BRASILIË is oorspronklik deur jagter-versamelaars en bestaansboere bewoon. Portugese ontdekkingsreisigers het die Rooms-Katolieke godsdiens hierheen gebring, en baie kerke en kapelle is later gebou—waarvan party ryklik versier is met houtsneewerk wat met goud oorgetrek is.

Van die middel-16de tot die middel-19de eeu het slaweskepe sowat viermiljoen Afrikane na Brasilië gebring om in die landerye te werk. Hulle het hulle rituele saamgebring, waaruit Afro-Brasiliaanse godsdienste soos macumba en die candomblé-sekte ontstaan het. Die Afrika-invloed kom ook duidelik na vore in Brasilië se musiek, danse en kos.

Tradisionele feijoada, ’n Portugese gereg wat effens aangepas is, is ’n bredie van swart bone en ’n paar vleissoorte, wat bedien word met rys en ’n koolsoort. In die 19de en die 20ste eeu het miljoene emigrante uit Europa (hoofsaaklik Duitsland, Italië, Pole en Spanje), Japan en ander gebiede deel van die bevolking geword.

 Vandag is daar sowat 750 000 Getuies van Jehovah in meer as 11 000 gemeentes oor die hele Brasilië. Hulle hou meer as 800 000 Bybelstudies. Om vergaderplekke te voorsien, werk 31 reisende bouspanne saam met die plaaslike Getuies. Sowat 250 tot 300 Koninkryksale word elke jaar gebou of herstel. Sedert Maart 2000 is 3 647 van hierdie projekte voltooi.