Kaa bɔ nɛ e ji ngɛ Alex blɔ fa mi ɔ, nihi fuu nɛ a ngɛ mwɔnɛ ɔ sume ní tsumi nɛ he wa. Aaron nɛ ji lɔle dlalɔ ɔ de ke, “Nihi babauu susu kaa ní tsumi nɛ ‘ba si’ ɔ sɛ mɛ. Juɛmi nɛ a hɛɛ ji: Ma pɛtɛ ní tsumi nɛ ɔ he jã kɛ yaa si benɛ ma ná ní tsumi kpakpa ko.”

Mɛni he je nɛ nihi babauu susuɔ kaa e sɛ nɛ a tsu ní tsumi nɛ he wa? Eko ɔ, níhi nɛ adafi fiami ní tsumi hehi deɔ kɛ kɔɔ si himi kpakpa, kɛ si himi nɛ ngɛ gbɔjɔɔ he ɔ ná a nɔ he wami. Matthew nɛ dlaa tsuhi kɛ ní kpahi ɔ de ke, “Nihi susuɔ kaa nihi nɛ a tsuɔ ní wawɛɛ ɔ mohu nɛ a yeɔ ohia.” Shane nɛ e ní tsumi ɔ ngɛ kaa Matthew nɔ́ ɔ de nɔ́ ko kaa jã nɔuu. E de ke: “Hiɔwo nɛ ní tsuli ngɔ ɔ, pi e he ní tsumi nɛ a tsuɔ.”

Se nihi fuu nɛ a ye manye ngɛ si himi mi ɔ tsuɔ ní tsumi nɛ he wa. Daniel nɛ ye jeha 25 nɛ e ji tsu malɔ ɔ de ke, “I susu kaa ke o tsuɔ ní wawɛɛ ɔ, o náa bua jɔmi, titli ke o ngɛ ní ɔ tsue ngɛ yi mi tomi kpakpahi a he je.” Andre nɛ e ye jeha 23 hu de nɔ́ ko kaa jã. E de ke, “I he ye kaa bua jɔmi nɛ nɔ ko ma ná, kɛ ní tsumi nɛ nɔ ko bua maa jɔ he ɔ ngɛ tsakpa. Ke nɔ ko bua jɔɛ ní tsumi he ɔ, nɔ ɔ ná we bua jɔmi, mohu ɔ, si himi gbeɔ e nya!”

Mɛni ha nɛ nihi kaa Daniel kɛ Andre ná juɛmi nɛ da ngɛ ní tsumi he? Ngɛ e kpiti pomi mi ɔ, a kɛ Baiblo sisi tomi mlaahi tsu ní ngɛ a si himi mi. Baiblo ɔ tuɔ munyu kɛ siɔ hejɔ tomi, nɛ e woɔ wɔ he wami konɛ wa tsu ní wawɛɛ. Se Baiblo ɔ de we ke wa tsu ní kɛkɛ. Mohu ɔ, e tsɔɔ wɔ nɔ́ nɛ ke wa pee ɔ, wa bua maa jɔ wa ní tsumi he.

Mɛni Baiblo sisi tomi mlaahi ma nyɛ maa ye bua mo konɛ o bua nɛ jɔ ní nɛ o tsuɔ ɔ he? Wa ngɛ mo nine fɔe nɛ o susu sisi tomi mlaa amɛ ekomɛ a he ngɛ munyu nɛ nyɛɛ se ɔ mi.