Dɛbi. Yehowa Odasefohi ji Kristofohi nɛ a hemi kɛ yemi ɔ daa si ngɛ Baiblo ɔ nɔ. E ngɛ mi kaa jami komɛ tsɔɔ kaa Yuda bi nɛ a ma bua a nya ngɛ Palestina a ji Baiblo gbami, se Yehowa Odasefohi tsɔɔ we jã. Odasefo ɔmɛ he we yi kaa Baiblo ɔ gba níhi nɛ ngɛ nɔ yae ngɛ ma kudɔmi mi ɔ he sane pɔtɛɛ ko kɛ fɔ si. Ngɛ anɔkuale mi ɔ, Baiblo ɔ fĩ we adesa nɔ yemi ko se, nɛ e bui ma ko mi bimɛ kaa a nɔ kuɔ pe ma kpa mi bimɛ. Yehowa Odasefohi a womi tɛtlɛɛ nɛ ji Hwɔɔmi Mɔ ɔ gba mi kpoo nɛ e de ke: “Baiblo ɔ fĩ we Zion bi a ma kudɔmi blɔ nya tomi ɔ se.”

 Womi nɛ ji, Encyclopædia Britannica a tu Zion bi a he munyu ke, a ji “kuu nɛ a yi mi tomi ji kaa a ma ha Yuda bi nɛ a ná a ma ngɛ Palestina.” Jehanɛ hu, jami kɛ ma kudɔmi he je nɛ a to kuu nɛ ɔ sisi. Yehowa Odasefohi fiɛɛ we kuu nɛ ɔ mi tsɔɔmihi kaa a jami ɔ mi tsɔɔmihi, nɛ a kɛ a he wui kuu nɛ ɔ ma kudɔmi sanehi a mi kɔkɔɔkɔ.

 Yehowa Odasefohi asafo ɔ kɛ ma kudɔmi sanehi futuu we a jami ɔ, nɛ a fĩ we ma kudɔmi kuu ko se. Yehowa Odasefohi fĩ we Zion ma kudɔmi kuu ɔ hu se. A le Yehowa Odasefohi saminya kaa a kɛ a he wui ma kudɔmi sanehi a mi, nɛ ngɛ ma komɛ a mi ɔ, a wa Odasefo ɔmɛ yi mi wawɛɛ akɛnɛ a kua kaa a kɛ a he maa wo ma kudɔmi sanehi a mi ɔ he je. Wa ngɛ nɔ mi mami kaa Mawu Matsɛ Yemi ɔ pɛ nɛ ma nyɛ maa ngɔ neneene tue mi jɔmi kɛ ba zugba a nɔ; adesa nɔ yemi ko be nɛ ma nyɛ maa pee enɛ ɔ.

 Ngɛ he saisaa nɛ Yehowa Odasefohi ngɛ ɔ, a jami ɔ mi hemi kɛ yemi ɔ mi titima amɛ eko ji tue bumi nɛ a peeɔ kɛ haa mlaahi nɛ amlaalohi kɛ ma hɛ mi nyɛɛli wo. A ti si kɛ wui amlaalohi loo ma hɛ mi nyɛɛli, nɛ a kɛ a he wui ta mi.