Mawu to blɔ nya kɛ ha blematsɛ Abraham sisi bimɛ nɛ e pee mɛ ma nɛ e ha mɛ mlaahi. E tsɛ ma a ke “Israel,” nɛ e ngɔ anɔkuale jami kɛ e munyu ɔ kɛ wo mɛ pɛ a dɛ. (La 147:19, 20) Enɛ ɔ he ɔ, kɛ gu Israel nɔ ɔ, nihi nɛ a je mahi tsuo a nɔ ɔ ma ná jɔɔmi.​—Kane 1 Mose 22:18.

Mawu hla Israel bi ɔmɛ kaa e we odasefohi. A yi nɔ sane tsɔɔ wɔ kaa ke nihi ye Mawu mlaahi a nɔ ɔ, a náa he se. (5 Mose 4:6) Enɛ ɔ he ɔ, kɛ gu Israel bi ɔmɛ a nɔ ɔ, ni kpahi ma nyɛ maa le anɔkuale Mawu ɔ.​—Kane Yesaya 43:10, 12.

Pee se ɔ, Yehowa kua Israel bi ɔmɛ nɛ e ngɔ Kristofohi asafo ɔ kɛ to a nane mi. (Mateo 21:43; 23:37, 38) Amlɔ nɛ ɔ, anɔkuale Kristofohi ngɛ sɔmɔe ngɛ Israel bi ɔmɛ a nane mi kaa Yehowa we odasefohi.​—Kane Bɔfo Ɔmɛ A Ní Tsumi 15:14, 17.

Yesu to blɔ nya kɛ ha e se nyɛɛli ɔmɛ nɛ a fiɛɛ nɛ a pee nihi ngɛ je ma amɛ tsuo a mi ɔ e kaseli. (Mateo 10:7, 11; 24:14; 28:19, 20) Amlɔ nɛ ɔ, ní tsumi nɛ ɔ ma nyagbe ngɛ je ɔ nyagbe be nɛ ɔ mi. Ngɛ yi nɔ sane mi ɔ, be nɛ ɔ ji kekle be nɛ Yehowa pee nihi ayɔhi abɔ nɛ a je mahi tsuo a mi ɔ kake ngɛ anɔkuale jami mi. (Kpojemi 7:9, 10) Anɔkuale Kristofohi woɔ a sibi he wami nɛ a yeɔ kɛ bua a he. Ngɛ je ɔ mi tsuo ɔ, a to Baiblo tsɔsemi kake too he blɔ nya kɛ ha mɛ ngɛ a kpehi a sisi.​—Kane Hebri Bi 10:24, 25.

Ngɛ jeha 1870 be ɔ mi ɔ, Baiblo kaseli a kuu nyafii ko bɔni Baiblo mi anɔkualehi nɛ laa be babauu ɔ nami ekohu. A le kaa Yesu to Kristofohi asafo ɔ he blɔ nya nɛ a fiɛɛ, lɔ ɔ he ɔ, a bɔni Matsɛ Yemi ɔ fiɛɛmi ngɛ je ɔ mi tsuo. Ngɛ jeha 1931 mi ɔ, a ngɔ biɛ Yehowa Odasefohi kɛ fɔ a nɔ.​—Kane Bɔfo Ɔmɛ A Ní Tsumi 1:8; 2:1, 4; 5:42.

Ngɛ kekle jeha lafa a mi ɔ, blɔ tsɔɔmi ajla toli nɛ́ yɔse Yesu kaa asafo ɔ Yi ɔ hyɛ Kristofohi asafohi nɛ a ngɛ ma slɔɔtohi a mi ɔ a nɔ. (Bɔfo Ɔmɛ A Ní Tsumi 16:4, 5) Jã kɛ̃ nɛ mwɔnɛ ɔ, Blɔ Tsɔɔmi Ajla Toli nɛ́ a ji nikɔtɔmahi nɛ a ngɛ níhi a si kpami hyɛɛ Yehowa Odasefohi nɛ ngɛ je ɔ mi tsuo ɔ a nɔ. Yehowa Odasefohi asafo ɔ ní tsumi kɔnihi nɛ́ a tsɔɔ Baiblo kasemi womihi a sisi kɛ yaa gbihi nɛ hiɛ pe 600 mi, nɛ́ a fiaa womi nɛ ɔmɛ, nɛ́ a gbaa hulɔ ɔ, Blɔ Tsɔɔmi Ajla Toli ɔmɛ lɛ hyɛɛ a nɔ. Enɛ ɔ he ɔ, Blɔ Tsɔɔmi Ajla Toli ɔmɛ nyɛɔ nɛ a ngɔɔ he wami womi kɛ blɔ tsɔɔmi nɛ je Ngmami ɔ mi kɛ haa asafohi nɛ hiɛ pe 100,000 ngɛ je ɔ mi tsuo. Ngɛ asafo tsuaa asafo mi ɔ, nyumuhi nɛ sa sɔmɔɔ kaa asafo mi nikɔtɔmahi loo nɔ hyɛli. Nyumu nɛ ɔmɛ a kɛ suɔmi hyɛɛ Mawu asafo ɔ nɔ.​—Kane 1 Petro 5:2, 3.

A to blɔ nya ha Yehowa Odasefohi nɛ a fiɛɛ sane kpakpa a nɛ a pee nihi kaseli. Wa fiɛɛɔ haa nihi ngɛ a wehi a mi kaa bɔ nɛ kaseli ɔmɛ pee ɔ. (Bɔfo Ɔmɛ A Ní Tsumi 20:20) Waa kɛ nihi nɛ a suɔ kaa a maa le anɔkuale ɔ kaseɔ Baiblo ɔ. Se pi asafo ko kɛkɛ ji Yehowa Odasefohi. Wa ji weku nɛ ngɛ Tsɛ nɛ e ngɛ suɔmi. Wa ji nyɛmimɛ nyumuhi kɛ yihi nɛ a susuɔ a sibi a he. (2 Tesalonika Bi 1:3) Akɛnɛ Yehowa we bi peeɔ a ní ngɛ blɔ nya tomi nya konɛ a kɛ sa Mawu hɛ mi nɛ́ a ye bua ni kpahi hu he je ɔ, a ji weku nɛ a ngɛ bua jɔmi pe kulaa ngɛ zugba a nɔ.​— Kane La 33:12; Bɔfo Ɔmɛ A Ní Tsumi 20:35.