Агару Бичик «калганчы кӱндерде» эмезе бу телекейдиҥ јоголтыларынаҥ озо јердиҥ ӱстинде не болорын јартап јат (2 Тимофейге 3:1; Даниил 8:19; Матфей 24:3).

 Агару Бичик јердиҥ ӱстинде бир ӧйдӧ башка-башка немелер болор деп, озолондыра айдып салган. Олор ончозы калганчы кӱндердиҥ темдеги болот (Лука 21:7). Олордыҥ кезигин кӧрӱп ийектер.

 Бастыра телекейде јуу-согуштар. Иисус Христос: «Калык калыкка, каандык каандыкка удура туруп чыгар» — деп, озолондыра айдып салган (Матфей 24:7). Ачылта 6:4-тӧ айдылганыла болзо, сӱрлеп айдылган «атка мингенге јердеҥ амырды алзын деп» јаҥ берилген. Бу атка мингени јуу-согушты темдектеп јат.

 Ачана-торо. Иисус «ачана-торо болор» деп, озолондыра айдып салган (Матфей 24:7). Ачылта деп бичикте база бир сӱрлеп айдылган ат минген керегинде айдылат. Ол кӧрӱнип келзе, телекейдиҥ башка-башка јерлеринде тыҥ ачана-торо башталар (Ачылта 6:5, 6).

 Тыҥ јерсилкиништер. Иисус јердиҥ ӱстинде башка-башка јерлерде јерсилкиништер болор деп айткан (Матфей 24:7; Лука 21:11). Бу тыҥ јерсилкиништердеҥ улам, качан да болбогон јемирилиштер ле ӧлӱм болор.

 Оору-јобол. Иисус эпидемиялар болор деп айткан (Лука 21:11).

 Каршулу керектер. Каршулу керектер алдынаҥ бери болгон. Је калганчы кӱндерде каршулу керектер јӱк ле болор эмес, је кӧптӧӧр деп, Иисус озолондыра айдып салган (Матфей 24:12).

 Улус јерди ӱреер. Ачылта 11:18-ле болзо, улус Јерди ӱреер. Улус јӱк ле бой-бойына каршу јетирип турган эмес, је ар-бӱткенге де каршузын јетирет. Јерди ӱреерге башка-башка эп-аргалар тузаланылат.

 Улустыҥ кылык-јаҥы ӱрелер. 2 Тимофейге 3:1—4-тӧ озолондыра айдылганыла болзо, улус «быйаны јок болор, олордо агару не де болбос; буурзабас, јаражар кӱӱни јок, копчы болор, тудунбас, казыр болор, јакшыны јаман кӧрӧр; садынчак болор, сананбас, улуркак болор». Улустыҥ кылык-јаҥы коркышту тыҥ ӱрелгенинеҥ улам бу ӧйди чын ла «уур-кӱч ӧйлӧр» деп айдарга јараар.

 Билелерде уур-кӱчтер болор. 2 Тимофейге 3:2, 3-те улус тӧрӧӧн-туугандарынаҥ ыраажып, балдар «ада-энезиниҥ сӧзин укпас» болуп калар деп бичилген.

 Улус Кудайды керексибес. Иисус «кӧп улустыҥ сӱӱжи соор» деп айткан (Матфей 24:12). Ол кӧп саба улустыҥ сӱӱжи Кудайга база сооп калар деген. А 2 Тимофейге 3:4-тӧ улус сооттоп амыраарын «Кудайдаҥ артык сӱӱр» деп бичилген.

 Бойлорын кудайзак улус деп экијӱстенгилеер. Агару Бичикте 2 Тимофейге 3:5-те улус Кудайды сӱӱп турганын јӱк тыштыла кӧргӱзер, је чынынча болзо, олор Кудайдыҥ айтканыла эмес, је бойыныҥ санаазыла јӱрер деп, озолондыра айдылып калган.

 Агару Бичиктиҥ судурларын оноҥ јарт оҥдоор. Даниилдиҥ бичигинде «ӧйдиҥ учында» кӧп улустыҥ библиялык чындыкты оҥдооры ла ол тоодо бу судурларды чике оҥдооры кӧптӧӧр деп айдылган (Даниил 12:4).

 Бастыра јердиҥ ӱстинде сӱӱнчилӱ јар јарлалар. Иисус: «Каандык керегинде Сӱӱнчилӱ Јар јер-ӱстине јарлалар» — деп айткан (Матфей 24:14).

 Улус Кудайдыҥ айтканын керексибес, каткырыжар. Телекейдиҥ учы јууктап келеткен деп јарт кӧрӱнип те турган болзо, кӧп саба улус мыны керекке албай јат (Матфей 24:37—39). 2 Пётр 3:3, 4-тӧ айдылганыла болзо, кезик улус керелерге каткырып, јӱрӱм јаантайын мындый ла болгон деп айдыжат.

 Судурлардыҥ ончозы бӱдӱп јат. Иисус: «Мыныҥ ончозын кӧрӧр болзогор» — деген. Мында ол, бу судурлардыҥ јӱк ле кезигиниҥ эмес, керек дезе кӧп сабазыныҥ да эмес, је ончозыныҥ бӱдери керегинде айткан. Айдарда бу судурлардыҥ ончозыныҥ бир ӧйдӧ бӱткени калганчы кӱндердиҥ темдеги болот (Матфей 24:33).

 Эйе. Телекейдеги айалга ла Агару Бичиктеги хронология калганчы кӱндер 1914 јылда башталып калган деп кӧргӱзет, бу ла јылда Баштапкы телекейлик јуу-согуш башталган. Бис калганчы кӱндерде јадып турганыстыҥ база да кӧп керелерин бу видеоноҥ билип аларга јараар.

 1914 јылда теҥериде Кудайдыҥ Каандыгы тургузылган. Озо ло баштап бу Каандык Сатана Дьяволды ла оныҥ кӧрмӧстӧрин теҥеринеҥ јерге таштап ийген. Бу ӧйдӧҥ ала Сатана ла оныҥ кӧрмӧстӧри јӱк ле јерде јадып тургандарга каршузын јетирет (Ачылта 12:7—12). Сатана кижиликке јаманын јетирип турганы, улустыҥ тыҥ солынганынаҥ ла керектеринеҥ кӧрӱнет. Оныҥ учун калганчы кӱндер «уур-кӱч ӧйлӧр» деп адалат (2 Тимофейге 3:1).

 Бӱгӱнги айалганаҥ улам, кӧп улус тыҥ санааркап јат. Темдектезе, улус бой-бойыла эптӱ-јӧптӱ јӱрӱп болбой турганына ла кижилик бойы бойын јоголтып саларына санааркагылап јат.

 Је база бир бӧлӱк улус бар. Олорды айландыра болуп турган немелер база санааркадат, је келер ӧйгӧ олор ижемјилӱ кӧрӧт. Кудайдыҥ Каандыгы удабас ла јерле башкарып баштаза, ончо кӱчтерди јоголтып салар деп алаҥзу јогынаҥ бӱдет (Даниил 2:44; Ачылта 21:3, 4). Эм тургуза олор Кудайдыҥ айтканыныҥ бӱдерин чыдамкай сакыгылап јат. Анайда ок Иисустыҥ: «Учына јетире чыдашканы дезе, аргадалар» — деп сӧстӧринеҥ токунаду алат (Матфей 24:13; Михей 7:7).