Benɛ Natanael ba piɛɛ Yesu kaseli ɔmɛ a he ɔ we ligbi etɛ se ɔ, Yesu kɛ e kaseli ɔmɛ ekomɛ a ma blɔ nɔ kɛ yaa Galilea yiti je. E maa pee kaa mɛ tsuo a je lejɛ ɔ ní ɔmɛ a mi. A yaa he nɛ Natanael je ɔ ngɛ Kana. Kana ngɛ Nazaret ma a yiti je ngɛ yo ɔmɛ a nɔ. A fɔ Yesu kɛ e kaseli ɔmɛ nine kɛ ya yo kpeemi ko sisi ngɛ Kana.

Yesu nyɛ Maria hu ba yo kpeemi ɔ sisi. Akɛnɛ Maria huɛmɛ ji ayɛflo ɔ weku li he je ɔ, e maa pee kaa Maria piɛɛ a he kɛ ngɛ nibwɔ ɔmɛ a nɔ hyɛe. Enɛ ɔ he ɔ, benɛ dã nɛ a kɛ ngɛ nibwɔ ɔmɛ a nɔ hyɛe ɔ ngɛ tae ɔ, e na mla, nɛ e de Yesu ke: “Ni ɔmɛ a wai ta” oo.​​—Yohane 2:3.

Maria ngɛ hlae nɛ Yesu nɛ pee dã nɛ ngɛ tae ɔ he nɔ́ ko. Bɔ nɛ Yesu ha e nyɛ ɔ heto ha a tsɔɔ kaa pi e nyɛ ɔ nɛ maa tsɔɔ lɛ nɔ́ nɛ e kɛ he wami nɛ Mawu ha lɛ ɔ maa pee. Yesu de lɛ ke: ‘Maa, mɛni enɛ ɔ kɔɔ ngɛ i kɛ mo wa he?’ (Yohane 2:4) Mawu lɛ hla Yesu kaa Matsɛ, enɛ ɔ he ɔ, lɛ nɛ e sa nɛ e tsɔɔ Yesu nɔ́ nɛ e pee, se pi e huɛmɛ loo e weku li. Maria si e bi ɔ konɛ e bi ɔ nitsɛ nɛ mwɔ e yi mi kpɔ ngɛ nyagba a he. Lɔ ɔ he ɔ, Maria de tsɔli ɔmɛ ke: “Nɔ́ tsuaa nɔ́ nɛ e ma de nyɛ ɔ, nyɛɛ pee.”​​—Yohane 2:5.

A ngɛ didɔ ekpa, nɛ eko tsuaa eko yeɔ nyu nɛ hiɛ pe galɔn nyɔngma. Yesu de tsɔli ɔmɛ ke: “Nyɛɛ wo didɔ ɔmɛ a mi nyu nɛ a hyi.” Lɔ ɔ se ɔ, e de mɛ ke: “Nyɛɛ yɛ eko ya ha nɔ nɛ ngɛ ní tsumi ɔ nɔ hyɛe ɔ.”​​—Yohane 2:7, 8.

Benɛ ní tsumi ɔ nɔ hyɛlɔ ɔ sa e nya a, e na kaa dã a hi saminya, se e li kaa nyakpɛ blɔ nɔ nɛ a gu kɛ pee dã a. Lɔ ɔ he ɔ, e tsɛ ayɛflo huno ɔ, nɛ e de lɛ ke: ‘Ke a tsɛ ní yemi ɔ, wai kpakpa nɛ a kɛ ba maa si kekle; nɛ ke ni ɔmɛ nu bɔ nɛ a ma nyɛ ɔ, loko a kɛ nɔ́ nɛ ngɔɛ ɔ baa. Se moo lɛɛ o ngɔ wai kpakpa a ngɔ to kɛ ba su be nɛ ɔ.’​​—Yohane 2:10.

Enɛ ɔ ji kekleekle nyakpɛ ní nɛ Yesu pee. Benɛ Yesu kaseli ɔmɛ na nyakpɛ nɔ́ nɛ ɔ, a he lɛ ye wawɛɛ. Lɔ ɔ se ɔ, Yesu kɛ e nyɛ ɔ, kɛ e nyɛmimɛ ɔmɛ tsuo a kpale kɛ ho Kapernaum ya ngɛ Galilea Wo ɔ yiti je.