Be nɛ nyɛ sɛ gba si himi mi ɔ, nyagbahi ma nyɛ maa te si. Akɛnɛ e slo bɔ nɛ nyɛ ti nɔ tsuaa nɔ susuɔ níhi a he ha, bɔ nɛ e nuɔ níhi a he ha, kɛ bɔ nɛ e tsuɔ si himi ɔ he ní ha he je ɔ, nyagbahi ma nyɛ maa te si. Jehanɛ se hu ɔ, haomihi nɛ a hyɛ we blɔ ma nyɛ maa je he kpahi kɛ ba.

E he wɛ kulaa kaa wa maa ma wa hɛ ngɔ fɔ nyagba amɛ a nɔ, se Baiblo ɔ wo wɔ ga kaa wa tsu a he ní. (Mateo 5:23, 24) Baiblo sisi tomi mlaahi nɛ nyɛɛ kɛ ma tsu ní ɔ maa ye bua nyɛ konɛ nyɛ tsu nyɛ nyagba amɛ a he ní.

NƆ́ NƐ BAIBLO Ɔ DE: “Munyu tumi be ngɛ.” (Fiɛlɔ 3:1, 7) Nyɛɛ to be nɛ nyɛɛ sɛɛ haomi ɔ he ní. Moo je o tsui mi nɛ o ha nɛ o he piɛɛlɔ ɔ nɛ le bɔ nɛ o nuɔ he ha, kɛ o susumi ngɛ sane ɔ he. Be tsuaa be ɔ, moo “tu anɔkuale sisiisi” kɛ tsɔɔ o he piɛɛlɔ ɔ. (Efeso Bi 4:25) Ke e pee nɔ́ ko nɛ e dɔ mo wawɛɛ po ɔ, hyɛ nɛ nyɛ ko pɛ. Munyu nɛ a tuɔ lɛ blɛuu ɔ ha we nɛ ní sɛɛmi peeɔ pɛ.​—Abɛ 15:4; 26:20.

Ke o kɛ lɛ kpa we gbi po ɔ, mo ha nɛ munyu nɛ maa je o nya mi ɔ nɛ ngɔ, nɛ o je suɔmi kɛ bu kpo kɛ tsɔɔ lɛ. (Kolose Bi 4:6) Nyɛ tsu sane ɔ he ní amlɔ nɔuu, nɛ nyɛ ko kpa ní sɛɛmi.​—Efeso Bi 4:26.

NƆ́ NƐ O MA NYƐ MAA PEE:

• Nyɛɛ to be nɛ sa nɛ nyɛɛ kɛ maa sɛɛ sane ɔ he ní

• Ke o he piɛɛlɔ ɔ ngɛ munyu tue ɔ, bu tue, koo po e munyu ɔ mi. Mo hu e maa su o nɔ nɛ o maa tu munyu

NƆ́ NƐ BAIBLO Ɔ DE: “Nyɛɛ suɔ nyɛ he saminya kaa nyɛmimɛ, nɛ nɔ tsuaa nɔ nɛ bu e nyɛmi pe lɛ nitsɛ e he.” (Roma Bi 12:10) Bɔ nɛ wa buɔ munyu tue ha a he hia saminya. Nyɛɛ bɔ mɔde nɛ ‘nyɛɛ na ha nyɛ sibi, nɛ nyɛɛ ba nyɛ he si’ konɛ nyɛɛ nu nɔ́ nɛ nyɛ he piɛɛlɔ ɔ ma de ɔ sisi. (1 Petro 3:8; Yakobo 1:19) Mo ko pee o he kaa o ngɛ tue bue be mi nɛ o juɛmi ngɛ he kpa. Ke e maa hi ɔ, mo kpa nɔ́ nɛ o ngɛ pee ɔ nɛ o bu o he piɛɛlɔ ɔ tue saminya, loo bi lɛ keji e maa hi nɛ nyɛ susu he be kpa. Ke o naa o he piɛɛlɔ ɔ kaa o huɛ se pi o he nyɛlɔ ɔ, o ‘mi mi be lɛ fue mlamlaamla.’​—Fiɛlɔ 7:9.

NƆ́ NƐ O MA NYƐ MAA PEE:

• Ke nɔ́ nɛ e ngɛ dee ɔ ngɔɛ ha mo po ɔ, o kɛ juɛmi nɛ da nɛ bu lɛ tue

• Moo bu tue nɛ o yɔse nɔ́ tutuutu nɛ e ngɛ hlae maa tsɔɔ. Moo to bɔ nɛ e ngɛ e he pee ha kɛ gbi nɛ e kɛ ngɛ munyu tue ɔ he hɛ

NƆ́ NƐ BAIBLO Ɔ DE: “Ke o tsu ní ɔ, o ma na nɔ́ ko kɛ je mi. Se ke o hii si nɛ o ngɛ munyu tue puu kɛkɛ ɔ, o maa ye ohia.” (Abɛ 14:23) Ke nyɛ ma juɛmi nya si kaa nyɛ maa pee nɔ́ ko ɔ, e sa nɛ nyɛ ni enyɔ ɔmɛ tsuo nyɛ tsu he ní. Enɛ ɔ peemi biɔ mɔde bɔmi wawɛɛ, se kɛ̃ ɔ, nyɛ ma ná he se. (Abɛ 10:4) Ke nyɛ pee kake kɛ tsu he ní ɔ, nyɛ ma ná nyɛ “dengme gbomi ɔ he se.”​—Fiɛlɔ 4:9.

NƆ́ NƐ O MA NYƐ MAA PEE:

• Nyɛɛ pee juɛmi ngɛ nɔ́ pɔtɛɛ nɛ nyɛ ti nɔ tsuaa nɔ maa pee kɛ tsu nyɛ nyagba a he ní ɔ he

• Be saa be ɔ, nyɛɛ hi si nɛ nyɛɛ hyɛ kaa nyɛ nyɛ ngɛ he ni tsue lo