Paul nɛ e ngɛ yo kɛ bimɛ enyɔ ɔ de ke: “Be ko ɔ, sika nɛ wa yeɔ ngɛ wa ma a mi ɔ he jua ba gbo, niye ní be, nɛ bɔɔ ɔ nɛ ngɛ ɔ hu hí hemi. Ke wa yaa he niye ní ɔ, wa woɔ zã be kɛkɛɛ, se behi fuu ɔ, niye ní ɔ taa nɛ e sui wa nɔ. Hwɔ ha nɛ nihi flã kanyakanya, nɛ ni komɛ hɛli ngɛ gbɛjegbɛhi a nɔ. Ní tsɔwihi nɛ wa hia daa ligbi ɔ po, ke nɔ ko be sika ayɔ akpehi abɔ ɔ, e be nyɛe ma he. Nyagbenyagbe ɔ, sika nɛ wa yeɔ ngɛ ma a mi ɔ he jua gbo kulaa. Sika nɛ i to si, kɛ nɔ́ nɛ i kɛ pee insurance kɛ pension ɔ nyɛ we nɛ e ye bua mi.”

Paul ba na kaa ja e ngɔ “nile nitsɛnitsɛ” kɛ tsu ní loko e ma nyɛ maa baa e weku ɔ yi. (Abɛ 3:21) Paul de ke: “Jinɛ electrical contractor ji mi, se ní tsumi saisaa nɛ ma ná a, i tsuɔ, ke hiɔwo ɔ pi po. Ni komɛ ngɔ niye ní aloo a we mi níhi kɛ wo mi hiɔ. Ke nɔ ko ha mi jale tso eywiɛ ɔ, i ngɔɔ enyɔ, kɛkɛ i jua enyɔ. Bɔɔbɔɔbɔɔ ɔ, i ba ná kungwɔ bimɛ 40. Benɛ a wa a, i jua mɛ, nɛ i he kungwɔ bimɛ 300. Pee se ɔ, i ngɔ kungwɔ 50 kɛ ya ngɔ blɛfo mamu kotoku enyɔ nɛ eko tsuaa eko mi jiɔmi ji kilogram 50. Enɛ ɔ ha nɛ i nyɛ nɛ i hyɛ ye weku ɔ, kɛ ni kpahi a nɔ be kɛkɛɛ.”

Paul na hu kaa nɔ́ nɛ nile ngɛ mi nɛ e sa nɛ e pee ji kaa e maa ngɔ e he kɛ fɔ Mawu nɔ. Ke wa pee Mawu suɔmi nya ní ɔ, e maa ye bua wɔ. Yesu de ngɛ wa hiami níhi nɛ wa susuɔ a he ɔ he ke: ‘Nyɛ ko hao nyɛ he kulaa ejakaa nyɛ Tsɛ ɔ le kaa ní nɛ ɔmɛ a he hia nyɛ.’—Luka 12:29-31.

Se aywilɛho sane ji kaa, Mawu he nyɛlɔ ngua nɛ ji Satan Abosiami sisi nihi babauu ngɛ je ɔ mi, nɛ a ngɔ a he wami tsuo kɛ ngɛ he lo nya níhi a se dii. Nihi haoɔ a he wawɛɛ ngɛ a hiami níhi a he, nɛ a nlaa ngɛ níhi nɛ a nine be nyɛe maa su nɔ ɔ a he. A bɔɔ mɔde wawɛɛ kaa a ma ná níhi nɛ he hia we mɛ. Nihi babauu yeɔ hiɔ loko a naa kaa ‘ke o pa  sika ngɛ nɔ ko dɛ ɔ, o plɛɔ peeɔ e nyɔguɛ.’—Abɛ 22:7.

Nihi babauu pee we a ní ngɛ nile mi. Paul de ke: “Ye kpɔ mi bi fuu je a wekuhi kɛ a huɛmɛ a he kɛ ho ma se ya kɛ susumi kaa a ma ná ‘si himi kpakpa’ ngɛ lejɛ ɔ. A ti ni komɛ gui blɔ kpakpa nɔ kɛ ya, lɔ ɔ he ɔ, a nɛ́ ní tsumi. Be tsuaa be ɔ, a ngɛ polisihi a nya fo tue, nɛ a hwɔɔ kpo nɔ. A ngmɛ́ blɔ konɛ Mawu nɛ ye bua mɛ. Se i kɛ ye weku ɔ lɛɛ, wa ma wa juɛmi nya si kaa wa ma ha Mawu nɛ ye bua wɔ konɛ wa nyɛ nɛ waa da sika he nyagbahi nɛ waa kɛ ngɛ kpee ɔ nya.”

Paul de hu ke: “Yesu de ke: ‘Nyɛ ko hao nyɛ he ha hwɔɔ; ejakaa hwɔɔ hu ma kɛ lɛ nitsɛ e haomihi babauu. Haomihi nɛ baa daa ligbi ɔ, e hia we kaa waa ngɔ ekpa ko kɛ ba piɛɛ ligbi ko nɔ́ he hu.’ Enɛ ɔ he ɔ, nɔ́ nɛ i sɔleɔ ngɛ he daa ligbi ji kaa Mawu nɛ ‘ha wɔ wa mwɔnɛ ɔ nya mi ngma’ konɛ waa hi wami mi. Nɛ kaa bɔ nɛ Yesu wo si ɔ, Mawu ye bua wɔ niinɛ. Pi nɔ́ nɛ wa suɔ nɛ waa yeɔ be fɛɛ be. Ligbi ko ɔ, i ya da si ke ma he niye ní be mi nɛ i li nɔ́ nɛ a ngɛ juae ɔ. Benɛ i su ní ɔ he loko i na kaa mamoo yogurt, nɛ ji niye ní ko nɛ a kɛ na nyɔ nyu lɛ peeɔ. I sume yogurt. Se lɔ ɔ hu niye ní, lɔ ɔ he ɔ, wa bɔ mɔde nɛ wa ye lɛ jã jamɛ a gbɔkuɛ ɔ. I naa Mawu si kaa, ngɛ jamɛ a he fimi be ɔ tsuo mi ɔ, ye weku ɔ kɛ mi mi gu hwɔɛ si.” *

Amlɔ nɛ ɔ, níhi a mi hi ha wɔ bɔɔ mohu lɛɛ. Se si himi nɛ waa kɛ kpe ɔ ha nɛ wa na kaa, ke wa ngɔ wa hɛ kɛ fɔ Mawu nɔ ɔ, wa be yeyeeye pee. Ke wa ya nɔ nɛ wa pee Yehowa * suɔmi nya ní ɔ, lɛ hu e maa ya nɔ nɛ e maa ye bua wɔ. Wa na kaa munyu nɛ ngɛ La 34:8 ɔ ji anɔkuale. E de ke: ‘Nyɛɛ ka Yehowa nɛ nyɛɛ hyɛ, nɛ nyɛ maa na kaa e hi. A gbaa nɔ nɛ ngɔɔ e hɛ kɛ fɔɔ e nɔ ɔ.’ Enɛ ɔ he ɔ, ke si himi ɔ mi kpale wa ekohu ɔ, wa yi gbeye.

“Amlɔ nɛ ɔ, wa na kaa nɔ́ nɛ adesahi hia pɛ ji niye ní, se pi ní tsumi loo sika. Mawu wo si ke: ‘Zugba a maa ba ní saminya.’ Wa ngɛ be nɛ si womi nɛ ɔ maa ba mi ɔ blɔ hyɛe wawɛɛ. Se amlɔ nɛ ɔ nɛ jamɛ a be ɔ sui lolo ɔ, ‘ke wa ngɛ nya mi ngma, kɛ heha ní ɔ, lɔ ɔ pɛ hiɛ ha wɔ.’ Mawu Munyu ɔ woɔ wɔ he wami ke: “Nyɛ ko di sika se; nɔ́ tsuaa nɔ́ nɛ nyɛ ngɛ ɔ, nyɛ bua nɛ jɔ he. Ejakaa Mawu de ke, ‘I be mo sie, nɛ i be mo kuae gblegbleegble.’ Lɛɛ nyɛ ha nɛ waa kɛ kã nɛ de ke, ‘Yehowa ji ye he piɛɛlɔ, i be gbeye yee.’”” *

E biɔ hemi kɛ yemi nitsɛnitsɛ loko nɔ ko ma nyɛ maa ‘pee Mawu suɔmi nya ní’ kaa bɔ nɛ Paul kɛ e weku ɔ ngɛ pee ɔ. (1 Mose 6:9) Ke waa kɛ sika he nyagbahi ngɛ kpee amlɔ nɛ ɔ jio, waa kɛ maa kpe hwɔɔ se jio ɔ, wa ma nyɛ maa kase ní kɛ je bɔ nɛ Paul kɛ nile nitsɛ tsu ní ha a mi.

Se ke weku mi nyagbahi ha nɛ o ngɛ yeyeeye pee hu nɛɛ?