Yehowa Mawu bɔ bɔfohi ayɔhi abɔ jehahi babauu loko e bɔ adesahi. (Hiob 38:4, 7) Bɔfo nɛ ɔmɛ a he wa, nɛ a sɔmɔɔ Mawu. Be komɛ ɔ, Mawu tsɔɔ mɛ nɛ a ngɔɔ blɔ tsɔɔmi kɛ ya haa e sɔmɔli nɛ a ngɛ zugba a nɔ ɔ, nɛ a poɔ a he piɛ. (La 91:10, 11) Mwɔnɛ ɔ, bɔfohi ngɛ nihi ye buae konɛ a ná sane kpakpa a nɛ Yesu se nyɛɛli ngɛ fiɛɛe ɔ he se.—Kane Kpojemi 14:6, 7.

Anɛ e sa kaa waa sɔle kɛ ha bɔfohi lo? Dɛbi. Sɔlemi piɛɛ Mawu jami he, nɛ Mawu pɛ nɛ e sa kaa wa ja. (Kpojemi 19:10) Akɛnɛ bɔfo ɔmɛ ji Mawu sɔmɔli he je ɔ, a buɔ Mawu blɔ tsɔɔmihi tue mohu pe nimli. Lɔ ɔ he ɔ, e sa kaa be tsuaa be ɔ, waa sɔle kɛ ha Mawu pɛ kɛ gu Yesu nɔ.—Kane La 103:20, 21; Mateo 26:53.

A bɔ bɔfohi nɛ a ha mɛ he blɔ nɛ́ a kɛ peeɔ nɔ́ nɛ nɔ suɔ kaa bɔ nɛ e ji ngɛ adesahi a blɔ fa mi ɔ. Aywilɛho sane ji kaa, bɔfohi babauu tsɔ Mawu hɛ mi atuã. (2 Petro 2:4) Satan ji nɔ nɛ sɛ hlami tsɔ atuã; bɔfo kpahi ya piɛɛ e he, nɛ a ba pee daimoniohi. A sake Satan kɛ e daimonio ɔmɛ kɛ je hiɔwe kɛ fɔ zugba a nɔ.—Kane Kpojemi 12:7-9.

Bɔ nɛ ní yayahi kɛ basabasa peemi ya hɛ mi ha kɛ je jeha 1914 kɛ ma nɛ ɔ ji okadi nɛ tsɔɔ kaa e be kɛe nɛ Mawu ma kpata Satan kɛ daimonio ɔmɛ a hɛ mi. Kɛkɛ ɔ, Mawu ma ha zugba a maa pee paradeiso kaa bɔ nɛ e ji ngɛ sisije ɔ.—Kane Kpojemi 12:12; 21:3, 4.