ. Se Mawu ngɛ biɛ nitsɛ.—Kane Yesaya 42:8.

Ngɛ Baiblohi fuu a mi ɔ, o maa na Mawu biɛ nitsɛ ɔ ngɛ La 83:18. Kaa nɔ hyɛmi nɔ́ ɔ, ngɛ New World Translation of the Holy Scriptures ɔ mi ɔ, a ngma ngɛ La 83:18 ɔ ke: “Mo nɛ o biɛ ji Yehowa a, mo pɛ lɛ o nɔ kuɔ pe nɔ tsuaa nɔ ngɛ zugba a tsuo nɔ.”

Mawu suɔ nɛ waa kɛ e biɛ nitsɛ ɔ nɛ tsɛ lɛ. Ke waa kɛ nihi nɛ wa suɔ mɛ aloo wa huɛmɛ ngɛ ní sɛe ɔ, waa kɛ a biɛ tsɛɔ mɛ. Anɛ ke waa kɛ Mawu ngɛ ní sɛe ɔ, e sɛ nɛ wa tsɛɔ e biɛ lo? Jehanɛ se hu ɔ, Yesu Kristo wo nihi he wami konɛ a tsɛ Mawu kɛ e biɛ.—Kane Mateo 6:9.

Se ja wa le Mawu biɛ ɔ kɛ Mawu he ní fuu loko wa ma nyɛ maa pee e huɛmɛ. Kaa nɔ hyɛmi nɔ́ ɔ, kɛ Mawu ngɛ ha kɛɛ? Anɛ wa ma nyɛ maa hɛ wɔ kɛ su Mawu he lo? O ma nyɛ maa na sane bimi nɛ ɔmɛ a hetohi ngɛ Baiblo ɔ mi.