LE Bibla hwenuɔ, axwejikpɔtɔ kpɔnɔ axwe alo nunɔamɛshiwo ji nɔ mɛbu. Hweɖewonuɔ, Ebre koɖo Grɛki nyɔgbe ci gɔnmɛ woɖe mɔ “axwejikpɔtɔ” nyinɔ ŋɖe jikpɔtɔ.

Hwenu Ʒakɔbu viɛ ci yí nyi Ʒozɛfu nyi hwashi le Eʒiptiɔ, Ʒozɛfu vanyi axwejikpɔtɔ le yi xwetɔ xwemɛ. Ðo yi xwetɔ ci yí nyi Eʒiptitɔ “na emɔ [yi] nɔ a kpacɛ nɔ enushanu ci le axwe lɔ mɛ.” (Gɔnm. 39:2-6) Le yi godu ci Ʒozɛfu vanyi acɛkpatɔ ŋsɛntɔnɔ le Eʒiptiɔ, éɖo axwejikpɔtɔ ɖeka do yiŋtɔ xwe ji.​—Gɔnm. 44:4.

Le Yesu hwenuɔ, mɛ ciwo shi nyigban ganganwo le nɔnɔ juganmɛ le azɔge nɔ wowo bojiwo. Eyi taɖo mɛ ciwo shi nyigban le lɔwo ɖonɔ enujikpɔtɔ ciwo yí akpɔnɔ edɔ lɔwo ji le boji lɔwo.

Mi yí je anyi axwejikpɔtɔɔ? Exwe sanŋdi ŋkɔtɔ mɛ Rɔmatɔ enuŋwlɛntɔ Columelle ɖo aɖaŋ mɔ, hwashi ci wosɔ ɖo enujikpɔtɔ alo axwejikpɔtɔ ɖo anyi “mɛ ci yí to enuwo mɛ yí kpla lé woawa edɔ nywiɖe do.” Éɖo anyi mɛ ci yí “ana edɔwatɔwo awa dɔ, vɔ dazan tamɛsɛnsɛn o.” Énu kpi mɔ: “Enuvevitɔ ci woaji so gbɔ yí nyi mɔ dabuini mɔ yenya enuwo pleŋ o, vɔ ájinɔ veviɖe mɔ yeakpla enu yoyuwo.”

Mawu Nyɔ lɔ zan axwejikpɔtɔ le kpɔwɛnyɔnunu mɛ yí sɔ dre lé wowanɔ edɔ ɖewo le Kristo hamɛ lɔ mɛ do. Le kpɔwɛ mɛ, apotru Piɛ do ŋsɛn Kristotɔwo mɔ wo le zan enujikpekpe ci Mawu na wo “asɔ sumɔ [wo]wonɔnɔwo shigbe axwejikpɔtɔ nywiwo hannɛ.”​—1 Piɛ. 4:10, NWT.

Yesu ŋtɔ zan axwejikpɔtɔ kpɔwɛ le labalu ci edo le Luiki 16:1-8 mɛ. Gbesɔ kpe niɔ, le nyɔnuɖɛ ci mɛ Yesu xo nuxu so yɛŋtɔ vava nu shigbe Efyɔ nɛ leɔ, éna yi dokplɔtɔwo kando ji mɔ yeaɖo “hwashi egbejinɔtɔ” alo “axwejikpɔtɔ egbejinɔtɔ”ɖeka. Edɔ vevitɔ ci yí axwejikpɔtɔ ŋtɔ́ awa yí nyi mɔ ána ŋɖuɖu ci yí ʒan Yesu dokplɔtɔwo le ŋkeke vɔvɔwo mɛ. (Mt. 24:45-47, NWT; Luiki 12:42, NWT) Axwejikpɔtɔ egbejinɔtɔ lɔ ŋwlɛnkɔ wema ciwo yí dokɔ ŋsɛn amɛwo xɔse le xexe lɔ pleŋ mɛ. Eji jɔnɔ mì mɔ mìle mɛ ciwo yí xɔkɔ wema cɛwo mɛ.