Le exwe 30 ciwo yí vayi mɛɔ, amɛ sugbɔ kpɔɛ mɔ ekacaca ci yí le jukɔn vovovowo gblamɛ sɛnŋ yí nyɔkɔ doji hɛnnɛ. Ele ahan gan, enu ciwo yí jɔkɔ ɖɛyɛ dasɛ mɔ enuwo trɔ bu.

•   “Amɛwo vɔnkɔ mɔ ahwa ci yí jɔkɔ le Gaza akaka yi jukɔn buwo mɛ, ɖo Izraɛli koɖo Hezbollah wakɔ vu do Liban lixo ji.”​—Reuters, 6 Janvier 2024.

•   “Iran gbɛbɔbɔwo jekɔ amɛwo ji le texwe vovovowo, yí Iran vatɔ bɔnŋbu nuikliyɛwo wawa. Gbesɔ kpe niɔ, Russie koɖo Chine jɔn nu koɖo Iran. Ecɛyɛɔ, jukɔn cɛwo pleŋ vaɖuɖɔ ta nɔ weɖoxɔxu jukɔnwo.”​—The New York Times, 7 Janvier 2024.

•   “Russie kpɔtɔ dadahɛn nu le Ukraine haan.”​—UN News, 11 Janvier 2024.

•   “Chine ho koɖo ahwawanuwo sukɔgbɔ doji, Taiwan tɔ go yiyi mɔ yenyi jukɔn yí manyimanyi vale gblamɛ nɔ Chine koɖo Etats Unis. Nɔnɛmɛ cɛwo dasɛ mɔ ahwa atɛnŋ ajɔ fafɛɖe.”​—The Japan Times, 9 Janvier 2024.

 Bibla nu nyɔ ɖe so manyimanyi ci yí le xexeɛ mɛ nu, shigbe lé mìkpɔɛkpɔɛ gbɛ nɛa? Manyimanyi cɛ ahɛn ahwa va xexeɛ mɛa?

 Ahwawo jɔjɔ le egbɛmɛ, vɔ Bibla deyɔ eɖe koŋ yí nu enyɔ ɖɛ so nu o. Ele ahan gan, enu ɖɛ mɔ ahwawo akakakɔ le mìwo hwenu, keke “á ɖe fafa so nyigban ji.”​—Enyɔdasɛ 6:4.

 Daniɛli wema nu ɖɛ mɔ “Le azan lɔwo vɔvɔnuɔ,” xexeɛ mɛ ŋsɛnwo “acucukɔ wowonɔnɔwo,” alo adokɔ gbla mɔ yewoakpa cɛ. Egbladodo cɛ awɛ mɔ woadadasɛ wowo hwawanu kpɛnkpinwo yí azankɔ “dɔkunu” ganganwo alo eho sugbɔ do wo nu.​—Daniɛli 11:40, 42, 43, NWT.

 Bibla nu mɔ xexeɛ mɛ nɔnɔmɛwo adahɛn doji gbɔxwe avanyɔ doji. Yesu nu ɖɛ mɔ “xáxá gangan ɖeka a va. Xáxá ahancitɔ ɖekpokpwi de jɔ kpɔ gbeɖe so gɔnmɛjeje nɔ xexe lɔ o.” (Matie 24:21) Le “xáxá gangan” lɔ vɔvɔnuɔ, ahwa ci woyɔnɔ mɔ Harmagedɔn atɔ ji. Bibla dri mɔ yɛnyi “Mawu ŋsɛnwo keŋkeŋtɔ lɔ zan gangantɔ lɔ hwa wagbe.”​—Enyɔdasɛ 16:14, 16.

 Ele ahan gan, Harmagedɔn hwa lɔ ahwlɛn agbetɔviwo gan, denyi gu agu wo o. Mawu azan ahwa lɔ asɔ gu agbetɔwo cɛkpakpawo, ɖo wowa ahwa ciwo yí dahɛn nu sugbɔ. Nɔakpɔ lé Harmagedɔn ahɛn fafa mavɔ vɛ doɔ, hlɛn nyɔta ciwo yí gbɔgbɔ:

•   “Nu Kae Nye Armagedon-ʋa La?”

•   “Eŋɛnywi yí Harmagedɔn hwa nyi!”