1, 2. (a) Benɛ Mose ye jeha 40 ɔ, mɛni juɛmi e pee? (Moo hyɛ foni nɛ ngɛ ni kasemi ɔ sisije ɔ.) (b) Mɛni he je nɛ Mose suɔ kaa e kɛ Mawu we bi nɛ na amanehlu mohu ɔ?

MOSE le nɔ́ nɛ e ma nyɛ ma ná ngɛ Egipt. E na we nguanguahi nɛ a ngɛ fɛu nɛ niatsɛmɛ ma a. Odehe ji lɛ. “A tsɔɔ Mose Egipt nile tsuo.” Eko ɔ, e kase yi nɔ sane kɛ dodoehi a he ní, nɛ e kase akɔtaa, kɛ ní kpahi hulɔ. (Níts. 7:22) Jinɛ e ko ná sika, kɛ he wami, kɛ he blɔ nɛ ni guhi nɛ hi Egipt ɔ be nyɛe ma ná!

² Se benɛ Mose ye jeha 40 ɔ, e pee juɛmi ko nɛ Farao kɛ e weku ɔ nui sisi. E sume kaa e maa ye ngɔɔmi ngɛ Egipt hu, mohu ɔ, e suɔ kaa e ma ya piɛɛ nyɔguɛ ɔmɛ a he! Mɛni he je? Ejakaa Mose ngɛ hemi kɛ yemi. (Kane Hebri Bi 11:24-26.) Akɛnɛ Mose ngɛ hemi kɛ yemi he je ɔ, e ngɛ kaa nɔ́ nɛ e na Yehowa kɛ e hɛngmɛ. E ngɛ hemi kɛ yemi ngɛ ‘nɔ nɛ a nɛ lɛ kɛ hɛngmɛ ɔ’ mi, nɛ e he ye kaa Mawu si womi ɔmɛ tsuo maa ba mi.—Heb. 11:27.

3. Mɛni sane bimihi etɛ a he nɛ wa ma susu ngɛ munyu nɛ ɔ mi?

³ E sa nɛ wɔ hu wa ná hemi kɛ yemi ngɛ Yehowa mi konɛ wa ko hyɛ níhi nɛ wa ma ná ngɛ je ɔ mi ɔ pɛ. E sa nɛ ‘waa piɛɛ ni nɛmɛ nɛ hɛɛ hemi kɛ yemi ɔ mi ɔ a he.’ (Heb. 10:38, 39) Bɔ nɛ pee nɛ wa hemi kɛ yemi ɔ mi nɛ wa a, nyɛ ha nɛ wa susu nɔ́ nɛ a ngma kɛ kɔ Mose he ngɛ Hebri Bi 11:24-26 he nɛ waa hyɛ. Benɛ wa ngɛ jã pee ɔ, mo hla sane bimihi nɛ nyɛɛ se nɛ ɔ a heto: Mɛni blɔ nɔ hemi kɛ yemi wo Mose he wami nɛ e yu e he ngɛ níhi nɛ peeɔ helo ɔ  akɔnɔ ɔ a he? Benɛ a bɔ lɛ ahlua a, mɛni blɔ nɔ hemi kɛ yemi nɛ e ngɛ ɔ ha nɛ e bua jɔ sɔmɔmi he blɔ nɛ a kɛ wo e dɛ ɔ he ngɛ? Nɛ mɛni he je nɛ Mose “hɛ ngɛ hiɔwo nɛ e ma ná hwɔɔ se ɔ nɔ” ɔ?

4. Mɛni Mose yɔse ngɛ ‘ngɔɔmi nɛ a yeɔ ngɛ yayami peemi mi’ ɔ he?

⁴ Hemi kɛ yemi nɛ Mose ngɛ ɔ ha nɛ e na kaa ‘ngɔɔmi nɛ e maa ye ngɛ yayami peemi mi’ ɔ be si hie daa. Eko ɔ, nihi ma de ke wɔ jami, kɛ mumihi a tsɛmi he si ngɛ Egipt mohu lɛɛ, se Egipt ma a he ba wa nɛ e ye je ɔ tsuo nɔ be mi nɛ Yehowa we bi ngɛ nɔ́ nae kaa nyɔguɛhi! Se Mose le kaa Mawu ma nyɛ ma tsake níhi a hɛ mi. E ngɛ mi kaa nɔ́ nɛ níhi a mi ngɛ hie ha nihi nɛ a peeɔ mɛ nitsɛmɛ a tsui nya ní ɔ mohu lɛɛ, se Mose ngɛ hemi kɛ yemi kaa Mawu ma kpata yayami peeli a hɛ mi. Enɛ ɔ he ɔ, e ‘yi ngɔɔmi ngɛ yayami peemi mi be bɔɔ ko.’

5. Mɛni maa ye bua wɔ konɛ waa yu wa he ngɛ ‘ngɔɔmi nɛ a yeɔ ngɛ yayami peemi mi be bɔɔ ko’ ɔ he?

⁵ Mɛni blɔ nɔ mo hu o maa gu kɛ yu o he ngɛ ‘ngɔɔmi nɛ a yeɔ ngɛ yayami peemi mi be bɔɔ ko’ ɔ he? Mo kai kaa bua jɔmi nɛ a náa ngɛ yayami peemi mi ɔ se kɛ we. Mo ná hemi kɛ yemi konɛ o na kaa “je ɔ, kɛ e mi níhi nɛ peeɔ nɔ akɔnɔ ɔ ngɛ bee kɛ yaa.” (1 Yoh. 2:15-17) Mo susu nɔ́ nɛ maa ba yayami peeli nɛ a pia we a he ɔ a nɔ ɔ he. Mawu ‘maa ngɔ mɛ kɛ to hehi nɛ saneɔ, nɛ e maa tsɛ̃ mɛ kɛ fia si nɛ a hɛ mi ma kpata.’ (La 73:18, 19) Ke e pee mo kaa o pee yayami ko ɔ, mo bi o he ke, ‘Mɛni maa ba ye nɔ hwɔɔ se?’

6. (a) Mɛni he je nɛ Mose “kplɛɛ we kaa a tsɛ lɛ Egipt matsɛ ɔ biyo ɔ bi” ɔ? (b) Mɛni he je nɛ o susu kaa juɛmi nɛ Mose pee ɔ da a?

⁶ Hemi kɛ yemi nɛ Mose ngɛ ɔ hu ha nɛ e le ní tsumi nɛ e ma tsu. “Hemi kɛ yemi lɛ ha nɛ benɛ Mose ba wa a, e kplɛɛ we kaa a tsɛ lɛ Egipt matsɛ ɔ biyo ɔ bi” ɔ nɛ. (Heb. 11:24) Mose de we ke e maa hi Matsɛ we ɔ kɛ sɔmɔ Mawu konɛ e kɛ sika kɛ he blɔ nɛ e ngɛ ɔ nɛ ye bua e nyɛmimɛ Israel bi ɔmɛ. Mohu ɔ, e fia e pɛɛ si kaa e maa suɔ Yehowa kɛ e tsui tsuo, kɛ e klaa tsuo, kɛ e he wami tsuo. (5 Mose 6:5) Yi mi kpɔ nɛ Mose mwɔ ɔ ha nɛ e hɛwi tsɔ. E kɛ we kulaa nɛ Israel bi ɔmɛ kpakpaa Egipt bi ɔmɛ a juetli tsuo ngɛ a he. (2 Mose 12:35, 36) Mawu pue Farao hɛ mi si nɛ e kpata e hɛ mi. (La 136:15) Mawu he Mose yi wami nɛ e ha nɛ e nyɛɛ e we bi a hɛ mi kɛ ho he ko nɛ ngɛ slɔkee ya. E ye manye ngɛ si himi mi nitsɛnitsɛ.

7. (a) Ngɛ Mateo 6:19-21 ɔ nya a, mɛni he je nɛ e sa nɛ waa to juetli nɛ maa hi si kɛ ya daa ha wa he ɔ? (b) Mo de níhi a si kpami ko nɛ tsɔɔ slɔɔto nɛ ngɛ helo nya juetli kɛ mumi mi juetli a kpɛti.

⁷ Ke o ji niheyo aloo yiheyo nɛ o ngɛ Yehowa sɔmɔe ɔ, mɛni blɔ nɔ hemi kɛ yemi ma nyɛ maa ye bua mo konɛ o le ní tsumi nɛ o ma tsu? Nile ngɛ mi kaa o ma dla o he kɛ ha hwɔɔ se. Se anɛ hemi kɛ yemi nɛ o ngɛ ngɛ Mawu si womi ɔmɛ a mi ɔ maa wo mo he wami konɛ o to juetli nɛ maa hi si be bɔɔ ko pɛ si, aloo juetli nɛ maa hi si daa? (Kane Mateo 6:19-21.) Yo ko nɛ a tsɛɛ lɛ ke Sophie nɛ e le domi saminya a mwɔ e yi mi kpɔ ngɛ nɔ́ ko kaa kikɛ ɔ he. La fiami kuuhi fuu nɛ a ngɛ United States ɔ tsɔɔ kaa a maa hyɛ e nɔ kɛ ya sukuu, nɛ a ma ha lɛ blɔ nya ngua ngɛ a la fiami kuu ɔmɛ a mi. Sophie de ke: “Ke nihi ngɛ ye yi jee ɔ, lɔ ɔ haa nɛ ye yi fuɔ agbo. Ngɛ anɔkuale mi ɔ, i nuɔ he kaa ye nɔ kuɔ pe ye juami bimɛ ɔmɛ. Se i be bua jɔmi.” Pee se ɔ, Sophie hyɛ video nɛ e yi ji, Young People Ask—What Will I Do With My Life? ɔ. E de ke: “I ba yɔse kaa i ngɔ jami nɛ e sa kaa ma kɛ ha Yehowa a kɛ tsake yi jemi kɛ hɛ mi nyami nɛ ngɛ je ɔ mi ɔ. I sɔle wawɛɛ kɛ ha Yehowa. Lɔ ɔ se ɔ, i kpa domi.” Kɛ Sophie susu ngɛ juɛmi nɛ e pee ɔ he ha kɛɛ? E de ke: “I pia we ye he. Mwɔnɛ ɔ, i ngɛ bua jɔmi wawɛɛ nitsɛ. I kɛ ye huno ɔ tsuo wa ngɛ sɔmɔe kaa blɔ gbali. Wa he we biɛ ngɛ je ɔ mi, nɛ jã kɛ̃ nɛ wa be helo nya níhi fuu hulɔ. Se wa ngɛ Yehowa, nɛ wa ngɛ Baiblo kaseli fuu, nɛ waa kɛ Mawu jami mi otihi hu ma wa hɛ mi. I pia we ye he kulaa.”

8. Mɛni Baiblo ga womi nɛ maa ye bua nihewi kɛ yihewi konɛ a le nɔ́ nɛ a maa pee ngɛ a si himi mi?

 ⁸ Yehowa le nɔ́ nɛ hi ha mo. Mose de ke: ‘Nyɛɛ bu nɔ́ nɛ Yehowa, nyɛ Mawu ɔ ngɛ hlae kaa nyɛɛ pee ɔ tue. Nyɛ ja Yehowa, nyɛ Mawu ɔ, nɛ nyɛɛ ye e mlaa amɛ tsuo a nɔ pɛpɛɛpɛ. Nyɛɛ suɔ lɛ, nɛ nyɛ sɔmɔ lɛ kɛ nyɛ tsui tsuo, kɛ nyɛ klaa tsuo. Nyɛɛ ye e mlaa amɛ tsuo nɛ i ngɛ nyɛ woe mwɔnɛ ɔ a nɔ, konɛ e hi ha nyɛ.’ (5 Mose 10:12, 13) Nihewi kɛ yihewi, nyɛ tsu ní tsumi nɛ ma ha nɛ nyɛ maa suɔ Yehowa nɛ nyɛ ma sɔmɔ lɛ kɛ nyɛ “tsui tsuo, kɛ nyɛ klaa tsuo.” Nyɛ ma nyɛ ma ná nɔ mi mami kaa ke nyɛ pee jã a, e maa “hi ha nyɛ.”

9. Moo tsɔɔ nɔ́ he je nɛ e he ma nyɛ maa wa ha Mose kaa e ma tsu ní tsumi nɛ a kɛ wo e dɛ ɔ.

⁹ “Ngɛ Mose susumi nya a, ke a bɔ nɔ ko ahlua ngɛ Kristo ɔ he ɔ, juetli babauu nɛ ngɛ Egipt ɔ po he jua wɛ kaa lɔ ɔ.” (Heb. 11:26) A tu Mose he munyu kaa “Kristo ɔ,” aloo “Nɔ Nɛ A Pɔ Lɛ Nu.” Enɛ ɔ tsɔɔ kaa Yehowa hla lɛ konɛ e nyɛɛ Israel bi ɔmɛ a hɛ mi kɛ je Egipt. Mose le kaa enɛ ɔ peemi be gbɔjɔɔ. E le kaa nihi maa bɔ lɛ “ahlua.” Kaa nɔ hyɛmi nɔ́ ɔ, be ko ɔ, Israel no ko tu munyu kɛ si Mose nɛ e de lɛ ke: “Mɛnɔ wo mo wa nyatsɛ kɛ kojolɔ?” (2 Mose 2:13, 14) Pee se ɔ, Mose nitsɛ bi Yehowa ke: “Kɛ maa pee kɛɛ nɛ Farao ɔ lɛɛ e maa bu mi tue?” (2 Mose 6:12) Mose sɔle nɛ e de Yehowa níhi nɛ e ngɛ gbeye yee kɛ níhi nɛ ngɛ lɛ haoe konɛ e nyɛ nɛ e da ahlua bɔmi ɔ nya. Mɛni blɔ nɔ Yehowa gu kɛ ye bua Mose konɛ e nyɛ nɛ e tsu ní tsumi nɛ e kɛ wo e dɛ ɔ?

10. Mɛni blɔ nɔ Yehowa gu kɛ ye bua Mose konɛ e nyɛ nɛ e tsu ní tsumi nɛ e kɛ wo e dɛ ɔ?

¹⁰ Kekleekle ɔ, Yehowa ma nɔ mi kɛ ha Mose nɛ e de lɛ ke: “Ma piɛɛ o he.” (2 Mose 3:12) Nɔ́ nɛ ji enyɔ ɔ, Yehowa wo Mose kã kɛ gu e biɛ ɔ he munyu nɛ e tu kɛ tsɔɔ Mose ɔ nɔ. E tsɔɔ kaa e biɛ ɔ sisi numi kake ji: “O Deɔ O Peeɔ.” * (2 Mose 3:14, NW) Nɔ́ nɛ ji etɛ ɔ, e ha Mose he wami nɛ e kɛ pee nyakpɛ ní konɛ lɔ ɔ nɛ ma nɔ mi kaa Mawu lɛ tsɔ lɛ niinɛ. (2 Mose 4:2-5) Nɔ́ nɛ ji eywiɛ ɔ, Yehowa hla Aaron konɛ e pee Mose we otsiamɛ. (2 Mose 4:14-16) Benɛ e piɛ bɔɔ nɛ Mose ma gbo ɔ, e na kaa ke Mawu maa ngɔ tlomi ko kɛ tloo e sɔmɔlɔ ko ɔ, e bɔɔ tlomi ɔ he tako kɛ haa nɔ ɔ. E de Yoshua ke: ‘Yehowa nitsɛ ma kpaka mo, nɛ e kɛ mo maa hi si. E be mo sie, nɛ e be mo kuae hulɔ; lɔ ɔ he ɔ, koo nu sawale; nɛ koo ye gbeye.’—5 Mose 31:8.

11. Mɛni he je nɛ Mose bua jɔ ní tsumi nɛ a kɛ wo e dɛ ɔ he wawɛɛ ɔ?

¹¹ Ngɛ Yehowa yemi kɛ buami nya a, Mose bua jɔ ní tsumi nɛ he wa nɛ a kɛ wo e dɛ ɔ he wawɛɛ. E bu lɛ kaa nɔ́ ko nɛ he jua wa kulaa pe “juetli babauu nɛ ngɛ Egipt ɔ.” Anɛ nɔ ko ma nyɛ maa ngɔ Farao kɛ to Mawu Ope ɔ he lo? Anɛ a ma nyɛ maa ngɔ Egipt matsɛ bi ko kɛ to “Kristo ɔ” aloo nɔ nɛ Yehowa pɔ lɛ nu ɔ he lo? Mawu jɔɔ Mose ngɛ su kpakpa nɛ e je kpo ɔ he. Huɛ bɔmi gbagbanii hi e kɛ Yehowa a kpɛti. Yehowa ha lɛ he wami nɛ e kɛ tsu “ní nguanguahi nɛ ngɛ gbeye” be mi nɛ e nyɛɛ Israel bi ɔmɛ a hɛ mi kɛ yaa Si Womi Zugba a nɔ ɔ.—5 Mose 34:10-12.

12. Mɛni he blɔhi Yehowa ha wɔ?

¹² Wɔ hu a kɛ ní tsumi ko wo wa dɛ. Yehowa gu e Bi ɔ nɔ kɛ hla wɔ konɛ wa ba sɔmɔ lɛ kaa bɔ nɛ bɔfo Paulo kɛ ni kpahi hu a pee ɔ. (Kane 1 Timoteo 1:12-14.) Wɔ tsuo wa ngɛ he blɔ kaa wa maa fiɛɛ sane kpakpa a. (Mat. 24:14; 28:19, 20) Ni komɛ sɔmɔɔ kaa be tsuo sɔmɔli. Nyumuhi nɛ a baptisi mɛ nɛ a nane pi si ngɛ Mawu jami mi ɔ sɔmɔɔ ngɛ asafo ɔ mi kaa asafo mi sɔmɔli kɛ asafo mi nikɔtɔmahi. Se o weku li nɛ pi Odasefohi ji mɛ ɔ ma susu kaa se nami ko be sɔmɔmi he blɔ nɛ ɔmɛ a he, nɛ a ma nyɛ  maa tu munyu kɛ si mo ngɛ o he nɛ o kɛ ngɛ afɔle sãe ɔ he po. (Mat. 10:34-37) Ke a nyɛ nɛ a fia o kɔni si tso ɔ, o yi mi ma bɔni mo enyɔɔnyɔ peemi kaa se nami ko be he kaa o kɛ o he ngɛ afɔle sãe. E ma nyɛ maa pee mo kaa o be nyɛe ma tsu ní tsumi nɛ a kɛ wo o dɛ ɔ. Ke e ba jã a, mɛni blɔ nɔ hemi kɛ yemi ma nyɛ maa ye bua mo konɛ o fĩ si ngɛ?

13. Mɛni blɔ nɔ Yehowa guu kɛ dlaa wɔ konɛ wa nyɛ nɛ wa tsu ní tsumihi nɛ e kɛ woɔ wa dɛ ɔ?

¹³ Mo ná hemi kɛ yemi ngɛ Yehowa mi nɛ o kpa lɛ pɛɛ nɛ e ye bua mo. Mo de lɛ níhi nɛ woɔ o he gbeye kɛ níhi nɛ haoɔ mo ɔ. Yehowa lɛ e ha mo ní tsumi ɔ nɛ, lɔ ɔ he ɔ, e maa ye bua mo konɛ o nyɛ nɛ o tsu. Mɛni blɔ nɔ e maa gu kɛ pee jã? Blɔhi a nɔ nɛ e gu kɛ ye bua Mose ɔ, jamɛ a blɔ ɔmɛ a nɔ nɔuu nɛ e maa gu kɛ ye bua mo. Kekleekle ɔ, Yehowa ngɛ nɔ mi mae kɛ ngɛ mo hae ke: “Ma wo mo he wami; ma piɛɛ o he; Ma bu o he, nɛ ma baa o yi.” (Yes. 41:10) Nɔ́ nɛ ji enyɔ ɔ, e ngɛ mo kaie kaa e si womihi baa mi. E de ke: “Bɔ nɛ i de ɔ, jã pɛpɛɛpɛ e maa ba mi.” (Yes. 46:11) Nɔ́ nɛ ji etɛ ɔ, Yehowa haa mo “he wami kpetekpleenyɛ” konɛ o kɛ tsu o sɔmɔmi ní tsumi ɔ. (2 Kor. 4:7) Nɔ́ nɛ eywiɛ ɔ, wa Tsɛ ɔ nɛ e susuɔ wa he ɔ ha wɔ nyɛmimɛ nitsɛnitsɛ ngɛ je kɛ wɛ konɛ a ‘wo wɔ he wami nɛ a ye bua wɔ’ konɛ wa nyɛ nɛ waa to wa tsui si. A jaa Yehowa nɛ a yeɔ lɛ anɔkuale. (1 Tes. 5:11) Ke Yehowa ha mo níhi nɛ maa ye bua mo konɛ o nyɛ nɛ o sɔmɔ lɛ saminya a, hemi kɛ yemi nɛ o ngɛ ngɛ e mi ɔ mi waa. Enɛ ɔ ma ha nɛ o maa bu ní tsumi nɛ e kɛ wo o dɛ ɔ kaa e he jua wa pe nɔ́ tsuaa nɔ́ ngɛ je ɔ mi.

14. Mɛni he je nɛ Mose ngɛ nɔ mi mami kaa Mawu maa jɔɔ lɛ ɔ?

¹⁴ Mose “hɛ ngɛ hiɔwo nɛ e ma ná hwɔɔ se ɔ nɔ.” (Heb. 11:26) E ngɛ mi kaa Mose li níhi fuu nɛ maa ba hwɔɔ se mohu lɛɛ, se e da bɔɔ ko nɛ e le ɔ nɔ kɛ mwɔ e yi mi kpɔ. Kaa bɔ nɛ e ji ngɛ Abraham blɔ fa mi ɔ, Mose hu ngɛ nɔ mi mami kaa Yehowa ma tle gbogboehi a si. (Luka 20:37, 38; Heb. 11:17-19) Akɛnɛ Mose ngɛ nɔ mi mami kaa Mawu si womi ɔmɛ maa ba mi he je ɔ, e bui jeha 40 nɛ e ye ngɛ nyɔguɛ tso ɔ mi ɔ kɛ jeha 40 nɛ e ye ngɛ nga a nɔ ɔ kaa be puɛmi. E ngɛ mi kaa Mose li bɔ nɛ Mawu si womi ɔmɛ ma plɛ kɛ ba mi ha tutuutu mohu lɛɛ, se e ngɛ hemi kɛ yemi ngɛ níhi nɛ maa ba hwɔɔ se ɔ mi.

15, 16. (a) Mɛni he je nɛ e he hia nɛ waa kɛ wa juɛmi nɛ ma jɔɔmi nɛ wa ma ná a nɔ ɔ? (b) Mɛni jɔɔmihi o ngɛ blɔ hyɛe kaa o ma ná ngɛ Matsɛ Yemi ɔ sisi?

 ¹⁵ Anɛ o ‘hɛ ngɛ hiɔwo nɛ o ma ná hwɔɔ se ɔ nɔ’ lo? Kaa bɔ nɛ e ji ngɛ Mose blɔ fa mi ɔ, loloolo ɔ, pi nɔ́ tsuaa nɔ́ nɛ wɔ hu wa le ngɛ Mawu si womi ɔmɛ a he. Kaa nɔ hyɛmi nɔ́ ɔ, wa ‘li ngmlɛfia’ nɛ amanehlu ngua a ma fɛ. (Mar. 13:32, 33) Se wa le Paradeiso ɔ he níhi fuu nɛ Mose li. E ngɛ mi kaa wa li Mawu si womi ɔmɛ a he ní fitsofitso mohu lɛɛ, se wa le Mawu si womihi fuu nɛ maa ba mi ngɛ Mawu Matsɛ Yemi ɔ sisi. Waa kɛ wa “hɛ” ma nyɛ maa fɔ si womi nɛ ɔmɛ a nɔ. Ke wa poɔ je ehe ɔ he foni ngɛ wa juɛmi mi ɔ, lɔ ɔ ma ha nɛ wa ma hla Matsɛ Yemi ɔ se blɔ kekle. Ngɛ mɛni blɔ nɔ? Mo susu nɔ́ nɛ ɔ he nɛ o hyɛ: Anɛ o maa suɔ kaa o ma he we ko nɛ o li bɔ nɛ a plɛ kɛ ma lo? E ngɛ heii kaa o be jã pee! Jã nɔuu kɛ̃ nɛ waa kɛ wa be tsuo be nɔ́ ko nɛ puɛɔ se die. Ke wa ngɛ hemi kɛ yemi ɔ, waa kɛ wa juɛmi maa ma si himi nɛ wa ma ná ngɛ Matsɛ Yemi ɔ sisi ɔ nɔ.

¹⁶ Ja o “hɛ ngɛ” si himi nɛ o ma ná ngɛ Paradeiso ɔ mi ɔ nɔ loko o ma nyɛ maa po Mawu Matsɛ Yemi ɔ he foni heii ngɛ o juɛmi mi. Kaa nɔ hyɛmi nɔ́ ɔ, Baiblo ɔ tu ni komɛ nɛ a hi si hyɛ loko a fɔ Yesu ɔ a he munyu. Ke o ngɛ nimli nɛ ɔmɛ a he ní kasee ɔ, mo susu sane nɛ o ma bi mɛ ke a tle mɛ si ɔ he. Mo susu sanehi nɛ mɛ hu a ma bi mo kɛ kɔ bɔ nɛ o hi si ha ngɛ nyagbe ligbi ɔmɛ a mi ɔ he. Ke a tle o weku li nɛ a gbo jeha lafahi abɔ ɔ si ɔ, mo susu bua jɔmi nɛ o ma ná kɛ tsɔɔ mɛ níhi tsuo nɛ Mawu pee ha mɛ ɔ he. Ke lohwe awi yeli tsuo a hɛ mi jɔ ɔ, hyɛ bua jɔmi nɛ o ma ná kɛ kase a he ní ha. Bɔɔbɔɔbɔɔ ɔ, o ma ba ye mluku. Ke e ba jã a, mo susu bɔ nɛ huɛ bɔmi gbagbanii maa hi o kɛ Yehowa nyɛ kpɛti ɔ he.

17. Ke neneene wami nɛ wa ma ná hwɔɔ se ɔ ngɛ wa juɛmi mi ɔ, mɛni blɔ nɔ e maa ye bua wɔ ngɛ?

¹⁷ Ke neneene wami nɛ wa ma ná hwɔɔ se ɔ ngɛ wa juɛmi mi ɔ, lɔ ɔ maa ye bua wɔ nɛ wa ma fi si, wa ma ná bua jɔmi, nɛ wa maa mwɔ wa yi mi kpɔ ngɛ nile mi. Paulo ngma ya ha Kristofohi nɛ a pɔ mɛ nu ɔ ke: “Ke wa ngɛ nɔ́ ko blɔ hyɛe, nɛ wa ngɔ wa hɛ kɛ fɔ nɔ kaa wa nine maa su nɔ ɔ, wa toɔ wa tsui si.” (Rom. 8:25) Munyu nɛ ɔ kɔɔ Kristofohi tsuo a he, a ma ná neneene wami ngɛ hiɔwe jio, a ma ná ngɛ zugba a nɔ jio. E ngɛ mi kaa wa nine sui jɔɔmi nɛ ɔmɛ a nɔ lolo mohu lɛɛ, se wa ngɛ hemi kɛ yemi nɛ mi wa. Enɛ ɔ he ɔ, wa ngɛ ‘hiɔwo nɛ wa ma ná hwɔɔ se ɔ’ mlɛe. Kaa bɔ nɛ Mose bui jehahi babauu nɛ e kɛ sɔmɔ Yehowa a kaa e ji be puɛmi ɔ, jã kɛ̃ nɛ e ji ngɛ wɔ hu wa blɔ fa mi. Wa ngɛ nɔ mi mami kaa “níhi nɛ a naa a hii si be bɔɔ ko kɛkɛ; se nihi nɛ a nɛ́ ɔ hii si kɛ yaa neneene.”—Kane 2 Korinto Bi 4:16-18.

18, 19. (a) Mɛni he je nɛ e sa nɛ waa bɔ mɔde wawɛɛ konɛ wa ha nɛ wa hemi kɛ yemi ɔ mi nɛ wa daa a? (b) Mɛni he wa ma susu ngɛ ni kasemi nɛ nyɛɛ se ɔ mi?

¹⁸ “Hemi kɛ yemi tsɔɔ wɔ kaa níhi nɛ wa nɛ́ kɛ wa hɛngmɛ ɔ, a ngɛ niinɛ.” (Heb. 11:1) Nɔ nɛ be hemi kɛ yemi ɔ li se nami nɛ ngɛ Yehowa sɔmɔmi he. Jamɛ a nɔ ɔ buu mumi mi juetli kaa e ji “kuasiahi a sane.” (1 Kor. 2:14) Wa ngɛ blɔ hyɛe kaa wa ma ná neneene wami, nɛ Mawu ma tle gbogboehi a si, nɛ wa maa na mɛ. Nihi nɛ a ngɛ je ɔ mi hyɛ we ní nɛ ɔmɛ blɔ. Je mi ní leli nɛ a hi si ngɛ Paulo be ɔ mi ɔ tsɛ Paulo ke “nyapuutsɛ.” Mwɔnɛ ɔ hu ɔ, nihi fuu susu kaa níhi nɛ waa kɛ wa hɛ fɔ nɔ, nɛ wa fiɛɛɔ kɛ tsɔɔ nihi ɔ ji kuasiahi a sane.—Níts. 17:18.

¹⁹ Akɛnɛ nihi nɛ a bɔle wɔ ɔ be hemi kɛ yemi he je ɔ, e sa nɛ waa bɔ mɔde wawɛɛ nɛ wa ha nɛ wa hemi kɛ yemi ɔ mi nɛ wa daa. Mo kpa Yehowa pɛɛ konɛ “o hemi kɛ yemi kó ta.” (Luka 22:32) O hɛ nɛ hi haomihi nɛ maa ba yayami peeli a nɔ, kɛ jɔɔmihi nɛ nihi nɛ a sɔmɔɔ Yehowa a ma ná a nɔ, konɛ o susu neneene wami nɛ o ma ná a hu he. Se hemi kɛ yemi nɛ Mose ngɛ ɔ hu ye bua lɛ nɛ e susuu we ní nɛ ɔmɛ pɛ a he. Ngɛ ni kasemi nɛ nyɛɛ se ɔ mi ɔ, wa ma susu bɔ nɛ hemi kɛ yemi nɛ Mose ngɛ ɔ ha nɛ e na nɔ nɛ a ‘nɛ́ lɛ kɛ hɛngmɛ ɔ’ he.—Heb. 11:27.