1. Akyɛdɩ azʋlɔtʋ mɔɔ Gyisɛsɩ ɩva ɩma yɛ nɩ, ebiye yɛ lɛ mɩnla a?

 ENII bela íni kɛnɩ mɔɔ yi kunlu dɩyɛnɛ tɛla Gyisɛsɩ. Mmɩlɩ mɔ nɩ ɩwɔ azɩlɛ yɩ zʋ nɩ, ɩzʋ̃ yɩ pɛ nu ɩvalɩ yi tumi ɩwʋwalɩ mmenii mvʋlɔ. (Lk. 9:​12-17) Ɩvalɩ yɩ nnwʋanlɩ idianlɩ kɛnɩ ɩmanlɩ yɛ, na mɛyɩ yɛ lɛ akyɛdɩ mɔɔ ɩtɛla ebiyela mɔɔ ɩva ɩma yɛ a. (Dwɔ. 15:13) Ɔzʋmɩ kɛɛ bodunwonli Gyisɛsɩ nɩ, ɩhɔ zʋlɔ ɩwʋwa yɛ. Kɛmɔ Gyisɛsɩ wɔlɩ anʋhʋba nɩ, izianlɩ Gyehova kɛɛ ɩvá yi sunzuma nwanzanwanza nɩ ihilehile yɛ na ɩva ɩyɩkyɩ yɛ ɛɣɛɛlɛ sʋ̃. (Dwɔ. 14:​16, 17; 16:13) Na Gyisɛsɩ luwa asafʋ ayiyialɩyɛ azʋlɔtʋ zʋ ɩbʋwaa yɛ ma yɛkɛyɛ mmenii mɔɔ bɔwɔ oyuwadɩ munwala adʋwavʋlɔ.—Mt. 28:​18-20.

2. Aninyiammɔ yɛ bɛkɩnla ‘akyɛdɩ ma adasamaa’ mɔɔ bɛhã nwʋmɔ odwokɔ wɔ Ɛfɩsɛsɩmaa 4:​7, 8 nɩ nwʋ a?

² Bɛmá yehila akyɛdɩ fʋlɔ be mɔɔ Gyisɛsɩ ɩva ɩma yɛ. Sʋ̃mavʋlɔ Pɔɔlʋ hɛlɛlɩ kɛɛ, mmɩlɩ mɔ Gyisɛsɩ hɔlɩ sʋlɔ mɛda nɩ, “ɩvalɩ akyɛdɩ ɩmanlɩ adasamaa.” (Kɩnga Ɛfɩsɛsɩmaa 4:​7, 8.) Pɔɔlʋ hileli numɔ kɛɛ, Gyisɛsɩ valɩ akyɛdɩ eyi manlɩ na ama bɛawʋwa asafʋ yɩ wɔ ahʋanɩ azʋlɔtʋ zʋ. (Ɛfɩ. 1:​22, 23; 4:​11-13) Nnɛ, asafʋ nu azʋ̃mɩvʋlɔ, asafʋ nu mbanimbani, nɩɩ mansini zʋ ehilalɛmaa kɩnla akyɛdɩ mɔɔ ɩva ɩma adasamaa nɩ nwʋ. a Ɩwɔ numɔ, mmenyia eyimmɔ bɛáli munli, meti bedi mfʋmɩ. (Gye. 3:2) Naasʋ̃ ye Niibenyia Gyisɛsɩ Kɩlayɩsɩ ɩfa bɛ idi egyima ɩbʋwa yɛ, bɛdɩ akyɛdɩ mɔɔ ɩva ɩma yɛ.

3. Ma ndianwʋ fa kile kezimɔ yɛkɔhʋla kɔwʋwa mmenyia mɔɔ bɛdɩ ‘akyɛdɩ ma adasamaa’ yɩ ma bɛkɛyɛ be egyima yɩ.

³ Gyisɛsɩ valɩ egyima be mɔɔ nwʋmɔ hyinyia wulalɩ mmenyia  eyimmɔ bɛ sa, mɛyɩ yɛ lɛ kɛɛ bɛkɛhyɛ asafʋ yɩ ɛzɩzɩbɛ. (Ɛfɩ. 4:12) Naasʋ̃ ye munwala kɔhʋla kɔwʋwa bɛ ma bekeli asɛdɩ eyi mɔɔ nwʋmɔ hyinyia nɩ nwʋ egyima. Sa yɛkʋla yɛfa eyi yetindiã Kɩndɔm Hɔɔlʋ igyinanlɛ nwʋ. Abiyemmɔ yɛ bekyina aliyia yɩ yɩzayɩ a. Naasʋ̃ mmenii mvʋlɔ sʋ̃ fa alɩyɛ nɩɩ nninyeni mvʋlɔ bɩlɛ bɛ fa bʋwa bɛ. Ɔzɔ la yɛ amɩyɛ sʋ̃ yɛkɔhʋla yɛkɔwʋwa asafʋ nu azʋ̃mɩvʋlɔ, mbanimbani, nɩɩ mansini zʋ ehilalɛmaa ma bɛkɛhyɛ asafʋ yɩ ɛzɩzɩbɛ iluwa mɔɔ yɛkã nɩɩ mɔɔ yɛyɛ nɩ zʋ. Bɛmá yehila kezimɔ yenyia be egyima ɛzɩzɩbɛ nɩ zʋ mfasʋ, nɩɩ kezimɔ yɛkɔhʋla yekehile kɛɛ yɛ anyɩ sɔ bɛ nɩɩ Gyisɛsɩ mɔɔ ɩvalɩ akyɛdɩ eyi ɩmanlɩ yɛ nɩ paa.

ASAFƲ NU AZƲ̃MƖVƲLƆ “BƆBƲWA ABIYEMMƆ”

4. Asafʋ nu azʋ̃mɩvʋlɔ mɔɔ nɩ bɔwɔ ɔwɔkɩ Kilisinyiamaa bɛ mmɩlɩ zʋ nɩ, mɩnla yɛ nɩ bɛyɛ “bɔbʋwa abiyemmɔ” a?

⁴ Wɔ ɔwɔkɩ Kilisinyiamaa bɛ mmɩlɩ zʋ nɩ, bɛyɩlɩ mmenyia be kɛɛ asafʋ nu azʋ̃mɩvʋlɔ. (1 Tim. 3:8) Ɩkɛyɛ kɛɛ bɔnlʋmmɔ yɛ Pɔɔlʋ hɛlɛlɩ bɔ nwʋ odwokɔ kɛɛ nɩ “bɔbʋwa abiyemmɔ” yɩ a. (1 Kɔl. 12:28) Ɩda ali kɛɛ asafʋ nu azʋ̃mɩvʋlɔ lili nninyeni mɔɔ nwʋmɔ hyinyia nwʋ egyima na ama mbanimbani yi bɛanyia mmɩlɩ bɛahilehile asafʋ yɩ na bɛagyelagyela mmeliyema yɩ sʋ̃. Kɛ ndianwʋ nɩ, ebiye a asafʋ nu azʋ̃mɩvʋlɔ wʋwalɩ ma behilalɩ Ɛhɛlɛlɛdwokɔ yɩ zʋ bɛhɛlɛlɩ ebiye anzɛnyɩɩ bɔhɔ bɔdʋdɔlɩ nninyeni mɔɔ bekehyinyia na bɛava bɛahɛlɛ ebiye nɩ.

5. Mɩnla nninyeni yɛ asafʋ nu azʋ̃mɩvʋlɔ mɔɔ bɔwɔ kɛnɩ nnɛ nɩ bɛyɛ bɔbʋwa a?

⁵ Sunzu nninyeni be mɔɔ nwʋmɔ hyinyia mɔɔ asafʋ nu azʋ̃mɩvʋlɔ bɛyɛ wɔ wʋ asafʋ yɩ nu nɩ nwʋ kila. (1 Pit. 4:10) Ebiye a bɛkɛma bekehila asafʋ yɩ yi ozukuasɛmɩ anzɛnyɩɩ yɩ azɩlɛ-sini yi zʋ, bɛkɛhɛla awuuku bɛkɛma asafʋ yɩ, bekehila mahyini mɔɔ yɛfa yɛyɛ dɩyɛzumanlɛ yɩ zʋ, bekele ngyɛvʋlɔ wɔ dɩyɛzumanlɛ tʋ, anzɛnyɩɩ bɔkɔwʋwa ma bekehila Kɩndɔm Hɔɔlʋ yɩ zʋ. Ɔzɔ nninyeni yi bʋwa ma asafʋ yɩ nyia dɩyɛzumanlɛ zʋ mfasʋ na dasɩlɛlilɛ egyima yɩ sʋ̃ kɔlɩ zʋlɔ bʋwɔ. (1 Kɔl. 14:40) Akʋ̃ sʋ̃, asafʋ nu azʋ̃mɩvʋlɔ be yɛ egyimalilɛ azʋlɔtʋ wɔ Kilisinyianɩ Ɛbɩlawɔlɛ Nɩɩ Dasɩlɛlilɛ—Dɩyɛzumanlɛ tʋ na bɛma bagua nu ndɛnɩ. Bɔkʋla sʋ̃ bɛyɩ asafʋ nu sʋ̃mɩvʋlɔ be kɛɛ ɩwʋwa dasɩlɛlilɛ okuwu zʋ ehilalɛvʋlɔ be. Sɛ asafʋ nu mbanimbani bekegyela abiye a, bɔkʋla bɛ nɩɩ asafʋ nu sʋ̃mɩvʋlɔ be mɔɔ ɩfata kɔ.

6. Sianti mɔɔ yɛ anyɩ sɔ yɛ asafʋ nu azʋ̃mɩvʋlɔ mɔɔ bɔbɔ ɛhyɩmɛ nɩ, ebiye yɛ lɛ mɩnla a?

⁶ Mɩnla ɔhʋanɩ zʋ yɛ asafʋ yɩ nyia asafʋ nu azʋ̃mɩvʋlɔ be egyima yɩ zʋ mfasʋ a? Eliyema baalɛ be mɔɔ bɔfʋlɛ yɩ Beberly b mɔɔ ɩwɔ Bolivia nɩ hanlɩ kɛɛ: “Iluwa egyima mɔɔ yɛ asafʋ nu azʋ̃mɩvʋlɔ bɛyɛ nɩ ti, mʋkɔ dɩyɛzumanlɛ a mɩ anyɩ de paa. Ɩma mʋkʋla mʋtʋ ndwomi, mɩma munwalɩyɛ, mitiye ndɛnɩ na musuma debe wɔ vidiyo nɩɩ mfonyini azʋlɔtʋ mɔɔ bɛyɩ nɩ nu.” Bɔbɔ bɛzabɛ mɔɔ bɔwɔ dɩyɛzumanlɛ tʋ nɩ nwʋ banɩ, na bɛzabɛ mɔɔ bɛákʋla bɛba dɩyɛzumanlɛ nɩ bɔfʋlɛ bɛ wɔ foonu anzɛnyɩɩ vidiyo-kɔɔlʋ zʋ. Sɛ yɛpɔ dɩyɛzumanlɛ a, bedi anyunumi ma yesiyeziye Kɩndɔm Hɔɔlʋ, betinyia fʋtʋlɔ mɔɔ yɛyɩlɩ na bɛma yɛ sa kã awuuku nɩɩ nninyeni mvʋlɔ mɔɔ yehyinyia nɩ. Mɩ anyɩ sɔ bɛ paa!” Leslie mɔɔ ɩda Colombia mɔɔ yi hũ dɩ asafʋ nu ebani nɩ kã kɛɛ: “Mu hũ hyinyia asafʋ nu azʋ̃mɩvʋlɔ yɩ bɔ mmʋwalɩyɛ. Sɛ béni kɛnɩ a, ankɩ ɩkɛyɛ sɩ kɛma yɩ paa. Meti mɩ anyɩ sɔ ɛhyɩmɛ nɩɩ ɛpɛ mɔɔ bɔwɔ kɛɛ bɔkɔwʋwa nɩ paa.” Pɩlazunɛ bela íni nwʋmɔ kɛɛ ye munwala yɛ anyɩ sɔ egyima mɔɔ yɛ asafʋ nu azʋ̃mɩvʋlɔ bɛyɛ nɩ.—1 Tim. 3:13.

7. Kɛ ɩkɛyɛ na yɛahile kɛɛ yɛ anyɩ sɔ asafʋ nu azʋ̃mɩvʋlɔ a? (Kila mfonyini yi sʋ̃.)

⁷ Bayɩbʋlʋ yɩ hyɛ yɛ ɛzɩzɩbɛ kɛɛ, ‘yɛlá Nyamɩnlɩ asɩ.’ (Kol. 3:15) Sa yɛkʋla yɛyɛ zɔ la yɛma yɛ asafʋ nu azʋ̃mɩvʋlɔ yɩ. Ɩwɔ numɔ, sa yɛkʋla yɛtɩ nɣanlɩ kɛɛ yɛ anyɩ sɔ bɛ dɩyɛ, naasʋ̃ ɩsɛ kɛɛ yɛma bɔnwʋ yɩ na yɛda bɛ asɩ. Ɔzɔ yɛ asafʋ  nu ebani be mɔɔ ɩwɔ Finland mɔɔ bɔfʋlɛ yɩ Krzysztof yɛ a. Ɩkã kɛɛ, “Mɩkɛlɛ ɛhɛlɛlɛdwokɔ be nɩɩ dɩyɛ pɔkyɩɩ be mɔɔ bɛyɛlɩ mɔɔ ɩhyɛlɩ mɩ ɛzɩzɩbɛ, anzɛnyɩɩ sianti mɔɔ mɩ anyɩ sɔ be egyimalilɛ nɩ mukua kɛlɛta zʋ anzɛnyɩɩ mɩfa mɩtɛstɩ bɛ.” Pascal nɩɩ Jael mɔɔ bɛda New Caledonia nɩ, bɛhyɛda bɔbɔ mpayɩ bɛma bɛ asafʋ nu azʋ̃mɩvʋlɔ. Pascal kile numɔ kɛɛ, “Aɣile asã yɩ, yɛta yɛbɔ mpayɩ yɛma yɛ asafʋ nu azʋ̃mɩvʋlɔ yɩ paa. Yɛda Gyehova asɩ kɛɛ ɩva bɛ ɩma yɛ, na yesiã yɩ kɛɛ ɩhɩnla bɔ nwʋ na ɩwʋwa bɛ.” Gyehova tiye mpayɩwɔlɛ mɔɔ ɩdɩ zɔ, na asafʋ yɩ munwatĩĩ sʋ̃ nyia zʋlɔ mfasʋ.—2 Kɔl. 1:11.

ASAFƲ NU MBANIMBANI MƆƆ BƐYƐ ‘EGYIMA ƐZƖZƖBƐ WƆ MƲNLƲMMƆ BO NU’

8. Mɩnla ti mɔɔ Pɔɔlʋ hanlɩ kɛɛ asafʋ nu mbanimbani mɔɔ nɩ bɔwɔ ɔwɔkɩ Kilisinyiamaa bɛ mmɩlɩ zʋ nɩ yɛlɩ ‘egyima ɛzɩzɩbɛ’ a? (1 Tɛsalonikamaa 5:​12, 13)

⁸ Asafʋ nu mbanimbani mɔɔ nɩ bɔwɔ ɔwɔkɩ Kilisinyiamaa bɛ mmɩlɩ zʋ nɩ yɛlɩ egyima ɛzɩzɩbɛ manlɩ asafʋ yɩ. (Kɩnga 1 Tɛsalonikamaa 5:​12, 13; 1 Tim. 5:17) Nɩ bekila dɩyɛzumanlɛ zʋ na besizi abɔkɔ azʋlɔtʋ kɛɛ mbanimbani okuwu bɛfa “bekila” asafʋ yɩ zʋ. Akʋ̃ sʋ̃, nɩ ‘botu bɔ fʋlɔ,’ kile kɛɛ nɩ bɔzʋ̃ ɔlɔlɛ nu bɛfa fʋlɔdulɛ pɔkyɩɩ bɛma asafʋ yɩ bɛfa bɔbɔ bɔ nwʋ banɩ. (1 Tɛs. 2:​11, 12; 2 Tim. 4:2) Eyimmɔ la ahanlɩ a, nɩ bɛyɛ egyima ɛzɩzɩbɛ sʋ̃ bɛfa bekila bo mmusunwa, na bɛzabɛ sʋ̃ bɛhyɛlɩ bɛ nɩɩ Gyehova avinli abusunwawɔlɛ nu ɛzɩzɩbɛ.—1 Tim. 3:​2, 4; Tay. 1:​6-9.

9. Nnɛ, mɩnla asɛdɩ azʋlɔtʋ yɛ asafʋ nu mbanimbani wɔ a?

⁹ Asafʋ nu mbanimbani mɔɔ bɔwɔ kɛnɩ nnɛ nɩ, béni alagyɩ kʋlaa. Bɛdɩ odwokɔbahanlɛmaa. (2 Tim. 4:5) Bɛfa ɛhyɩmɛ bedi dasɩlɛlilɛ egyima yɩ anyunu, bɛyɛ nhyɩhyɛlɩyɛ ma bɛkã odwokɔ yɩ wɔ asafʋ yɩ yɩ azɩlɛ-sini yi nu, na bɛtɩdɩ yɛ ma yɛkã odwokɔba yɩ na yekilehile bʋwɔ. Bɔsʋ̃mɩ sʋ̃ kɛɛ ndɛnɩwuwalɛmaa mɔɔ bɔnwʋ nwɔkɛ na bɛáhila mmenii anyunu. Sɛ eliyema be yɛ tanɩ mɔɔ numɔ yɛ ɔnlʋmɔ a, mbanimbani yi bɔ mmɔdɩnɩ kɛɛ bɔkɔwʋwa yɩ ma ikeziyeziye ɩ nɩɩ Gyehova avinli. Mmɩlɩ kʋ̃ yɩ la sʋ̃, bekila kɛɛ asafʋ yɩ nwʋ kɛdɩ. (1 Kɔl. 5:​12, 13; Gal. 6:1) Naasʋ̃ asafʋ nu mbanimbani be egyima titili yɛ lɛ kɛɛ bekehila Nyamɩnlɩ mmenii zʋ. (1 Pit. 5:​1-3) Besiyeziye bɔ nwʋ bʋwɔ bɛma Bayɩbʋlʋ nu ndɛnɩ azʋlɔtʋ, bɔbɔ mmɔdɩnɩ kɛɛ bɔkɔnwʋ abiyela mɔɔ ɩwɔ asafʋ yɩ nu bʋwɔ, na bɔkɔ bekyelagyela bɛ. Mbanimbani yi be sʋ̃ bʋwa ma bekyina anzɛnyɩɩ besiyeziye Kɩndɔm Hɔɔlʋ azʋlɔtʋ, bɛyɛ ayiyialɩyɛ nwʋ nhyɩhyɛlɩyɛ, bɔsʋ̃mɩ wɔ Asʋpiti Nkitanwʋlilɛ Kɔmitii azʋlɔtʋ nu, nɩɩ Okuwu Mɔɔ Bekyelagyela Mmeliyema Mɔɔ Bɔ Nwʋ Ba Bɛ nu. Bɛyɛ eyimmɔ munwala bɛkɩnla be egyima azʋlɔtʋ nwʋ. Amba, asafʋ nu mbanimbani yɛ egyima ɛzɩzɩbɛ ma yɛ paa!

10. Mɩnla ti mɔɔ yɛ anyɩ sɔ yɛ asafʋ nu mbanimbani mɔɔ bɛyɛ egyima ɛzɩzɩbɛ nɩ a?

¹⁰ Gyehova hanlɩ dianlɩ kɛnɩ kɛɛ mbanimbani kehila yɛ zʋ bʋwɔ, meti ‘ye kunlu lótu dɔkʋ̃ anzɛnyɩɩ bɔlɔ lɛ́kã yɛ.’ (Gyɛ. 23:4) Eliyema baalɛ be mɔɔ ɩwɔ Finland mɔɔ bɔfʋlɔ yɩ Johanna nwʋnlɩ kɛɛ ɔzɔ odwokɔ yɩ dɩ nɔhʋanlɛ mmɩlɩ mɔ yɩ maamɩ nwʋ balɩ yɩ ɛzɩzɩbɛ ɛzɩzɩbɛ nɩ. Ɩkã kɛɛ: “Ɩwɔ numɔ kɛɛ ɩyɛ sɩ ɩma mɩ kɛɛ mɩkɛhã kezimɔ mɩtɩ nɣanlɩ mikehile mmenii dɩyɛ, naasʋ̃ asafʋ nu ebani be mɔɔ nɩ mízi yi bʋwɔ nyianlɩ mʋ nwʋ abʋtalɩ, ɩ nɩɩ mɩ wɔlɩ mpayɩ, na ɩmanlɩ mʋ nwʋnlɩ kɛɛ Gyehova dɔ mɩ. Mɩáhakɛ odwokɔ pɔkyɩɩ mɔɔ ɩhanlɩ dɩyɛ, naasʋ̃ mɩkakɛ kɛɛ ɩmanlɩ mɩ ahʋnlɩnɩ dɔlɩ mu kunlu. Mide midi kɛɛ Gyehova yɛ ɩzʋ̃manlɩ yɩ wɔ mmɩlɩ mɔ ɩfata nu ma ɩɣa ɩwʋwalɩ mɩ a.” Mɩnla ɔhʋanɩ zʋ yɛ wʋ asafʋ nu mbanimbani wʋwa wʋ a?

11. Kɛ ɩkɛyɛ na yɛahile kɛɛ yɛ anyɩ sɔ asafʋ nu mbanimbani a? (Kila mfonyini yi sʋ̃.)

¹¹ Gyehova pɛ kɛɛ yekile anyɩnlɩzɔlɛ wɔ asafʋ nu mbanimbani “be egyima nɩ mɔɔ bɛyɛ nɩ” nwʋ. (1 Tɛs. 5:​12, 13) Henrietta mɔɔ ɩda Finland nɩ kã kɛɛ: “Asafʋ nu mbanimbani bɔzʋ̃ bɛ pɛ nu  bɔbʋwa mmenii mvʋlɔ, naasʋ̃ mɛyɩ iáhile kɛɛ bɔwɔ mmɩlɩ sʋ̃maa bɛtɛla yɛ na bɛávɛ, anzɛnyɩɩ bɛáyiyia ndwokɔzɩzɩbɛ bela. Ɩyɛ a mɩkã mikile bɛ kɛɛ, ‘Ezi debe a? Ɛdɩ asafʋ nu ebani baaba paa. Kɛ ezi yi zɔ?’” Eliyema baalɛ be mɔɔ bɔfʋlɛ yɩ Sera mɔɔ ɩwɔ Türkiye c kã kɛɛ: “Asafʋ nu mbanimbani hyinyia ɛzɩzɩbɛhyɛlɛ na ama bɛahɔ zʋ bɛayɛ be egyima yɩ. Meti sa yɛkʋla yɛkɛlɛ ndwokɔ be yekua kaadɩ zʋ yɛma bɛ, yɛma bɛba yɛ awudo bɛba bedi alɩyɛ, na yɛ nɩɩ bɛ bɔ numɔ kɔ dasɩlɛlilɛ.” Asʋ̃ asafʋ nu ebani be wɔ kɛnɩ mɔɔ wʋ anyɩ deli kezimɔ ɩyɛ yi egyima nɩ nwʋ a? Yɛ debe ma ɩnwʋ́ yɩ kɛɛ wʋ anyɩ sɔ yɩ.—1 Kɔl. 16:18.

MANSINI ZƲ EHILALƐMAA HYƐ YƐ ƐZƖZƖBƐ

12. Aninyiammɔ sʋ̃ yɛ Gyisɛsɩ luwalɩ bɔ zʋ hyɛlɩ asafʋ azʋlɔtʋ yɩ ɛzɩzɩbɛ a? (1 Tɛsalonikamaa 2:​7, 8)

¹² Kɩlayɩsɩ Gyisɛsɩ ɩvalɩ ‘akyɛdɩ ma adasamaa’ ɩmanlɩ asafʋ yɩ, mɔɔ bɔsʋ̃mɩ wɔ ɔhʋanɩ fʋlɔ zʋ sʋ̃. Iluwa yɩ ɔhʋanɩhilelɛ zʋ nɩ, mbanimbani mɔɔ bɔwɔ Gyelusalamɩ nɩ zʋ̃manlɩ Pɔɔlʋ, Banabasɩ nɩɩ mmenii mvʋlɔ ma boduduli ahʋanɩ bɔhɔ begyelalɩ asafʋ azʋlɔtʋ yɩ. (Egy. 11:22) Mɩnla ti a? Nɩ bɔkɔ bɛhyɛ asafʋ yɩ ɛzɩzɩbɛ kɛmɔ mbanimbani nɩɩ azʋ̃mɩvʋlɔ yɛ nɩ la. (Egy. 15:​40, 41) Mmenyia eyimmɔ bɛfa mɔɔ bɛpɛ nɩ betiã ahanlɩ na bɛfa bɔ nnwʋanlɩ po betiã asianɩ nu bɔkɔ bekilehile mmenii mvʋlɔ na bɛhyɛ bɛ ɛzɩzɩbɛ.—Kɩnga 1 Tɛsalonikamaa 2:​7, 8.

13. Asɛdɩ azʋlɔtʋ mɔɔ mansini zʋ ehilalɛmaa di nwʋmɔ egyima nɩ, ebiye yɛ lɛ mɩnla a?

¹³ Mansini zʋ ehilalɛmaa botudu ahʋanɩ paa. Bo nu be tua ɔhʋanɩ tɩndɩnlɩ paa kɔ kyela asafʋ azʋlɔtʋ. Dapɛnɩ bela, mansini zʋ ehilalɛvʋlɔ ma ndɛnɩ azʋlɔtʋ, ikyelagyela mmeliyema yɩ, ɩyɛ ayiyialɩyɛ ɩma ɔhʋanɩbukolɛmaa nɩɩ asafʋ nu mbanimbani, na ɩyɛ dasɩlɛlilɛ ayiyialɩyɛ sʋ̃. Isiyeziye ndɛnɩ azʋlɔtʋ na ɩyɛ mansini nɩɩ manlɩ-avinli ayiyialɩyɛ nwʋ nhyɩhyɛlɩyɛ. Ikilehile wɔ  ɔhʋanɩbukolɛmaa sukuulu tʋ, ɩyɛ ayiyialɩyɛ titili nwʋ nhyɩhyɛlɩyɛ ɩma ɔhʋanɩbukolɛmaa mɔɔ bɔwɔ mansini yi nu nɩ. Eyimmɔ munwala la ahanlɩ a, idi nninyeni azʋlɔtʋ mɔɔ nwʋmɔ hyinyia nɩɩ nninyeni mvʋlɔ mɔɔ ide ndɛmɩbɛlɛ mɔɔ ɩzʋ̃ Bɛtɩlɩ nɩ nwʋ egyima.

14. Mɩnla ti mɔɔ yɛ anyɩ sɔ yɛ mansini zʋ ehilalɛmaa mɔɔ bɛyɛ egyima ɛzɩzɩbɛ nɩ a?

¹⁴ Mɩnla ɔhʋanɩ zʋ yɛ asafʋ azʋlɔtʋ yɩ nyia mansini zʋ ehilalɛmaa be egyima ɛzɩzɩbɛ nɩ zʋ mfasʋ a? Eliyema benyia be mɔɔ ɩwɔ Türkiye kã mansini zʋ ehilalɛmaa be egyelalɛ nwʋ odwokɔ kɛɛ: “Mmɩlɩ bela mɔɔ bɛkɛɣa kegyela yɛ nɩ, ɩhyɛ mɩ ɛzɩzɩbɛ kɛɛ ɩsɛ kɛɛ minyia mmɩlɩ sʋ̃maa mʋbʋwa mi mmeliyema mmenyia nɩɩ mmaalɛ. Miyiyia mansini zʋ ehilalɛmaa sʋ̃maa, naasʋ̃ bo nu ɔkʋ̃ po lɛ́manlɩ mɩlɛ́tɩlɩ nɣanlɩ kyɩ̃ kɛɛ béni alagyɩ kʋlaa anzɛnyɩɩ bɔlɔ́kʋla bɛ nɩɩ mɩ kɔwɔ nkɔmmɔ.” Johanna mɔɔ yɛhã yɩ nwʋ odwokɔ daada nɩ, ɩ nɩɩ mansini zʋ ehilalɛvʋlɔ be hɔlɩ dasɩlɛlilɛ, naasʋ̃ bɛátʋ abiyela wɔ awudo. Naasʋ̃ ɩkã kɛɛ, “Mɩ ɛɣɛɛlɛ léfi ɔzɔ eɣile yi kyɩ̃. Nɩ mi mmeliyema mmaalɛ anwɩ̃ boduli bɔhɔ bɔwʋwalɩ dɩka fʋlɔ a ɩlɛ́kyɛlɩ, na nɩ mɩ ɛɣɛɛlɛ lɔ bɛ paa. Naasʋ̃ mansini zʋ ehilalɛvʋlɔ yɩ hyɛlɩ mɩ ɛzɩzɩbɛ na ɩwʋwalɩ mɩ ma mʋnwʋnlɩ kɛɛ, kakɩ yɩ mɛyɩ, yɛlɔ́kʋla yɛ nɩɩ ye mmusunwamaa nɩɩ yɛ ɔhɔnwʋmmɔ kɔwʋwa dɩka ɔkʋ̃ mmɩlɩ munwala, naasʋ̃ wɔ oyuwadɩ fʋlɔ yɩ nu mɛyɩ yekenyia ɔnwʋmɔ ɔhʋanɩ yɛ nɩɩ bɛ kɔwʋwa daabaa.” Ye nu sʋ̃maa wɔ kɛnɩ a, kezimɔ mansini zʋ ehilalɛmaa be wʋwalɩ yɛ nɩ ti, ɩma yɛbɛ bo odwokɔ paa.—Egy. 20:37–21:1.

15. (a) Kɛmɔ 3 Dwɔɔnʋ 5-8 ma yɛnwʋ yɩ nɩ, kɛ ɩkɛyɛ na yɛahile anyɩnlɩzɔlɛ yɛama mansini zʋ ehilalɛmaa a? (Kila mfonyini yi sʋ̃.) (b) Mɩnla ti mɔɔ ɩsɛ kɛɛ yekile anyɩnlɩzɔlɛ yɛma mmenyia mɔɔ beli nninyeni anyunu nɩ bɛ yɩmmɔ a, na kɛ yɛkɛyɛ yɩ yekeze a? (Kila alɩka mɔɔ ise, “ Kakɛ Bɛ Yɩmmɔ.”)

¹⁵ Sʋ̃mavʋlɔ Dwɔɔnʋ hyɛlɩ Geyɔsʋ ɛzɩzɩbɛ kɛɛ ɩlá ngyɛvʋlɔyɛlɛ ali ihile mmeliyema mɔɔ bɛba bekyela bɛ nɩ, na ‘ihila na idiã bɛ ɔhʋanɩ zʋ  kɩnlɩma kɛmɔ ikila a, ɩkɔzɔ Nyamɩnlɩ yɩ anyɩ nɩ.’ (Kɩnga 3 Dwɔɔnʋ 5-8.) Ɔhʋanɩ ɔkʋ̃ mɔɔ yekoluwa zʋlɔ yɛkɛyɛ zɔ yɛ lɛ kɛɛ, yɛkɛma bɛkɛɣa keli alɩyɛ wɔ yɛ awudo. Ɔhʋanɩ fʋlɔ sʋ̃ yɛ lɛ kɛɛ, sɛ bɛba bekyela yɛ asafʋ yɩ a, yɛ nɩɩ bɛ kɔhɔ dasɩlɛlilɛ. Leslie mɔɔ yɛhã yɩ nwʋ odwokɔ daada nɩ kile anyɩnlɩzɔlɛ wɔ ahʋanɩ anwɩ̃ mvʋlɔ zʋ. Ɩkã kɛɛ, “Misiã Gyehova kɛɛ ɩmá bɛ sa ɩhã nninyeni mɔɔ behyinyia nɩ. Mɩ nɩɩ mu hũ hɛlɛ ahɛlɛta hɔ ma bɛ, na yɛma bɔnwʋ kezimɔ be egyelalɛ nɩ wʋwa yɛ.” Kakɛ kɛɛ, mansini zʋ ehilalɛmaa bɛdɩ mmenii kɛɛ yɛzayɛ la. Ɩyɛ a bɔ nwʋ pa bɛ, adwɩnɩndwɩnɩ hyɛ bɔ zʋ na ɩyɛ po a, be padi kolɔ. Ebiye a, wʋ ndwokɔ mɔɔ ɩhyɛ ɛzɩzɩbɛ mɔɔ ɛkɛhã kehile bɛ anzɛnyɩɩ akyɛdɩ be mɔɔ ɛkɛva kɛma bɛ nɩ kɔhʋla kɛyɛ bɛ mpayɩwɔlɛ nwʋ munwalɩyɛ!—Ɛɣɛ. 12:25.

YEHYINYIA MMENYIA MƆƆ BƐDƖ ‘AKYƐDƖ MA ADASAMAA’ NƖ

16. Kɛmɔ Ɛɣɛlɛwulɛ 3:27 ma yɛnwʋ yɩ nɩ, mɩnla ndwokɔ yɛ mmeliyema mmenyia kɔhʋla keɣizia bɔ nwʋ a?

¹⁶ Wɔ oyuwadɩ munwala nɩ, yehyinyia mmenyia mɔɔ bɔkɔzʋ̃mɩ kɛɛ ‘akyɛdɩ ma adasamaa.’ Sɛ ɛdɩ benyia mɔɔ onluma a, asʋ̃ “ɩwɔ wʋ tumi nu” kɛɛ ɔkɔwʋwa a? (Kɩnga Ɛɣɛlɛwulɛ 3:27.) Asʋ̃ ɛpɛ kɛɛ ɛfata kɛɛ asafʋ nu sʋ̃mɩvʋlɔ a? Sɛ ɛdɩ asafʋ nu sʋ̃mɩvʋlɔ sʋ̃ a, asʋ̃ ɔwɔ ɛpɛ kɛɛ ɛkɛɣa kɛyɛ asafʋ nu ebani na wʋawʋwa wʋ mmeliyema a? d Sa ɔkʋla yɛ nzɩnzanlɩyɛ wɔ wʋ ɛbɩlawɔlɛ nu na ama wʋahʋla wʋahɔ Bulombunlililɛ Odwokɔbahanlɛmaa Sukuulu yi be a? Ɔzɔ sukuulu yi kɛdɩdɩ wʋ na ɩama ɔhʋanɩ ma Gyisɛsɩ ɩ nɩɩ wʋ iali egyima sʋ̃maa. Sɛ ɛtɩ nɣanlɩ kɛɛ wʋávata a, bɔ Gyehova mpayɩ. Siã yɩ kɛɛ ɩvá yi sunzuma nwanzanwanza yɩ ɩwʋwa wʋ ma ɔhʋla ɛyɛ egyima bela mɔɔ bɛkɛva kowula wʋ sa nɩ.—Lk. 11:13; Egy. 20:28.

17. Mɩnla yɛ mmeliyema mɔɔ bɛdɩ ‘akyɛdɩ ma adasamaa’ nɩ ma yɛnwʋ yɛfalɩ ye Bulombunli, Kɩlayɩsɩ Gyisɛsɩ nwʋ a?

¹⁷ Egyima ɛzɩzɩbɛ mɔɔ mmeliyema mɔɔ Gyisɛsɩ ɩyɩ bɛ kɛɛ ‘akyɛdɩ ma adasamaa’ yɛ nɩ, ɩdɩ dasɩlɛ mɔɔ ikile kɛɛ ikilee ɔhʋanɩ yɛ wɔ awielɩyɛ mmɩlɩ eyi nu. (Mt. 28:20) Yɛ anyɩ sɔ paa kɛɛ yɛwɔ Bulombunli mɔɔ ɩwɔ ɔlɔlɛ, yi kunlu ɩdɩyɛnɛ, izi mɔɔ yehyinyia na ɩfa mmenyia mɔɔ bɛfata ɩma yɛ kɛɛ bɔwʋwá yɛ. Meti pɩbɛ ahʋanɩ mɔɔ okoluwa zʋ kehile anyɩnlɩzɔlɛ kɛma mmenyia eyimmɔ mɔɔ bɛyɛ egyima ɛzɩzɩbɛ nɩ. Na áma wʋ ɛɣɛɛlɛ fi sʋ̃ kɛɛ ɛkɛla Gyehova asɩ, iluwakɛɛ “dɩyɛ baaba bela nɩɩ ɛhyɛlɛdɩyɛ baaba mɔɔ idi munli nɩ,” ɩzʋ̃ yɩ kɛnɩ.—Gye. 1:17.