Ja. Toe Jesus op die aarde was, het hy baie profesieë vervul oor “Messias die Leier”, die een wat die “Redder van die wêreld” sou wees (Daniël 9:25; 1 Johannes 4:14). Jesus het selfs ná sy dood aangehou om Messiaanse profesieë te vervul. — Psalm 110:1; Handelinge 2:34-36.

•  Wat beteken die woord “Messias”?

•  Kon meer as een persoon die profesieë oor die Messias vervul?

•  Gaan die Messias nie dalk in die toekoms verskyn nie?

•  Hoeveel profesieë oor die Messias is daar in die Bybel?

•  Party van die profesieë oor die Messias wat Jesus vervul het

 Die Hebreeuse woord Ma·sjiʹach (Messias) en die Griekse woord Khri·stos (Christus) beteken albei “Gesalfde”. Daarom beteken “Jesus Christus” dieselfde as “Jesus die Gesalfde”, of “Jesus die Messias”.

 In Bybelse tye is ’n persoon dikwels met olie gesalf wat op sy kop gegooi is wanneer hy ’n spesiale posisie van gesag ontvang het (Levitikus 8:12; 1 Samuel 16:13). Jesus is deur God aangestel om die Messias te wees — ’n posisie van groot gesag (Handelinge 2:36). God het Jesus nie met olie gesalf nie, maar eerder met heilige gees. — Matteus 3:16.

 Nee. Net soos ’n vingerafdruk net een persoon identifiseer, verwys die vervulling van Bybelprofesieë net na een Messias, of Christus. Maar die Bybel het gewaarsku dat “valse Christusse en valse profete sal opstaan en . . . groot tekens en wonders [sal] doen om, indien moontlik, selfs die uitverkorenes te mislei”. — Matteus 24:24.

 Nee. Die Bybel het voorspel dat die Messias ’n nakomeling van koning Dawid van Israel sou wees (Psalm 89:3, 4). Maar die Joodse geslagsregisters wat tot in Dawid se tyd teruggaan, bestaan nie meer nie. Dit lyk asof dit vernietig is toe die Romeine Jerusalem in 70 HJ vernietig het. a Van daardie tyd af kon niemand bewys dat hulle van die koninklike familie van Dawid is nie. Maar daardie geslagsregisters het wel in Jesus se tyd bestaan, en daarom kon selfs sy vyande nie ontken dat hy ’n nakomeling van Dawid is nie. — Matteus 22:41-46.

 Dit is nie moontlik om presies te tel hoeveel profesieë daar oor die Messias is nie. Byvoorbeeld, die manier hoe profesieë getel word, kan verskil selfs vir gedeeltes wat duidelik oor die Messias gaan. Jesaja 53:2-7 noem verskillende kenmerke wat sou help om die Messias te identifiseer. Party sal hierdie gedeelte dalk as een profesie sien, terwyl ander elke kenmerk as ’n aparte profesie beskou.