Nɩ Timoti ɩdɩ pavʋlɔ mɔɔ nɩ yɩ anyɩ ideli ɔnwʋmɔ kɛɛ ɩkɔwʋwa mmenii. Iduduli ahʋanɩ ɩhɔlɩ nnɩka sʋ̃maa ɩhɔ ɩwʋwalɩ mmenii mvʋlɔ. Iluwa eyi ti, inyianlɩ ɛbɩlawɔlɛ mɔɔ anyɩnlɩlelɛ wɔ numɔ. Asʋ̃ ɛpɛyɩ kɛɛ ɛtɩ ɔnwʋmɔ odwokɔ a?—

Timoti inyinli wɔ twonwa be mɔɔ bɔfʋlɔ yɩ kɛɛ Lɩsɩtɩla. Mmɩlɩ mɔɔ nɩ ɩdɩ kuakula nɩ, yɩ nana baalɛ Loyɛsɩ nɩɩ yɩ maamɩ Yunisi, bɔwɔlɩ ɩtʋ behilehileli yi Gyehova ɩnwʋ dɩyɛ. Mmɩlɩ mɔɔ Timoti inyii nɩ, nɩ ɩpɛyɩ kɛɛ ɩbʋwa mmenii mvʋlɔ ma bosuma Gyehova ɩnwʋ dɩyɛ.

Na mmɩlɩ mɔɔ nɩ Timoti ɩla ɔnwʋmɔ la ɩdɩ pavʋlɔ nɩ, Pɔɔlʋ ɩhanlɩ ihileli yɩ kɛɛ, ɩma bodudu ahʋanɩ bɔhɔ bɛhã odwokɔba nɩ  wɔ nnɩka mvʋlɔ. Timoti ɩhanlɩ kɛɛ: ‘Yoo, sa mʋkɔ!’ Nɩ iziyeziye ɩnwʋ kɛɛ ɩkɔhɔ na ɩahɔ ɩawʋwa mmenii mvʋlɔ.

Timoti ɩ nɩɩ Pɔɔlʋ boduli ɔhʋanɩ bɔhɔlɩ twonwa be mɔɔ ɩwɔ Masidoniyia mɔɔ bɔfʋlɔ yɩ Tɛsalonika. Mɔ ɩkɛyɛ na bɛadwu ɛkɛnɩ nɩ, nɩ ɩsɛ kɛɛ betiyia ɔhʋanɩ tɩndɩnlɩ na akʋ̃ bɛahɔ bɛavʋ ɛlɛnɩ sʋ̃. Mmɩlɩ mɔɔ bodwuli nɩ, bɔwʋwalɩ mmenii sʋ̃maa ma bozumanlɩ Gyehova ɩnwʋ dɩyɛ. Naasʋ̃, ebiyemmɔ bɛvalɩ bɔnwʋ ɛya na nɩ bɛpɛyɩ kɛɛ bepila bɛ. Meti nɩ ɩsɛ kɛɛ Pɔɔlʋ nɩɩ Timoti bɔzʋ̃ ɛkɛnɩ bɛyɩ bɔnwʋ na bɛahɔ bɛahã odwokɔba nɩ wɔ nnɩka mvʋlɔ.

Wɔ aziyianɩ be mɛda nɩ, Pɔɔlʋ ɩhanlɩ ihileli Timoti kɛɛ izia ɩhɔ Tɛsalonika na ɩhɔ ihila kezimɔ mmeliyema yɩ nɩ bɔnwʋ ɩdɩ. Nɩ ide akɛnɣazɩzɩbɛ kezile na ama iazia ɩahɔ ɔzɔ twonwa nɩ mɔɔ numɔ yɛ ɛyɛlɛ nɩ nu ebiyekʋ̃! Naasʋ̃ Timoti ɩhɔlɩ iluwakɛɛ nɩ ɩdwɩnɩ mmeliyema mɔɔ nɩ bɔwɔ ɛkɛnɩ nɩ bɔnwʋ. Izialɩ ɩɣalɩ Pɔɔlʋ yɩ pɛ, na ɩvalɩ odwokɔ fɛlɛkʋ̃ ɩɣalɩ. Na nɩ mmeliyema mɔɔ bɔwɔ Tɛsalonika nɩ bɔnwʋ dɩyɛnɛ baaba!

Timoti ɩ nɩɩ Pɔɔlʋ bɛyɛlɩ egyima alʋbɔ sʋ̃maa. Pɔɔlʋ ɩhɛlɛlɩ wɔ mmɩlɩ be kɛɛ, nɩ Timoti ɩdɩ enii mɔɔ ɩfata mɔɔ ɩkɔhʋla ɩkɔzʋ̃ma yɩ ma ɩkɔhɔ ɩkɔwʋwa asafʋ azʋlɔtʋ nɩ. Nɩ Timoti ɩdɔ Gyehova na nɩ ɩdɔ mmenii sʋ̃.

Asʋ̃ ɔdɔ mmenii na ɛpɛyɩ kɛɛ ɔbʋwa bɛ ma bosuma Gyehova ɩnwʋ dɩyɛ a?— Sɛ ɛyɛ ɔzɔ a, ekenyia ɛbɩlawɔlɛ mɔɔ anyɩnlɩlelɛ wɔ numɔ, dɩkɛ mɔɔ Timoti inyianlɩ nɩ la!